Փառատոնը օգնելու է չթուլացնել կամքը. ովքեր են 2021-ի «Ոսկե Ծիրանի» հայտնի դեմքերը, և երբ կանցկացվի այն

Կինոյի հանդեպ տարիների սերն ու հիացմունքի շունչը նորից կզգացվի Երևանում: Այս տարի «Ոսկե ծիրան» 18-րդ միջազգային կինոփառատոնը կանցկացվի հոկտեմբերի 3-10-ը:

Կրթության, գիտության, մշակույթի և սպորտի նախարարի տեղակալ Արա Խզմալյանի կարծիքով՝ կինոփառատոնը գալիս է՝ հաստատելու կյանքի, մշակութային գործընթացների ու հանրային հարաբերությունների շարունակականությունը: Ըստ նրա՝ սա միայն ներքին բարոյահոգեբանական վիճակի հաղթահարման ակցիա չէ:

«Երկրորդ տարին է, որ, աննկարագրելի դժվարություններ հաղթահարելով, անցկացնում ենք փառատոնը: Ուրախ եմ, որ անկախ բոլոր օբյեկտիվ, պատմաքաղաքական խոչընդոտներից ու բարդություններից, մենք անցկացնում ենք փառատոնը և չենք ընդհատում մեր լավագույն միջազգային փառատոնի կյանքը և ընթացքը: Կարևոր է այս իրավիճակում, այս պայմաններում գտնել ուժ ու թույլ չտալ, որ կարևորագույն պրոցեսներն ավարտվեն»,- շեշտեց փոխնախարարն ու հիշեցրեց, որ համավարակի շրջանում դժվար է հրավիրել միջազգային ճանաչում ունեցող մարդկանց և ապահովել կենդանի շփում, որը նման պայմաններում գերազանցում է բուն փառատոնային խնդիրներն ու նպատակները:

Նրա խոսքով՝ տեղեկատվական շատ հարթակների գործունեության հետևանքով Հայաստանը երբեմն ընկալվում է որպես պատերազմական երկիր, իսկ միջազգային հյուրերի ներկայությունը միջոցառումների ժամանակ հնարավորություն է տալիս բեկել այդ պատկերացումն ու թույլ չտալ, որ միջազգային տեղեկատվական դաշտում Հայաստանը դիրքավորվի ու ներկայացվի որպես վտանգավոր, ռիսկերով լեցուն պատերազմական երկիր:

Ըստ Խզմալյանի՝ կինեմատոգրաֆի միջոցով օգնելու են հանրությանը, որ չթուլանան կամքն ու լավատեսությունը, հավատը դեպի պայծառ ապագան:  

Ոսկե Ծիրան 18-րդ կինոփառատոնը «Երևանյան պրեմիերաներ» ծրագրի շրջանակում հայ հանդիսատեսին կներկայացնի ֆիլմեր Կաննի, Բեռլինի և այլ միջազգային կինոփառատոներից: Մասնավորապես՝ Կաննից կցուցադրվեն Լեոս Կարաքսի «Անետ», Պաուլ Վերհուվենի «Բենեդետտա», Ասղար Ֆարհադիի «Հերոսը», Գասպար Նոյեի «Վորտեքս» ֆիլմերը:

ԿԳՄՍ փոխնախարարի խոսքով՝ փառատոնն ընդգրկել է այնպիսի ֆիլմացանկ, որն օգնելու է հասկանալ, թե տարբեր իրողություններում և պատմական շրջաններում ինչպես են տարբեր երկրներ հաղթահարել ճգնաժամերը: Բեռլինի միջազգային կինոփառատոնից կներկայացվեն Վիկտոր Կոսակովսկու «Գունդա», Մարիա Սփեթի «Պարոն Բախմանի դասարանը», Դընի Կոտեի «Սոցիալական հիգիենա» կինոնկարները: Կցուցադրվեն նաև այլ ֆիլմեր: 

Փառատոնի մեկնարկը կտրվի իսրայելցի մրցանակակիր, կինոռեժիսոր Նադավ Լապիդի «Ահեդի ծունկը» ֆիլմով:

«Ոսկե Ծիրանի» պատվավոր հյուրն է ամերիկացի նշանավոր սցենարիստ և ռեժիսոր Փոլ Շրեդերը: Վերջինս Մարտին Սկորսեզեի «Տաքսիստ», «Կատաղած ցուլը», «Քրիստոսի վերջին գայթակղությունը» ֆիլմերի սցենարիստը, «Ամերիկյան ժիգոլո», «Միսիմա, կյանքը 4 մասից», «Քահանայի օրագիրը» և 2 տասնյակ այլ ֆիլմերի ռեժիսորն է և 3 տասնյակ միջազգային կինոփառատոների դափնեկիր: Փառատոնի հյուրերից է հունգարացի թատրոնի և կինոյի ռեժիսոր, Կաննի, Լոկարնոյի և տասնյակ այլ հեղինակավոր կինոփառատոների դափնեկիր Կոռնել Մունդրուցոն: Պատվավոր հյուրերի ցանկում է նաև իսրայելցի կինոռեժիսոր, Բեռլինի Ոսկե արջի դափնեկիր (Հոմանիշներ, 2019), Կաննի կինոփառատոնի ժյուրիի հատուկ մրցանակակիր Նադավ Լապիդը:

Միջոցառման ղեկավարները շեշտեցին փառատոնի կարևորությունը երկրի վարկանիշի բարձրացման տեսանկյունից: