Նիկոլ Փաշինյանը պատասխանեց Ալիևին, բայց ոչ այնպես, ինչպես ուզում էին Բաքվում. «Կոմերսանտ»

Ռուսական «Կոմերսանտ»-ը ևս անդրադարձել է հայ-ադրբեջանական հակամարտության՝ վերջին օրերի զարգացումներին և երկրների առաջնորդների հայտարարություններին: Մեջբերելով Ալիևի վերջին հայտարարությունը՝ Սևանի, Երևանի ու Սյունիքի՝ իբր ադրբեջանական լինելու մասին, լրատվամիջոցը հիշեցրել է նախօրեին Կառավարության նիստում ՀՀ վարչապետի պաշտոնակատար Նիկոլ Փաշինյանի ելույթը, որը օրակարգում նախատեսված չէր, բայց, ըստ էության, անհրաժեշտ էր:

Նշվում է, որ Նիկոլ Փաշինյանը հինգշաբթի Կառավարության նիստում խորհրդարանական արտահերթ ընտրություններում հաղթելուց հետո հանդես եկավ իր առաջին ընդարձակ ելույթով:

«Նա փորձեց բառացիորեն նշել այն բոլոր մարտահրավերները, որոնց բախվել է երկիրը վերջին վեց ամիսների ընթացքում: Բացի այդ, պարոն Փաշինյանը հստակ ընդունեց Բաքվի մարտահրավերը՝ մտնելով «բառերի պատերազմի» մեջ:

Ըստ հոդվածի՝ Հայաստանի վարչապետի պաշտոնակատարը պատասխանեց ղարաբաղյան երկրորդ պատերազմի հետևանքներին վերաբերող բոլոր հարցերին և վստահեցրեց ընտրողներին, որ ազգային շահերի դավաճանության մասին խոսք չի լինի:

Ըստ ամենայնի՝ նման ելույթի խթանը Ադրբեջանի նախագահ Իլհամ Ալիևի խոսքերն էին, որը  Հայաստանի մայրաքաղաք Երևանը, Սևանա լիճը, ինչպես նաև Հայաստանի Սյունիքի մարզը կրկին անվանեց Ադրբեջանի պատմական տարածքներ և խոստացավ, որ վաղ թե ուշ ադրբեջանցիները կվերադառնան այնտեղ: Նման հռետորաբանությունը նորություն չէ, բայց այն միշտ առաջանում է հենց այն ժամանակ, երբ կողմերը մտադիր են բառերով վիրավորել միմյանց:

«Կոմերսանտ»-ը հիշեցնում է, որ Ալիևը նաև պնդում է՝ Երևանն իբր հրաժարվում է խաղաղության պայմանագիր ստորագրելուց և դրանով վերջ է տալիս հակամարտությանը: «Ոչ պաշտոնական ուղիներով տեղեկություն ենք ստացել, որ Հայաստանը պատրաստ չէ դրան: Կարծում եմ՝ սա մեծ սխալ կլինի: Ե՛վ պատերազմի նախօրեին, և՛ դրա ընթացքում հայկական կողմը մեծ սխալներ թույլ տվեց և ռազմական հանցագործություններ է թույլ տվել»,- ասել է Ադրբեջանի ղեկավարը՝ հստակ հրահրելով ՀՀ վարչապետին պատասխանել:

Նշվում է, որ Նիկոլ Փաշինյանը իսկապես պատասխանեց, բայց հստակ ոչ այնպես, ինչպես ուզում էին Բաքվում:

«Նա կողմ է արտահայտվել ԵԱՀԿ Մինսկի խմբի հովանու ներքո բանակցությունների վերսկսմանը, ինչը Ադրբեջանի ղեկավարությունը բացահայտ քննադատել է աշխատանքի արդյունքների բացակայության համար:

«Ադրբեջանը փորձում է տպավորություն ստեղծել, որ Հայաստանը դեմ է խաղաղությանը և խաղաղության մասին համաձայնագրին: Սակայն Հայաստանն արդեն մի քանի անգամ ողջունել է ապրիլի 13-ին ԵԱՀԿ Մինսկի խմբի համանախագահների հայտարարությունը: Հիշեցնեմ, որ ղարաբաղյան հակամարտությունը հիմնված է կողմերին հայտնի երեք սկզբունքների վրա. Ժողովուրդների ինքնորոշում, ուժի կամ ուժի սպառնալիքի բացառում, տարածքային ամբողջականություն»,- ասել է Նիկոլ Փաշինյանը: Եթե ավելացնենք դրան Ադրբեջանի սադրիչ հայտարարությունները, որոնք ուղղված են Հայաստանի տարածքային ամբողջականության դեմ, հասկանալի է դառնում, թե ով է խանգարում տարածաշրջանում կայունության և խաղաղության հաստատմանը:

Նիկոլ Փաշինյանի խոսքով՝ «չնայած միջազգային ասպարեզում իր խաղաղ հայտարարություններին՝ Ադրբեջանն ամեն ինչ անելու է՝ տարածաշրջանում խաղաղությունը կանխելու համար»: Նա նաև մեջբերեց իր հակառակորդների մարտավարությունը. «Ցույց տալ, որ Հայաստանը կամ Արցախը իբր դեմ են խաղաղությանը, դեմ են սահմանազատման և սահմանագծմանն գործընթացներին, և այդ ֆոնի վրա կեղծ հիմքեր ստեղծելու համար կառուցել ագրեսիվ քաղաքականություն»,- ասվում է հոդվածում:

Նշվում է, որ այս խոսքերը հնչել են ընդամենը մի քանի ժամ անց այն բանից հետո, երբ Բաքուն հայտարարել է Շուշիի շրջանում փոքր զինատեսակներից ադրբեջանական զինուժի գնդակոծման մասին: Նրանք իբր կրակել են ռուս խաղաղապահների կողմից վերահսկվող տարածքից, որտեղ, այնուամենայնիվ, մնում են հայկական զինված ստորաբաժանումները: Ավելի ուշ՝ հինգշաբթի օրը, հաղորդվել է մեկ այլ գնդակոծության մասին Քելբաջարի շրջանում:

Նիկոլ Փաշինյանը, հիշեցնելով վերջին ամիսներին հայ-ադրբեջանական սահմանին ունեցած զոհերի մասին, հրավիրել է ՀԱՊԿ-ում գործընկերների և ԵԱՀԿ Մինսկի խմբի համանախագահների ուշադրությունն այս փաստի վրա ու հավելել. «Ադրբեջանն է, որ դեմ է սահմանազատման և սահմանագծման աշխատանքներին, քանի որ նա հստակ կեղծ քարտեզներ է բերել՝ փորձելով արդարացնել իր զինված ուժերի ներկայությունը Հայաստանի ինքնիշխան տարածքի մի շարք մասերում»:

Լրատվականը հավելում է՝ վերջին սրացումը Երասխ գյուղում էր, որտեղ խորհրդային տարիներին կար երկաթգիծ, որը կապում էր Հայաստանը Ադրբեջանի և հետագայում Ռուսաստանի հետ: Այժմ նրանք փորձում են ապաշրջափակել այս ճանապարհը, բայց հուլիսի 14-ին Երևանը հայտարարել է փոխհրաձգության հետևանքով զինծառայողի մահվան մասին:

«Ադրբեջանի ղեկավարությունը կործանարար գործողությունների և հայտարարությունների փոխարեն պետք է լսի միջնորդների կոչերը և հստակ դիրքորոշում արտահայտի համանախագահների հայտարարության վերաբերյալ: Միանշանակ է, որ մենք անդրդվելիորեն ձգտելու ենք Արցախի ժողովրդի ինքնորոշման իրավունքի իրացմանը»,- ասել է ՀՀ ղեկավարը՝ հստակորեն խստացնելով իր հռետորաբանությունը: