Հակակոռուպցիոն կոմիտեն ինչով է տարբերվում ՀՔԾ-ից, ինչ գործառույթ է իրականացնելու. մանրամասնում է ՀՔԾ-ի բաժնի պետը

Օրերս Կառավարության նիստի ժամանակ Սասուն Խաչատրյանն ազատվեց Հատուկ քննչական ծառայության պետի պաշտոնից և նշանակվեց Հակակոռուպցիոն կոմիտեի նախագահ։ Կառավարությունը կոմիտեի ստեղծմամբ նոր ձևաչափով է ձեռնամուխ լինում կոռուպցիայի դեմ պայքարին:

ՀՀ հատուկ քննչական ծառայության իրավական ապահովման բաժնի պետ Էմմա Ավագյանը ՀԺ-ի հետ զրույցում շեշտեց՝ կառույցն իր տեսակով լինելու է եզակի, քանի որ այն մասնագիտացված է լինելու բացառապես կոռուպցիոն բնույթի հանցագործությունների քննությամբ, ինչպես նաև իրականացնելու է օպերատիվ-հետախուզական գործունեություն։

ՀՔԾ իրավական ապահովման բաժնի պետն ընդգծեց՝ «Հակակոռուպցիոն կոմիտեի մասին» օրենքի՝ ամբողջությամբ ուժի մեջ մտնելուց հետո կոռուպցիոն ենթադրյալ հանցագործություններով քրեական գործերի նախաքննության իրականացումը վերապահվելու է բացառապես Հակակոռուպցիոն կոմիտեին։ Այսինքն՝ հետայսու կոռուպցիոն բնույթի հանցագործությունների վերաբերյալ յուրաքանչյուր քրեական գործի քննություն իրականացնելու է նորաստեղծ մարմնը։ Ավագյանի փոխանցմամբ՝ քննության որակի բարձրացման և պատշաճ մակարդակի ապահովման տեսանկյունից կարևոր է ընդգծել, որ նորաստեղծ մարմինը մեկտեղելու է նախաքննության և օպերատիվ-հետախուզական գործունեության իրականացումը:

«Կառույցի՝ միայն կոռուպցիոն բնույթի գործերով մասնագիտացված լինելու հանգամանքը միանշանակ նպաստելու է համակողմանի, լիարժեք քննություն ապահովելուն, ինչպես նաև քննչական գործողություների արագ ու օպերատիվ կազմակերպման գործընթացին։ Ըստ էության՝ սա լինելու է հատուկ մասնագիտացված եզակի քննչական մարմին՝ բացառապես կոռուպցիոն բնույթի հանցագործությունների քննության ուղղվածությամբ և օրենքով վերապահված վերոնշյալ գործիքակազմի շնորհիվ իրականացնելու է ավելի արդյունավետ թիրախային քննություն»։

Ինչ վերաբերում է ՀՔԾ-ի վարույթում գտնվող քրեական գործերի հետագա ճակատագրին, ապա կոռուպցիոն ենթադրյալ հանցագործություններով հարուցված քրեական գործերը, այդ թվում՝ նյութերը, կփոխանցվեն Հակակոռուպցիոն կոմիտե, իսկ այն գործերը, որոնք կոռուպցիոն բնույթի չեն, կփոխանցվեն, ըստ ենթակայության, քննչական այլ մարմիններ:

«Հակակոռուպցիոն կոմիտեի մասին» օրենքն ամբողջությամբ ուժի մեջ մտնելու պահից լուծարված է համարվելու Հատուկ քննչական ծառայությունը: Մեկամսյա ժամկետում Հակակոռուպցիոն կոմիտեի նախագահը պետք է հաստատի կառույցի կառուցվածքը, պաշտոնների անվանացանկը և հաստիքացուցակը: Դրանից հետո եռօրյա ժամկետում կոմիտեի նախագահը առաջարկ է ներկայացնելու ՀՔԾ-ում ինքնավար պաշտոններ զբաղեցնող անձանց՝ թափուր հաստիքները ժամանակավորապես համալրելու համար: Աշխատակիցներն էլ եռօրյա ժամկետում պետք է պատասխանեն՝ ընդունո՞ւմ են աշխատանքի առաջարկը, թե՞ ոչ:

Էմմա Ավագյանը նաև հայտնեց՝ Հակակոռուպցիոն կոմիտեի ինքնավար պաշտոնների ընտրության համար կարճ ժամկետներում ձևավորվելու է մրցութային հանձնաժողով: Հայտարարվելու է բաց մրցույթ, որին կարող են մասնակցել ինչպես մինչ այդ թափուր հաստիքները ժամանակավորապես համալրած աշխատակիցները, այնպես էլ յուրաքանչյուր ոք, ով համապատասխանում է օրենքով տվյալ պաշտոնի համար ներկայացվող պահանջներին:

Շենքային փոփոխություններ նույնպես սպասվում են: Ներկայում օպերատիվ բլոկը կաշխատի Մոսկովյան 1 հասցեում գտնվող մասնաշենքում, իսկ հետագայում նախատեսվում է, որ Հակակոռուպցիոն կոմիտեն ամբողջությամբ կտեղափոխվի Սիլիկյան 12 հասցեում կառուցվող վարչական շենք:

Նշենք, որ 2020-ին, Կառավարության որոշմամբ, 8 միլիարդ 203 միլիոն դրամ հատկացվեց Հակակոռուպցիոն կոմիտեին, որը նախատեսված է ծախսել 2021-2023 թվականներին, և որից մոտ 5,1 միլիարդը՝ աշխատավարձի, կոմունալ և գրասենյակային ծախսերի, ավելի քան 5 միլիարդը՝ շենքային պայմանների, 285,5 միլիոնը՝ տեխնիկական հագեցվածության, իսկ 192 միլիոն դրամն էլ՝ տրանսպորտային հագեցվածության համար։

Անյուտա Աթանեսյան