Հաղթելու շանսերը հավասար են․ հետաքրքիր փաստեր՝ Հայաստանի գավաթի եզրափակչին ընդառաջ

Մայիսի 15-ին Երևանի Վազգեն Սարգսյանի անվան Հանրապետական մարզադաշտում տեղի կունենա ֆուտբոլի Հայաստանի գավաթի եզրափակիչ հանդիպումը։ Պատվավոր գավաթը կվիճարկեն Երևանի «Արարատն» ու «Ալաշկերտը»։

Խաղի կարևորությունը

Գավաթակրի կոչումը, իհարկե, պատվաբեր է, սակայն խաղի կարևորությունը չի սահմանափակվում միայն գավաթակիր դառնալով։ Հայաստանի գավաթակիրն իրավունք է ստանալու ներկայացնել Հայաստանը ՈՒԵՖԱ-ի հիմնադրած նոր մրցաշարի՝ Կոնֆերենցիաների լիգայի 2021/22 մրցաշրջանի խաղարկությունում։

Ճիշտ է, երկու թիմերն էլ ներկա դրությամբ պայքարում են նաև Հայաստանի չեմպիոնի կոչման համար։ «Ալաշկերտն» այս պահին մեկ միավորով հետ է մնում առաջատար «Նոայից», իսկ «Արարատը» առաջին հորիզոնականից հետ է մնում երկու միավորով։ Սակայն երկու թիմերն էլ մեկ խաղ պակաս են անցկացրել «Նոայի» համեմատ, և, այսպես կոչված, կորցրած միավորներով հենց նրանք են առաջին հորիզոնականում։ Այնպես որ թիմերը նաև հնարավորություն ունեն «ոսկե դուբլ» գրանցելու և նվաճելու թե՛ չեմպիոնի, թե՛ գավաթակրի կոչումը։ Այդ դեպքում չեմպիոնին բաժին կհասնի Չեմպիոնների լիգայի որակավորման փուլի ուղեգիրը, իսկ Կոնֆերենցիաների լիգայի ուղեգիր կստանա առաջնությունում 4-րդ տեղը գրաված թիմը։

Պատմական ակնարկ

«Արարատը» Հայաստանի գավաթի խաղարկության պատմության մեջ եզրափակչում ամենաշատը հայտնված թիմերից մեկն է։ 7 անգամ հայկական ֆուտբոլի ամենահեղինակավոր ակումբը հայտնվել է եզրափակչում, ավելի շատ վճռորոշ խաղում եղել են միայն «Փյունիկը» (12 անգամ), «Միկան» և «Ուրարտուն» (8-ական անգամ)։ Սակայն «Արարատի» վերջին եզրափակիչը եղել է 13 տարի առաջ․ այդ ժամանակ Վարուժան Սուքիասյանի գլխավորությամբ հանդես եկող արարատցիները Իջևանի «Արնար» մարզադաշտում ուժեղ քամու և փոթորկի ուղեկցությամբ պարտության մատնեցին «Բանանցին» (ներկայումս՝ «Ուրարտու»)։ «Արարատը» նաև ամենաշատը գավաթը նվաճած թիմերից է։ Հայաստանի հնգակի գավաթակիրներն այդ ցուցանիշով զիջում են միայն «Փյունիկին» (8) և «Միկային» (6): Հիմնականում դա 1993-1995թթ․-ին ունեցած երեք անընդմեջ հաջողությունների շնորհիվ է։ «Արարատը» նախ երկու տարի անընդմեջ եզրափակչում հաղթեց Գյումրիի «Շիրակին», այնուհետև պարտության մատնեց Աբովյանի «Կոտայքին»։ Հատկանշական է, որ երեք խաղերում էլ «Արարատի» ավագի թևկապը կրում էր Հայաստանի հավաքականի նախկին պաշտպան Արամայիս Տոնոյանը։

Եվս մեկ անգամ էլ «Արարատը» գավաթակիր դարձավ 1997թ․-ին՝ նվազագույն հաշվով պարտության մատնելով «Փյունիկին»։

Ինչ վերաբերում է «Ալաշկերտին», ապա 2011թ․-ին հիմնադրված ակումբն առաջին անգամ գավաթի եզրափակիչ դուրս եկավ 2017/18 մրցաշրջանում նույն Վարուժան Սուքիասյանի գլխավորությամբ, սակայն լարված խաղում տիտղոսը զիջեց «Գանձասար-Կապանին»։ Խաղի հիմնական ժամանակն ավարտվել էր գոլազուրկ ոչ-ոքիով, լրացուցիչ ժամանակում Միհրան Մանասյանն առաջ մղեց «Ալաշկերտին», բայց հանդիպման ավարտից 4 րոպե առաջ թույլ տվեց մրցակցին հավասարեցնել հաշիվը, իսկ հետո 11 մետրանոցների հարվածաշարում պարտություն կրեց։

Բայց հաջորդ մրցաշրջանում, արդեն՝ Աբրահամ Խաշմանյանի գլխավորությամբ, «Ալաշկերտը» վերադարձավ եզրափակիչ և «Ուրարտուի» մարզադաշտում կայացած խաղում նվազագույն հաշվով հաղթանակ տարավ։

Հետաքրքիր փաստեր

Աբրահամ Խաշմանյանը, վերադառնալով «Ալաշկերտ», մոտ է թիմի հետ նորից գավաթակիր դառնալուն։ Հետաքրքիր է, որ 2019թ․-ին գավաթակիր դարձած «Ալաշկերտի» կազմում հանդես էին գալիս Հրայր Մկոյանը և Ուրոշ Նենանդովիչը, որոնք այժմ հանդես են գալիս «Արարատում» և շաբաթ օրը դաշտ դուրս կգան իրենց նախկին թիմի դեմ։ Իսկ «Լոռիի» դեմ եզրափակիչ խաղում հանդես եկած ֆուտբոլիստներից «Ալաշկերտում» մնացել են միայն 5-ը։

Հետաքրքիր է, որ Մկոյանը եղել է խաղադաշտում նաև 2008թ․-ի գավաթի խաղարկության եզրափակչում՝ հանդես գալով «Արարատի» կազմում։ Բայց Հրայրը միակ ֆուտբոլիստը չէ, որը յուրաքանչյուր թիմի կազմում դարձել է գավաթակիր։ «Ալաշկերտի» ավագ Արտակ Գրիգորյանը ևս 2008թ․-ին եղել է «Արարատի» կազմում, ճիշտ է, եզրափակիչ խաղում մնացել է պահեստայինների նստարանին, իսկ 2019թ․-ի կազմում նվաճել է գավաթն արդեն «Արարատի» կազմում։ 2008 և 2019թ․-ի եզրափակիչներին մասնակցել է նաև «Ալաշկերտի» պաշտպան Գագիկ Դաղբաշյանը․ 2008թ․-ին նա հանդես էր գալիս եզրափակչում «Արարատի» մրցակցի՝ «Բանանցի» կազմում, իսկ 2019թ․-ին գավաթակիր դարձավ «Ալաշկերտի» հետ։

Խաղին ընդառաջ

Թիմերը գավաթից առաջ իրենց վերջին հանդիպումն առաջնությունում անցկացրել են մայիսի 10-ին, ընդ որում՝ միմյանց դեմ․ արձանագրվեց գոլազուրկ ոչ-ոքի։ Թիմերի միջև երրորդ տուրի հանդիպումն էլ հետաձգվել էր, և տեղի է ունենալու մայիսի 25-ին։ Այսինքն՝ մեկ ամսվա մեջ «Արարատն» ու «Ալաշկերտը» հանդիպելու են միմյանց երեք անգամ։ Իսկ առաջնության ևս մեկ խաղում, որը տեղի էր ունեցել նոյեմբերի 20-ին, «Արարատը» հաղթել էր 2-1 հաշվով։ Եզրափակիչ խաղում երկու թիմերի հաղթելու հնարավորությունները գրեթե հավասար են։

Թե՛ «Ալաշկերտը», թե՛ «Արարատը» վճռորոշ խաղին մոտենում են առանց լուրջ կորուստների։ Այնպես որ եզրափակիչ խաղում թիմերն ունեն ամեն ինչ տպավորիչ ելույթ ունենալու և իրենց մրցանակների թիվը ևս մեկով ավելացնելու։