Բաքուն ինքնահաստատվում է ֆուտբոլի հաշվին. անպատժելիության հետևանքները

Ուրբաթ՝ հունիսի 11-ին, մեկնարկեց ֆուտբոլի Եվրոպայի առաջնությունը, որը պետք է դառնա ամառվա ֆուտբոլայի գլխավոր իրադարձությունը: Մրցաշարի առաջին օրերը լի են հետաքրքիր խաղերով և իրադարձություններով. բացման խաղում Իտալիան հրաշալի ֆուտբոլով հաղթեց Թուրքիային, նախօրեին Հոլանդիան և Ուկրաինան իսկական ֆուտբոլային ներկայացում ցույց տվեցին: Դանիա-Ֆինլանդիա հանդիպման ընթացքում դանիացի ֆուտբոլիստ Կրիստիան Էրիկսենի հետ պատահած միջադեպը, ընդհանրապես, ցնցեց ամբողջ աշխարհը: Էրիկսենի սիրտը խաղի ընթացքում կանգնեց, բժիշկները հենց խաղադաշտում կարողացան փրկել նրա կյանքը:

Եվրոպայի առաջնությունն իր վրա է սևեռել ամբողջ ֆուտբոլային հասարակության ուշադրությունը: Առավել ևս, որ ՈՒԵՖԱ-ն աննախադեպ որոշում էր կայացրել. Եվրոպայի առաջնությունների 60-ամյակի պատվին Եվրոպայի առաջնությունը որոշվել էր անցկացնել Եվրոպայի 12 տարբեր երկրների քաղաքներում: Համավարակի պատճառով առաջնությունը մի տարով հետաձգվեց, կորոնավիրուսն իր շտկումները մտցրեց նաև կազմակերպիչ երկրների ցանկում. Բելգիան և Իռլանդիան դուրս մնացին կազմակերպիչների ցուցակից: Փոխարենը, Բաքուն, որի ընտրությունը ի սկզբանե վիճելի էր, պահպանեց իր տեղն այդ ցանկում: Ադրբեջանի մայրաքաղաքում պետք է անցկացվեն խմբային փուլի երեք և փլեյ-օֆֆի՝ քառորդ եզրափակչի մեկ հանդիպում:

2020թ.-ին բռնկված Արցախյան պատերազմի ժամանակ ու դրան հաջորդած Ադրբեջանի ռազմական հանցագործությունները, հայ ռազմագերիներին մինչ օրս պահելը արժանի արձագանք չի ստացել միջազգային հանրության կողմից: Երկերեսանիության դրսևորման ամենացայտուն օրինակներից է 2022թ.-ի աշխարհի առաջնությունը Քաթարում անցկացնելու դեմ բողոքող երկրների վարքագիծը, որոնք մեղադրում են Քաթարի իշխանություններին մարզադաշտերի կառուցման ժամանակ արտերկրից ներգաղթած աշխատուժի ավելորդ շահագործման համար (շինարարության ժամանակ արդեն իսկ տասնյակ զոհեր կան): Մինչդեռ Ադրբեջանում մրցաշարի անցկացման հետ նույն երկրները ոչ մի խնդիր չեն տեսնում:

Ադրբեջանը երբեք չի թաքցրել ֆուտբոլը քաղաքականության հետ խառնելու իր մոլուցքը, սակայն ՈՒԵՖԱ-ն չի դադարեցնում խոշոր մրցաշարերն այդ երկրին վստահելու իր սովորությունը: Դաս չեղավ Հենրիխ Մխիթարյանի պատմությունը, որը չկարողացավ մեկնել Բաքու Եվրոպայի լիգայի եզրափակիչ հանդիպմանը մասնակցելու: Եվրոպայի առաջնությունն էլ բացառություն չէ. Ադրբեջանը շարունակում է ինքնահաստատվել հայերի (ու ոչ միայն) հաշվին, Եվրոպայի առաջնությունում էլ նման առիթներ գտնվեցին:

Հարցն այն է, որ ՈՒԵՖԱ-ն որոշել է լրագրողների հավատարմագրությունը հաստատել միայն կազմակերպիչ բոլոր երկրների հաստատումից հետո: Հավանաբար, այս մասին իմանալով, Բաքվում ուրախությունից ձեռքերն են շփել: Առաջին խոշոր սկանդալը եղավ ռուսաստանահայ մեկնաբան Նոբել Առուստամյանի հետ. ՈՒԵՖԱ-ն հրաժարվեց մեկնաբանին հավատարմագիր տալ Բաքվի արգելքի պատճառով: Այդ մասին հայտնի դարձավ մոտ մեկ ամիս անց, մեծ աղմուկ բարձրացավ, գործին խառնվեց Ռուսաստանի արտգործնախարարությունը, և հարցը, ի վերջո լուծվեց: Նոբելը այդ ամենի ավարտին գրեց, որ հարցը ոչ թե Ղարաբաղ այցելությունն է, այլ իր ազգությունը, քանի որ ինքը մի շարք մեկնաբանների է ճանաչում, որոնք եղել են Արցախում, բայց մերժում չեն ստացել:

Հավանաբար դրանից հետո Բաքվում հասկացան, որ ինչ-որ մի բան բաց են թողել, և արագորեն սկսեցին զբաղվել մյուս մեկնաբանների հարցով. ռուս հայտնի մեկնաբան Կոնստանտին Գենիչը, որն արդեն ստացել էր հավատարմագրի հաստատումը, հանկարծ իմացավ, որ Բաքուն արգելք է դրել: Հարցը նորից լուծում ստացավ աղմուկից հետո: Միխայիլ Մոսկավոսկին մեկնել էր Բաքու՝ Ուելս-Շվեյցարիա խաղը մեկնաբանելու, սակայն օդանավակայանում նրան թույլ չեն տվել մտնել քաղաք. Մոսակովսկին ստիպված նույն ինքնաթիռով վերադարձել է Մոսկվա:

Սակայն սա դեռ ամենը չէ: Բաքվում որոշել են, որ հայ լրագրողներն առհասարակ չպետք է հավատարմագիր ստանան Եվրոպայի առաջնության հանդիպումները տեղից լուսաբանելու համար: Հայաստանից դիմած լրագրողները հերթով, կարգով մերժում են ստանում ՈՒԵՖԱ-ից: Ընդ որում, սկզբում լրագրողները նամակ են ստանում ՈՒԵՖԱ-ից, որ իրենց հավատարմագիրը հաստատված է, սակայն դեռ պետք է անցնի կազմակերպիչ երկրների ստուգում, իսկ հետո հայտնում են, որ հավատարմագրման հայտը մերժված է: Հասկանալի է, թե որ երկրի արգելքի պատճառով:

Բաքուն շարունակում է խոչընդոտել պրոֆեսիոնալ լրագրողների աշխատանքը, ընդ որում, այդ լրագրողները Բաքվում աշխատելու մտադրություն, բնականաբար, չունեն, սակայն լրացուցիչ անգամ ինքնահաստատվելու հնարավորությունը Ադրբեջանում բաց չեն թողնում: ՈՒԵՖԱ-ն էլ իր հերթին հերթական անգամ աչք է փակում այդ ամենի վրա…

Հայաստանի ֆուտբոլի ֆեդերացիայի միջնորդությունից հետո հարցը, հնարավոր է, լուծում ստանա: ՀՖՖ-ից «Հայկական ժամանակին» հայտնեցին, որ հույս ունեն՝ հարցը շուտով տեղի կունենա: «Հայաստանի ֆուտբոլի ֆեդերացիան անթույլատրելի է համարում ազգային հողի վրա խտրականության դրսևորումը և դրա հետևանքով լրագրողների նկատմամբ սահմանափակումների կիրառումը: ՀՖՖ-ն արդեն դիմել է ՈՒԵՖԱ-ի համապատասխան մարմիններին՝ խնդրին լուծում տալու նպատակով»,- նշված է պատասխանի մեջ:

Սակայն փաստը մնում է փաստ. Բաքուն հերթական անգամ ձախողում է ֆուտբոլային մրցաշարի կազմակերպումը, իսկ եվրոպական ֆուտբոլի գլխավոր կառույցին դա ամենևին էլ չի հետաքրքրում: