Գյումրիում ազդարարվեց «Թումո Հայաստան» ծրագրի մեկնարկը. բացվեց վերակառուցված կենտրոնը (լուսանկարներ)

Թումո ստեղծարար տեխնոլոգիաների կենտրոնը Գյումրիում այսօր հայտարարեց «Թումո Հայաստան. 5 տարի՝ 50 միլիոն դոլար» նախաձեռնության մասին, որի նպատակն է Թումոյի առաջատար կրթությունը հասանելի դարձնել Հայաստանի ու Արցախի բոլոր պատանիներին: Առաջիկա տարիներին նախատեսվում է մարզերի խոշոր քաղաքներում ունենալ տեխնոլոգիաներով հագեցած 16 Թումո կենտրոն, իսկ փոքր համայնքներում՝ 110 Թումո տուփ, որոնց միջոցով ծրագիրը հասանելի կդառնա 80 հազար պատանու ողջ երկրով մեկ:

«Շիրակում նախատեսվում է ունենալ Թումո տուփեր Արթիկ, Մարալիկ, Երազգավորս, Փանիկ, Ազատան, Ախուրյան, Աշոցք, Հացիկ, Ամասիա համայնքներում: Պետք է հպարտությամբ նշենք, որ Հայաստանում և Արցախում 20.000 ուսանող հիմա ունենք, ունենք գործող 4 կենտրոն և 2 տուփ: Իսկ ընդհանուր այս 10 տարվա մեջ Թումո փորձառություն անցած պատանիների թիվն անցել է 60.000-ից»,- Գյումրիում լրագրողների հետ զրույցում ասաց «Թումոյի» հաղորդակցության, միջոցառումների և հանրության հետ կապերի բաժնի ղեկավար Զառա Բուդաղյանը:

Նախաձեռնությանը միացած Եմենիջյան ընտանիքը նվիրաբերել է 10 միլիոն դոլար, որն օգտագործվելու է Վանաձորում, Կապանում, Կողբում Թումո կենտրոններ կառուցելու, ինչպես նաև դրանց և ներկայիս Թումո կենտրոններին կապված տուփեր տեղադրելու համար: Մնացյալ 40 միլիոն դոլարը հավաքելու նպատակով Թումոն հայտարարում է միջազգային դրամահավաք։ Հայկական բարեգործական ընդհանուր միությունը և Աքիլյանները յուրաքանչյուրը երաշխավորել է կրկնապատկել արշավի առաջին երկու տարիների ընթացքում հավաքված 10-ական միլիոն դոլարը։

Այսպիսով, 10 միլիոն դոլար մեկնարկային ներդրումով, 20 միլիոն դոլար դրամահավաքով և 20 միլիոն դոլար կրկնապատկումով նախաձեռնությունը մտնում է գործնական փուլ։

Թումոյի 10-ամյակի, Գյումրիում վերակառուցված կենտրոնի ներկայացմանը և մասնավորապես «Թումո Հայաստան» ծրագրի մեկնարկին նվիրված միջոցառմանը մասնակցեցին ՀՀ ԱԺ նախագահ Ալեն Սիմոնյանը, Կառավարության անդամները, տեղական ինքնակառավարման մարմինների ու Հայաստանում միջազգային կառույցների ներկայացուցիչները, ինչպես նաև Թումո կենտրոնի գործընկերները և այլք:

Թումո կենտրոններն ունեն բոլոր հարմարությունները կրթական ծրագրի կազմակերպման համար՝ ինքնուսուցում, դասընթացներ, ինչպես նաև աշխատարաններ միջազգային մասնագետների հետ: Թումո տուփերը տեխնիկապես հագեցած մինի թումոներ են, որոնք կարող են տեղադրվել ցանկացած փոքր բնակավայրում:

«Նոր շենք տեղափոխվելուց հետո ավելացել է Գյումրիի երիտասարդներ թիվը, որովհետև նախկինում ավելի փոքր տարածք ունեինք: Իսկ հիմա կարող ենք 2 անգամ ավելի ուսանողների գրանցել: Այդ թիվը նախատեսում է նաև ապագա տուփերի ուսանողներին:

Տուփերը կարող են ծառայել նաև որպես այլ կրթական ծրագրերի համար օջախներ: Պատրաստ ենք համագործակցել տարբեր կրթական հաստատությունների հետ, որոնք առաջարկ կանեն առավոտյան ժամերին ծրագրեր կազմակերպել այդտեղ»,- տեղեկացրեց Զառա Բուդաղյանը:

Թումո շենքի նոր նախագիծը, որի հեղինակն է ճարտարապետ Բեռնար Խուրին, բազմաթիվ հնարավորություններ է բացում ինչպես թումոցիների, այնպես էլ Գյումրիի բոլոր բնակիչների համար։ Այն կունենա դասասենյակներ, ձայնագրման ստուդիա, բացօթյա տեռաս միջոցառումների համար, կինոդահլիճ, որտեղ կկազմակերպվեն կինոցուցադրություններ ինչպես Թումոյի ուսանողների, այնպես էլ հանրության համար, ինքնուսուցման հարթակ, որը հնարավորություն կունենա բեմի վերածվելու եւ կապահովի թատրոնի մշակութային վերածնունդը։

Այսօր՝ ժամը 19:00-ին, Թումո Գյումրիի շենքի դիմաց կկայանա բացօթյա համերգ: Համերգի ընթացքում Հասմիկ Պապյանի կատարմամբ կհնչեն հատվածներ «Անուշ» օպերայից, որի պրեմիերան տեղի է ունեցել այդ նույն շենքի բեմում դեռևս 1912 թվականին: Օպերային կատարումներին կհաջորդի «Բամբիռ» խմբի ռոք համերգը:

Սամսոն Մատինյան