«Նոայի» իտալական դժվարություններն ու գերմանական կասկածները

Երևանի «Նոա» ֆուտբոլային ակումբի նախագահ, «Նոա Հոլդինգի» ղեկավար խորհրդի անդամ Ռոման Գևորգյանը մարտի 3-ին ներկայացել է գերմանական «Յուրդինգեն» ակումբի ֆուտբոլիստներին։ «Յուրդինգենը» դառնում է արտասահմանյան երրորդ ակումբը, որը ձեռք է բերել «Նոա Հոլդինգը» վերջին մեկ տարվա ընթացքում։

Գերմանական ակումբի խնդիրները

«Յուրդինգենը» լուրջ ֆինանսական խնդիրներ ունի։ Ակումբի նախկին նախագահը՝ ռուս Միխայիլ Պոնոմորյովը, որի ներդրումների շնորհիվ «Յուրդինգենը» պահպանում էր իր գոյությունը, հունվարին հայտարարել էր, որ ակումբը դիմել է դատարան սնանկ ճանաչվելու համար։ «Յուրդինգենը» հարուստ ավանդույթներ ունեցող ակումբ է, 1985թ․-ին դարձել է Գերմանիայի գավաթակիր, հաջորդ մրցաշրջանում հասել գավաթակիրների գավաթի խաղարկության կիսաեզրափակիչ, բազմաթիվ երկրպագուներ ունի Գերմանիայում։ Սակայն այժմ հայտնվել է անորոշ իրավիճակում․ ակումբը կարող է արտոնագիր չստանալ հաջորդ մրցաշրջանում երրորդ Բունդեսլիգայում ելույթ ունենալու համար։

«Նոայի» հերթական ձեռքբերումը

«Նոա Հոլդինգը» 2020-2021թթ․-ի ընթացքում արդեն հասցրել է երկու արտասահմանյան ակումբ ձեռք բերել․ Իտալիայում ընկերությունը ներդրում է անում «Սիենա» ակումբում, իսկ «Լատվիայում» ձեռք բերեց Դաուգավպլիսի «Լոկոմոտիվը»  և տեղափոխեց այն Յուրմալա՝ փոխելով նաև ակումբի անունը՝ «Նոա»։ Հայաստանում ընկերությունը ֆուտբոլային ասպարեզ մտավ 2019թ․-ին՝ ձեռք բերելով «Արցախ» ակումբը, և այն վերանվանեց «Նոա»։ «Սիենա» ակումբը չվերանվանվեց․ այդպիսին էր Սիենա քաղաքի իշխանությունների պահանջը։ 

«Յորդինգենի» համար «Նոայի» հայտնվելը փրկության պես էր, բայց ամեն ինչ այդքան էլ հարթ չէր ընթանում։ Գերմանական ակումբի ձեռքբերման մասին հայտնի դարձավ փետրվարի 10-ին։ Բայց դրանից հետո անորոշություն կար․ «Նոայի» ոչ մի ներկայացուցիչ չէր հայտնվել թիմում։ Տեղացիները նույնիսկ կասկածներ ունեին, որ Ռոման Գևորգյան անուն-ազգանունով մարդ ընդհանրապես գոյություն չունի։ Գերմանական մամուլը հաղորդում է, որ Գևորգյանի և Պոնոմորյովի միջև անհամաձայնություններ են եղել, բայց, կարծես թե, ամեն ինչ անցյալում է․ երեքշաբթի օրը Գևորգյանը հանդիպել է թիմի ֆուտբոլիստների և գլխավոր մարզիչ Կրամերի հետ, ընդ որում, հանդիպմանը ներկա են եղել նաև Պոնոմորյովն ու ակումբի նախկին գլխավոր տնօրեն Նիկոլաս Վեյնհարտը։ Գևորգյանը խոսել է ընկերության ծրագրերի մասին և հավաստիացրել, որ «Յուրդինգենը» ցանկանում է երրորդ դիվիզիոնի արտոնագիր ստանալ։ Սնանկության ճանաչման գործընթացը կարող է դադարեցվել։ Թեև ավելի մանրամասն «Նոա Հոլդինգի» ծրագրերի և ակումբի ապագայի վերաբերյալ չի խոսվում։ 

«Յուրդինգենի» երկրպագուները չէին ուզում այնպես, ինչպես «Սիենայում» է

Այդուհանդերձ, գերմանական ակումբի երկրպագուները մեծ ոգևորությամբ չընդունեցին հայկական ընկերությանը։ Նախ, «Նոա Հոլդինգն» ու Ռոման Գևորգյանը 2021թ․-ի սկզբին հասցրեցին մի շարք սկանդալային որոշումներ ընդունել իտալական «Սիենայում»։ Նախ հեռացվեց թիմի գլխավոր մարզիչ Ալբերտո Ջիլարդինոն, որին վստահում էին երկրպագուները և ակումբի ղեկավարության իտալական հատվածը։ Այնուհետև հայտնի դարձավ, որ թիմը գլխավորելու է ռուսաստանցի մասնագետ Վլադիմիր Գազաևը։ Մինչ Գազաևը Իտալիայում աշխատելու իրավունք ձեռք բերեր, թիմը մարզում էր լատվիացի Մարյան Պախարը։ Սակայն Գազաևի նշանակմանը գործը չհասավ։ Իտալական ակումբի երկրպագուները, դժգոհելով թիմի վերջին արդյունքներից և Ջիլարդինոյի հեռացումից, սկսեցին պահանջել հայ ներդրողների հեռացումը։ Գործին խառնվեցին քաղաքի իշխանությունները, խոսվում էր, որ կարող է որոշում կայացվել ներդրողներին հեռացնելու մասին։ Քաղաքում երկրպագուները բաններներ էին տեղադրում՝ «Վերջին զգուշացումը հայերին», «Զգույշ եղեք, պարոն նախագահ, դուք պարտվում եք» բովանդակություններով։ Իրավիճակը բարդացնում էր այն, որ Գազաևը հանդիսանում է Գևորգյանի ընկերը, և իտալացիները կասկածներ ունեին, որ նախագահը պարզապես իր ընկերոջն է գործի դասավորում։

Արդյունքում, բոլոր կողմերի համար ընդունելի լուծում գտնվեց։ Ջիլարդինոյին վերադարձրին գլխավոր մարզչի պաշտոնին, Գևորգյանը հեռացավ ակումբի նախագահի պաշտոնից, նրա փոխարեն այդ պաշտոնը ստանձնեց «Նոա Հոլդինգի» մեկ այլ ներկայացուցիչ՝ Արմեն Ղազարյանը։ Մամուլի հաղորդագրության համաձայն՝ Ղազարյանի թեկնածությունը ձեռնտու է բոլոր կողմերին։

Սակայն Իտալիայում կատարվածը «Յուրդինգենի» երկրպագուների միակ մտահոգությունը չէր։ Նրանք նույնպես հանդես եկան բաներային ակցիայով․ «Մենք խաղալիք չենք»,- գրված էր քաղաքում փակցված և «Նոա Հոլդինգին» ուղղված պաստառի վրա։ Ամենայն հավանականությամբ, երկրպագուները մտահոգված են ակումբի հավանական անվանափոխությամբ։ Բանն այն է, որ նախկին երեք դեպքերում, երբ «Նոա Հոլդինգը» նոր ակումբ էր ձեռք բերում, փոխում էր անվանումը։ «Արցախն» ու «Լոկոմոտիվը» դարձան «Նոա», իսկ «Ռոբուր Սիենան»՝ ACN «Սիենա», որտեղ N-ը խորհրդանշում է «Նոան»։ Գերմանացիները, կարծես թե, համաձայն չեն, նույնիսկ աննշան փոփոխության, ինչպես դա եղավ իտալական թիմի պարագայում։ 

Առայժմ պարզ չէ՝ արդյոք «Յուրդինգենի» հետ կապված անվանափոխության ծրագրեր կան, թե ոչ։ Սակայն մի բան պարզ է․ Իտալիայի և Գերմանիայի ֆուտբոլային պես ավանդույթներ ունեցող երկրում պետք է ավելի զգույշ լինել։