Վարդևանյանը թվարկեց այն հիմքերը, ըստ որոնց՝ «Հայաստան» դաշինքը դիմել է ՍԴ

«Հայաստան» դաշինքի ներկայացուցիչ, պատգամավորի թեկնածու Արամ Վարդևանյանն այսօր 12 կետից բաղկացած դիմում է ներկայացրել Սահմանադրական դատարան հունիս 20-ի ընտրությունների արդյունքները անվավեր ճանաչելու վերաբերյալ:

Նրա խոսքով՝ ՍԴ-ն նշված դիմումը քննության առարկա է դարձնելու թե՛ քանակական խախտումների իմաստով քվեարկության օրվա վերաբերյալ, թե՛ որակական իմաստով, ինչը վերաբերելու է այն հարցերին, որոնք ներկայացվում են սկսած մայիսի 10-ից։ 

Վարդևանյանի խոսքով՝ Սահմանադրական դատարանի մասին սահմանադրական օրենքով առաջին անգամ է ՍԴ-ում ընտրությունների վերաբերյալ վեճը քննության առարկա դառնալու, մասնավորապես՝ օրենքն ընդունվել է 2018թ., և 2018թ. մինչ օրերս ընտրական վեճերով քննություն ՍԴ-ում չենք ունեցել։

«Այս անգամվա ընտրությունների վերաբերյալ Սահմանադրական արդարադատության մոդելը, կարծում եմ, լինելու է աննախադեպ: ՍԴ-ում ընտրության արդյունքները վիճարկում են մի քանի ուժեր: Նման ծավալով վիճարկում չեմ հիշում: ՍԴ մասին նոր օրենքով, որը ընդունվել է 2018-ին, առաջին անգամ է գործը քննվելու, և ՍԴ աշխատակազմը շատ պատրաստակամ է բոլոր ուժերի նկատմամբ և պատշաճ կերպով արձագանքում է յուրաքանչյուր հարցադրման»,- ասաց Վարդևանյանը:

Անցում կատարելով այն հիմքերին, ըստ որոնց՝ դաշինքը դիմել է Սահմանադրական դատարան՝ Արամ Վարդևանյանը նշեց, որ իրենց ներկայացրած նյութերի մեջ կան նաև տեսանյութեր:

«Ներկայացրել ենք 109 ընտրատեղամասի արդյունքների վերաբերյալ արդյունքների մեր վերլուծությունը, որը վերաբերում է շուրջ 88 հազար ձայնի: Մենք տեսել ենք, որ ընտրական տեղամասերում հրապարակված ցուցակներում չկան ստորագրություններ: Նժարի վրա դրված է 88 հազար ստորագրություն, բայց պարզվում է՝ այդքանից 4 հազարը բացակայում է»:

«Հայաստան» դաշինքի ներկայացուցիչը շեշտեց՝ այլ արտասովոր դեպքեր էլ կան:

«Ուսումնասիրությունների արդյունքում մենք արձանագրել ենք, որ եղել են դեպքեր, երբ տեղամասի համապատասխան ցուցակում մեկ տեղ, օրինակ, ստորագրել է Արամ Վարդևանյանը, ու այդ ցուցակում էլ ոչ մի ստորագրություն չկա, հետո էլի կա Արամ Վարդևանյանի ստորագրությունը և ևս էլի 5 հոգու: Այսինքն՝ հերիք չէ՝ նույն ցուցակից 2 հատ է եղել ընտրատեղամասում, նույն թղթի տվյալները տարբերվում են: Սա նույնպես այն փաստական տվյալներից մեկն է, որը ներկայացրել ենք»,- ասաց դաշինքի ներկայացուցիչը:

Վարդևանյանի խոսքով՝ ՍԴ ներկայացված դիմումում ներկայացրել են ևս մեկ հարց, որն ապրիլի 25-ից ի վեր եղել է իրավական համայնքի ուշադրության ու քննարկումների առարկան։ Խոսքը վարչապետի պաշտոնակատարի ինստիտուտի մասին է, երբ վերջինս հրաժարական է տալիս։

«Մենք մի պարզ շղթա ենք բացահայտել։ Ի վերջո, վարչապետի պաշտոնակատարի կարգավիճակը պահպանելը, ի հակադրումն իրավաբանական հանրության մեծամասնության կարծիքին, ըստ որի՝ երբ վարչապետը հրաժարական է տալիս, չի կարող մնալ պաշտոնակատար, մի նպատակ ուներ. չարաշահել վարչական ռեսուրսը։ Այս շղթան մենք հստակ կերպով բացահայտել ենք»,- ասաց նա։

Վարդևանյանը կրկին հիշեցրեց նաև զինվորների ընտրության կադրերը, որոնց տարածվել էին համացանցում՝ նշելով. 

«Նորմա՞լ է, որ ռազմական ոստիկանության ներկայացուցիչներն ընտրական տեղամասերում անհանգիստ դեմքով սպասում են զինծառայողներին: Նորմա՞լ է, երբ զինծառայողները քվեարկում են բաց, որ 3 թիվը երևա: Սրանք այն փաստական տվյալներն են, որոնք մենք ունենք: Եվ դա բոլորն են տեսել, այնպես չէ, որ մենք ինչ-որ նոր ու գաղտնի տեսանյութ ենք ներկայացնում: Այս փաստարկները կարո՞ղ են տպավորություն թողնել, որ զինվորները անկախ չեն քվեարկել, այո՛, կարող են»,- ասաց «Հայաստան» դաշինքի ներկայացուցիչը:

Խոսելով ընտրության օրը անձնագրերի չաշխատելու մասին՝ դաշինքի ներկայացուցիչը հայտնեց՝ 1 մլն 280 հազար ընտրողների պայմաններում 109 հազարի անձնագրեր չեն աշխատել։

«Այդ իրավիճակներից հատուկենտ բացառությունների հնարավորություն ԸՕ-ն ևս նախատեսում է, որ, ենթադրենք, անձնագիրը չի աշխատում, բայց նորմալ չէ, որ ընտրողների մոտ 10 տոկոսի մոտ անձնագիրը չի աշխատում»,- եզրափակեց նա:

Նշենք, որ ընտրությունների արդյունքները ՍԴ-ում վիճարկում են նաեւ «Զարթոնք» եւ «Հայոց հայրենիք» կուսակցությունները: