Ասլամազյանների պատկերասրահը տնօրենի 3-րդ նոր պաշտոնակատարն ունի. Գյումրիում կրքերը չեն հանդարտվում

Հուլիսի 8-ից Գյումրու «Մարիամ և Երանուհի Ասլամազյան քույրերի պատկերասրահում սկսված անժամկետ գործադուլը մինչ օրս ուժի մեջ է: Դռներն այցելուների առաջ փակ մնացին նաև հանգստյան օրերին:

Բայց պարզվում է, դրանք ինչ-որ մի պահի, այնուամենայնիվ բացվել են, ներս ընդունել տնօրենի, արդեն թվով 3-րդ պաշտոնակատարին:

Կարեն Բարսեղյանը 3-րդն է 1 օր այդ պաշտոնում աշխատած Գագիկ Մանուկյանից և 2.5 տարի պատկերասրահը որպես ժամանակավոր պաշտոնակատար ղեկավարած Միքայել Վարդպարոնյանից հետո:

Հիշեցնենք, որ հուլիսի 2-ին,  պատկերասրահի տնօրենի արդեն նախկին պաշտոնակատար Միքայել Վարդպարոնյանը հրաժարվել էր զբաղեցրած պաշտոնից այն բանից հետո, երբ պատկերասրահի աշխատակցուհիներից մեկն աշխատանքից ազատման դիմում էր ներկայացրել Գյումրու քաղաքապետարանի համապատասխան բաժին, ուր ավելի ուշ հրավիրվել էր նաև ինքը:

Աշխատանքից ազատված աշխատակիցը Գյումրու քաղաքապետ Սամվել Բալասանյանի մտերիմ ընկերոջ դուստրն է: Ավելի վաղ ՀԺ-ի հետ զրույցում Միքայել Վարդպարոնյանը նշել էր, որ այդ հանգամանքը կարևոր դերակատարություն ունի ստեղծված խնդրի մեջ:

Քաղաքապետարանի աշխատակազմի քարտուղարի պաշտոնակատար Կարեն Բադալյանը մեր հետ զրույցում ընդգծեց. չկա նման բան: «Էստեղ հարց չկա Բալասանյանի ընկերոջ աղջիկն է, թե չէ:  Անձի խնդիր չէ սա: Կա աշխատանքից ազատման դիմում, նաև կար տեղեկանք երկրորդ աշխատանքի առկայության մասին: Կայացվել է որոշում:

Բալասանյանն էս քաղաքում ապրած կյանք ունի, փորձ ունի, ճանապարհ է անցել: Քաղաքն էլ փոքր է, մեր խոսքով ասած՝ մի քիչ որ խորանանք մեկս մեկիս բարեկամ ենք: Անձնավորված բան չկա, զուտ աշխատանքային է»,-ասաց Բադալյանը:

Անկախ հանգամանքից, որ սահմանված ժամկետում Վարդպարոնյանը ևս մեկ դիմումով խնդրել էր իր աշխատանքից ազատման դիմումին ընթացք չտալ, և, ըստ իրեն, ներկայացրել է 2-րդ աշխատանքից ազատված լինելու մասին տեղեկանք, այնուամենայնիվ, ազատվել էր աշխատանքից: Այդ նոր տեղեկանքից, սակայն, քաղաքապետարանի պատասխանատուն տեղյակ չէր:

Այնուհետ հուլիսի 8-ին Գյումրու քաղաքապետարանն այդ պաշտոնում հարմար գտել և նշանակել էր Գյումրու գեղարվեստի ակադեմիայի ամբիոնի վարիչ Գագիկ Մանուկյանին, որին աշխատակազմը չէր ընդունել մեկ պատճառաբանությամբ. եթե Միքայել Վարդպարոնյանի ազատման հիմքում դրված էր երկրորդ աշխատանքի առկայությունը, ապա ինչ տրամաբանությամբ էր ակադեմիայի դասախոսը նշանակվել այդ նույն պաշտոնում:

Արդեն շաբաթ օրը Մանուկյանը ևս ազատվել է այդ պաշտոնից, որովհետև ըստ քաղաքապետարանի պատասխանատուի, պարզվել էր, որ Մանուկյանն ունի 2-րդ աշխատանք:

Այն, որ Գագիկ Մանուկյանն ուներ 2-րդ աշխատանք, հայտնի փաստ է. նա Գյումրու գեղարվեստի ակադեմիայի ամբիոնի վարիչն է: Բայց անկախ սրանից, քաղաքապետարանը փաստորեն պարզել էր այս հայտնի իրողությունն ու անմիջապես որոշել Մանուկյանին ազատել պատկերասրահի տնօրենի պաշտոնակատարի պաշտոնից:

Մարիամ և Երանուհի Ասլամազյան քույրերի պատկերասրահի ղեկը հուլիսի 10-ին հանձնվել է նկարիչ Կարեն Բարսեղյանին:

Ո՞վ է առաջարկել այս թեկնածությունը. Խոսակցությունների մակարդակում Շիրակի մարզպետի անունն է շրջանառվում: Քաղաքապետարանի աշխատակազմի ղեկավարի պաշտոնակատար Կարեն Բադալյանն ասում է՝ իրեն այս մասին ոչինչ հայտնի չէ:

«Ինքը դիմում է գրել հուլիսի 9-ին համայնքապետին աշխատանքի անցնելու կապակցությամբ, դիմումը մակագրվել է համապատասխան բաժին, որոշումը կայացվել է»,-ասաց Բադալյանը:

Այսօր պատկերասրահի աշխատակազմը քաղաքապետարանի համապատասխան բաժին է դիմել և խնդրել, որ տնօերենի պաշտոնակատարի պարտականությունները ստանձնի ոչ թե 3-րդ թեկնածուն, այլ իրենց ֆոնդապահը: «Բայց նշանակումն արդեն արված է, և կարծում եմ ոչ մի բան այս պահին էլ չի կարող լինել»,-տեղեկացրեց Բադալյանը:

Նման նշանակումները կատարվում են համայնքապետի, կոնկրետ դեպքում Սամվել Բալասանյանի որոշմամբ, ավագանին անելիք չունի, քանի որ  2019-ից կարգը փոխվել է, իսկ ՀՈԱԿ-ների տնօրենների և  թափու այլ հաստիքների մրցույթներ տևական ժամանակ է չեն հայտարարվել:

Որպես հետևանք, Գյումրիում պաշտոնակատարներ կան, որոնք առավել քան հիմնավոր ղեկավարներ ու տնօրեններ են, տարիներ շարուրնակ պաշտոնավարում են որպես պաշտոնակատարներ՝ տնօրենի ներկայացվածությամբ:

Պատասխանատուն չի հերքում, որ կա խնդիր, բայց մրցույթներ հայտարարելու մոտակա ժամկետ չի կարող նշել:  Ասում է դրանք չհայտարարելու և օբյեկտիվ, և սուբյեկտիվ պատճառներ կան:

Վաղը կաշխատի պատկերասրահը, թե ոչ, Բադալյանն ասել չի կարող, լույսը բացվի՝ կերևա:

Պատկերասրահի աշխատակից Գոհար Սմոյանն ասում է, լավ կլինի խնդիրները հարթվեն, իրենք էլ նորմալ աշխատեն, քանի որ ընթույլատրելի է ստեղծված իրավիճակը:  Եթե նախկին պաշտոնակատար Միքայել Վարդպարոնյանը որոշի իրավական հարթակում վիճարկել խնդիրը, կկանգնեն նրա կողքին այնքան, ինչքան պետք լինի, բայց այդ ժամանակամիջոցում պետք է պատկերասրահն աշխատի:

Վարդպարոնյանը ՀԺ-ի հետ զրույցում ասաց իրավաբանների հետ է խորհրդակցում, նպատակահարմարության պարագայում կդիմի դատարան:

Այս պահին Միքայել Վարդպարոնյանին պատկերասրահում ընդունման-հանձնման մասին ոչինչ չի ասվել: Նոր անձի նշանակման մասին հրամանը չի տեսել, պաշտոնական ծանուցում չի ստացել: Երբ տեղեկացնեն, կներկայանա, կկազմակերպեն գործընթացը:

Նոր նշանակված պաշտոնակատարի մասին, սակայն, հստակ ասելիք կա. «Կարենը նկարիչ է, լավ մարդ է, վատ մարդ չէ»:

Սամսոն Մատինյան