Նախագահի հիմնավորումները ԸՕ-ի փոփոխությունների վերաբերյալ անհիմն են. Համազասպ Դանիելյան

«Նախագահը երեկ հայտարարություն է տարածել, որտեղ նշել է, որ չի ստորագրելու Ընտրական օրենսգրքի փոփոխությունը, ընդ որում՝ հիմնավորումներ է ներկայացրել, որոնք, իմ կարծիքով, անհիմն են և ոչ կառուցողական»:

Այսօր այս մասին ԱԺ-ում լրագրողների հետ զրույցում հայտարարեց ԱԺ «Իմ քայլը» խմբակցության պատգամավոր Համազասպ Դանիելյանը:

Նա նկատեց, որ Սահմանադրությունը նախատեսում է, որ եթե նախագահը չի ստորագրում, ապա Սահմանադրությունը նախատեսում է, որ 21 օր հետո ԱԺ նախագահը օրենքը ստորագրի, այն ուժի մեջ կմտնի, և հունիսի 20-ի արտահերթ ընտրությունները կկայանան այդ փոփոխությամբ: Հարցին՝ չե՞ն հետաձգվելու ընտրությունները, Համազասպ Դանիելյանն ասաց. «Մենք հենց դրա համար այդ բաղադրիչն առանձնացրեցինք, հաշվի առնելով այն հանգամանքը, քանի որ նման ռիսկ կար, որ նախագահը կարող է չստորագրել, որպեսզի բավարար ժամանակ լինի, որ այն ուժի մեջ մտնի: Մենք այդ մասը առանձնացրեցինք,  քանի որ դրա սահմանադրականությունը վիճարկելու հնարավորություն չէր լինի, եթե դիմեր ՍԴ, ընդհնարապես ուժի մեջ չէր մնա: Դա նաև վաղ արեցինք ավելի, որպեսզի քաղաքական ուժերը նախապես իմանային, թե ինչպես են  անցկացվելու ընտրությունները»:

Անդրադառնալով ՀՀ նախագահի հայտարարությունը և հիմնավորումներին՝ «Իմ քայլի» պատգամավորն ասաց. «Այնտեղ մի քանի կետեր կային, օրինակ՝ ասվում է, որ նախագիծն ընդունվել է միայն իշխող մեծամասնության կողմից: Նախագծի 4 համահեղինակներից երկուսը նախկինում ԲՀԿ-ի եւ «Լուսավոր Հայաստանի» ցուցակով անցած պատգամավորներ են: Պնդումը, թե միայն մեծամասնության կողմից է ընդունվել, սխալ է:  Ավելին՝ այս նախագիծը ստացել է զրո դեմ, զրո ձեռնպահ ձայներ, բոլորը կողմ են եղել:

Մյուս կետը, թե այս փոփոխությունները պետք է նախորդեին սահմանադրական փոփոխություններին, դեռ դեկտեմբերին առիթ եմ ունեցել անձամբ ՀՀ նախագահին ասելու, որ իրենց բոլոր մտահոգությունները պատրաստ ենք լսել և քննարկել: Մինչ այս պահը ստացել ենք ուղիղ զրո մտահոգություն ու դիտարկում:

Դիտարկումը, թե այս փոփոխությունները վտանգավոր են, քանի որ կուսակցական համակարգը կայացած չէ, և խորհրդարանական երկրի հետ կապված ռիսկեր է տեսնում նախագահը, ինձ մոտ զարմանք է առաջացնում, որովհետև ընդամենը 3 տարի առաջ, երբ նա ընդունում էր նախագահ դառնալու առաջարկը, հետո իր երդմնակալության ժամանակ իր խոսքի մի զգալի մասը նվիրել էր նրան, թե ինչ ճիշտ որոշում է կայացրել Սերժ Սարգսյանը խորհրդարանական կառավարման համակարգ ընտրելիս: Ես չեմ հիշում, որ որևէ մտահոգություն արտահայտած լինի խորհրդարանական համակարգի անցնելու հետ կապված»,- նշեց Դանիելյանը:

Անդրադառնալով Վենետիկի հանձնաժողովի մասին դիտարկմանը՝ «Իմ քայլ»-ի պատգամավորն ասաց, որ պետք է ծանոթանալ հանձնաժողովի կարծիքին.

«Նույն Վենետիկի հանձնաժողովի փաստաթղթերում շատ հստակորեն ֆիքսված է ժամկետների սահմանափակումը չփոխելու մասին, և չի կարող լինել պատրվակ ավելի լավ ընտրական կարգավորումներ ունենալու համար»:

Դանիելյանը շեշտեց, որ Սահմանադրությունը նախագահի համար նախատեսում է շատ սահմանափակ լիազորություններ, որոնց մեջ չի մտնում այն, ինչ տեղի ունեցավ 2 օր առաջ, երբ նախագահը սկսեց մեկնաբանել, թե ինքն ինչ մտահոգություն ունի օրենքի նախագծի հետ կապված. «Հստակ ֆիքսված է, որ եթե ԱԺ-ն ընդունում է օրենքներ, նախագահը այն ստորագրում է, եթե սահմանադրականության հետ կապված խնդիր է տեսնում, ուղարկում է ՍԴ, իսկ ակնհայտ է, որ Ընտրական օրենսգրքի այս նախագծի հետ կապված սահմանադրականության խնդիր չկա: Դա նաև արտացոլված է իր հայտարարությունում: Իսկ մեկնաբանություններ տալու լիազորություններ նախագահը չունի: Հավանաբար փորձում է դրանով հիմնավորել իր որոշումը: Եթե այս նախագիծն ավելի վաղ ստորագրվեր, օրինակ՝ հնարավորություն կտար, որ Ընտրական օրենսգրքի ավելի մեծ նախագիծը, փաթեթը, շատ ավելի վաղ ընդունենք: Ես բազմիցս ասել եմ, որ մենք նախատեսում էինք դա ապրիլի 13-ի լիագումար նիստին ընդունենք, բայց այս նախագծի ստորագրված չլինելը ստիպեց մեզ հետաձգել դա»: