Ռուսաստանը հետ է քաշում զորքերն Ուկրաինայի հետ սահմանից. ՆԱՏՕ-ն ողջունել է լարվածության թուլացումը

Նախորդ շաբաթ հայտնի դարձավ, որ ՌԴ Պաշտպանության նախարար Սերգեյ Շոյգուն որոշում էր կայացրել հետ քաշել ռուսական զորքերը Ուկրաինայի սահմանից:

Այս կապակցությամբ ՆԱՏՕ-ն այսօր ողջունել է լարվածության թուլացումը ռուս-ուկրաինական սահմանին՝ այն կապելով հենց ռուսական զորքերի հետ քաշման հետ: Այս մասին Բրյուսելում հայտարարել է ալյանսի գլխավոր քարտուղար Յենս Ստոլտենբերգը:

«Մենք տեսանք, որ լարվածության նվազում կա: Իհարկե, մենք ողջունում ենք դա: Այնուամենայնիվ, կշարունակենք ուշադիր հետևել իրավիճակին», - ասել է նա ՝ նշելով, որ «ՆԱՏՕ-ն անհանգստացած է վերջին շաբաթների ընթացքում ռուս-ուկրաիանականն սահմանին տեղի ունեցածով»:

Ստոլտենբերգի խոսքով ՝ դաշինքը շարունակելու է ամեն տեսակի աջակցություն ցուցաբերել Կիևին: «Մենք կշարունակենք օգնել Ուկրաինային արդիականացնել իր ուժերն ու ինստիտուտները, կշարունակենք գործնականում աջակցություն ցուցաբերել», - հավելել է նա:

Անցյալ հինգշաբթի Ռուսաստանի պաշտպանության նախարար Սերգեյ Շոյգուն որոշեց ավարտել ստուգիչ գործողությունները Հարավային և Արևմտյան ռազմական օկրուգներում, քանի որ բոլոր նախանշված նպատակները, ըստ նրա, իրագործված են: Նախարարը հանձնարարեց «Գլխավոր շտաբին, ռազմական շրջանների հրամանատարին և օդադեսանտային զորքերին պլանավորել և սկսել ապրիլի 23-ից զորքերի վերադարձը իրենց մշտական տեղակայման կետեր, կատարել մանրամասն վերլուծություն և ամփոփել զորքերի անակնկալ ստուգման արդյունքները»: Շոյգուն կարգադրել է մինչև մայիսի 1-ը վերադառնալ Ռուսաստանի հարավում զորավարժություններին մասնակցած զորքերին՝ իրենց մշտական տեղակայման վայրեր:

Վերջին օրերին արևմտյան երկրները բազմիցս մտահոգություն են հայտնել Ուկրաինայի սահմանի երկայնքով ռուսական ուժերի կուտակման մասին ուկրաինացի զինվորականների հայտարարությունների կապակցությամբ: Ապրիլի սկզբից ԱՄՆ-ը և եվրոպական երկրները, Բրիտանիան անհանգստություն են հայտնել, իսկ Գերմանիայի ու Ֆրանսիայի առաջնորդներ Անգելա Մերկելը և Էմանուել Մակրոնը կոչ են արել հետ կանչել ռուսական զորքերը:

Ինչպես ավելի վաղ հայտարարել էր Ռուսաստանի Դաշնության Նախագահի մամուլի քարտուղար Դմիտրի Պեսկովը, ռուսական զորքերի տեղաշարժը Ռուսաստանի տարածքով չպետք է անհանգստացնի այլ պետություններին, քանի որ դա նրանց ոչ մի կերպ չի սպառնում:

Եվրախորհրդարանում ելույթ ունենալով Ուկրաինայի Պաշտպանության նախարար Անդրեյ Տարանը հայտարել էր, որ ուկրաինական սահմանների երկայնքով կենտրոնացված է 110 հազար ռուսական զորք: Վաշինգտոնը հայտարարել է, որ զորքերի առավելագույն քանակը կենտրոնացած է սահմանի ռուսական կողմում 2014 թվականից ի վեր, երբ Ուկրաինայի արեւելքում զինված հակամարտության ամենասուր փուլն էր:

Ուկրաինայի նախագահ  Վլադիմիր Զելենսկին հայտարարել է, որ սահմանին զորքերի թվի կրճատումը «համամասնորեն նվազեցնում է լարվածությունը»: «Ուկրաինան միշտ զգոն է, բայց ողջունում է ռազմական ներկայությունը թուլացնելու և Դոնբասում իրավիճակը լիցքաթափելու ցանկացած քայլ: Ուկրաինան խաղաղություն է ցանկանում: Շնորհակալություն միջազգային գործընկերներին աջակցության համար», - գրել է նա Twitter- ում:

Զելենսկին ավելի վաղ Պուտինին առաջարկել էր Դոնբասի հարցով հանդիպել հակամարտության գոտու ցանկացած կետում: Վլադիմիր Պուտինը մերժել էր Ուկրաինայի նախագահի այս առաջարկը `նշելով, որ Զելենսկին պետք է քննարկի Ուկրաինայի արեւելքի ապագան բացառապես այսպես կոչված Լուգանսկի ու Դոնեցկի ինքնավար հանրապետությունների  ղեկավարների հետ: Իսկ ուկրաինա-ռուսական հարաբերությունների քննարկման համար, ըստ Պուտինի պատասխանի, ինքը պատրաստ է Մոսկվայում հյուրընկալել իր ուկրաինացի գործընկերոջը:

Այսպիսով, ՌԴ նախագահը մեկ անգամ ևս հասկացրել էր, որ այն ամենը, ինչ տեղի է ունենում Դոնբասում, Ուկրաինայի ներքին գործն է: Սա նշանակում է, որ Զeելենսկին երբեք չի հանդիպի Պուտինի հետ Դոնբասում, չնայած վերջին յոթ տարիներին Կրեմլն է հենց վերահսկում իրավիճակը Ուկրաինայի արեւելքում գտնվող ինքնահռչակ հանրապետություններում:

Վերջին երկու ամիսների ընթացքում Ուկրաինայի նախագահը ապարդյուն փորձեր էր անում շփվել իր ռուս գործընկերոջ հետ: Ըստ Զելենսկու, դեռ մարտ ամսին, Դոնբասում 4 զինծառայողների մահից հետո, նա Պուտինի հետ հեռախոսազրույցի հայտ էր ուղարկել: Բայց Կրեմլից արձագանք էր եղել: Դմիտրի Պեսկովը հերքել է ուկրաինական կողմի խնդրանքի բուն փաստը ՝ ակնարկելով, որ Զելենսկին պարզապես փորձում է այս փաստը շահարկել Ուկրաինայի արեւմտյան գործընկերների մոտ:

Պուտինի հետ հեռախոսազրույցի փոխարեն Զելենսկին  բախվել էր ուկրաինական պետության սահմանների մոտ ռուսական բանակի զորավարժություններին, որոնք, ըստ նրա, սահմանային իրավիճակը ապակայունացնելու փորձեր էին: