«Մաուգլի». Գյումրու դրամատիկականը բեմադրում է վերջին 20 տարվա ամենամասշտաբային ներկայացումը

70 դերասան՝ բեմում, կրկնակի աշխատակազմ՝ կուլիսներում: Գյումրու դրամատիկականը պատրաստվում է մեծ պրեմիերայի՝ շքեղ ու առանձնահատուկ: Բեմադրվում է վերջին 20 տարվա ամենամասշտաբային և ծախսատար ներկայացումը՝ «Մաուգլի»-ն:

Պատկերներն իրական են, բեմը կդառնա ջունգլի, գազանները կներկայանան այնպիսին, ինչպիսին բնության մեջ են: Դեկորների մեծ մասը պատրաստվում են Երևանում: Մասնագիտական հատուկ խումբ է այդ ամենով զբաղվում:

«Երկու ռեժիսորով ենք աշխատում, ներկայացման ձևավորումը Գարեգին Եվանգուլյանինն է, զգեստները՝ Լուսինե Խաչատրյանինը: Դեկորի բուտաֆորիան անում է Ռուսաստանի Դաշնությունից հրավիրված Մելսը, դիմակների բուտաֆորիան վստահվել է Տիգրան Աբգարյանին: Երևանում են պատրաստվում դիմակները, զգեստներն էլ են հիմնականում կարվում Երևանում: Բեմական շարժումը Արիկ Ասատուրյանին ենք վստահել. նա ևս հրավիրված մասնագետ է: Փորձել ենք հագուստների ձևավորման հարցում լինել շատ ճշմարիտ»,- ՀԺ-ի հետ զրույցում ասաց թատրոնի տնօրեն Լյուդվիգ Հարությունյանը:

13 մլն դրամից ավելի արդեն ծախսվել է: Դրամատիկականն այդ գումարը սեփական բյուջեից է վճարել: Հագուստների ամբողջ ֆինանսավորումը ԿԳՄՍ նախարարությունն է արել:

Տարիներ առաջ թատրոնի խաղացանկում եղել է «Մաուգլի»-ն Խորեն Աբրահամյանի բեմադրությամբ: «Լավն է եղել, ուզում ենք, որ այդպես էլ շարունակվի»,- անկեղծանում է Հարությունյանը:

«Մաուգլի»-ն մանկական ներկայացում չէ, նաև պատանի հանդիսատեսը կարող է դիտել: Հստակ ասելիքով են բեմ բարձրանալու: Այսօրեական շեշտադրումներն են շատ կարևոր ներկայացման մեջ:

«Ինչո՞ւ «Մաուգլի»-ն, որովհետև մեզ համար ջունգլիները փոխաբերական իմաստով են, մարդու ու բնության ներդաշնակության խախտումն է: Հերոսներից մեկն ասում է՝ ջունգլիներում գայլերը պարտվում են շեկ շներին: Մաուգլին ասում է՝ մենք չենք պարտվել շեկ շներին, եթե պարտվել ենք, դա ժամանակավոր է, եթե պարտվել ենք, նախ պետք է հասկանանք, թե ներսից ի՞նչ խնդիր ունեինք: Շատ այսօրեական շեշտադրումներ կան, որոնք, համոզված եմ, հանդիսատեսը կհասկանա, կհասկանա, թե ինչպիսի ենթաշերտերի մասին է խոսքը: Հանդիսատեսն ինքն իրեն կտեսնի այս ներկայացման մեջ, յուրաքանչյուրը կվերլուծի յուրովի: Մարդը երբ հեռանում է բնությունից, շատ կարևոր արժեքներ է կորցնում։ Ինչքան հնարավոր է, բնությանը մոտ պետք է լինես»,- վստահ է թատրոնի տնօրենը:

Ինչպե՞ս է հաջողվում Գյումրու դրամատիկականը զերծ պահել քաղաքականությունից: «Թատրոնում երբեք չպետք է զբաղվես քաղաքականությամբ, բայց իրավունք էլ չունես չմտածել քաղաքականության մասին»,- պատասխանում է թատրոնի տնօրենն ու շեշտում՝ թատրոնն իր վերաբերմունքը պետք է արտահայտի իր ներկայացումներով:

«Երկրում բավականին իրադարձություններ եղան, և թատրոնը հեռու է քաղաքականությունից, բայց թատրոնը զինվորի կողքին է եղել միշտ, բանակի կողքին է եղել, և պատերազմի օրերին մենք ներկայացումներն էինք խաղում հենց զինվորների համար: Իսկ ինչ վերաբերում է առհասարակ երկրում տիրող իրավիճակի վերաբերյալ ունեցած վերաբերմունքին, թատրոնը դա վերարտադրում է իր ներկայացումներով: Իմ կարծիքով, մեր հստակ վերաբերմունքը կհասկանաք՝ դիտելով «Մաուգլի»-ն: Կհասկանաք՝ ով է շերխանը, շատերը կհասկանան, թե ովքեր են շեկ շները, որոնց թվում է, թե ջունգլիները պարտվել են: Բայց կարծում եմ, որ ժամանակավոր է դա: Շատ խորիմաստ ներկայացում է: Այ էստեղ է թատրոնն արտահայտում իր մտահոգությունը։ Չի կարող չարտահայտվել, բայց իր լեզվով պետք է խոսի»,- ասում է Լյուդվիգը Հարությունյանը։

Առաջնախաղին կլինե՞ն հրավիրյալներ, օրինակ՝ մարդիկ, որոնք իրենց պետք է տեսնեն բեմում: Հարությունյանը կարծում է՝ ոչ թե կհրավիրեն, այլ իրենք կգան:

Ներկայացման վրա արդեն 8 ամիս աշխատում են: Արտակարգ դեպքերից խուսափել չեն կարողացել: Իրական ջունգլի վերարտադրելը տեխնիկական մասով լուրջ բարդություններ է առաջացնում:

«Հատուկ մասնագետներ են աշխատում, բայց հենց փորձի ժամանակ ունեցանք կոտրվածքներ: Գլխավոր դերակատար Սամվել Գրիգորյանը ոտքը կոտրեց և մինչև այս պահը դեռ ապաքինվում է, ու էդպես մի քանիսն ունեն խնդիր: Բեմական հնարքներ կան, որոնք իրականացվում են մասնագետների հսկողությամբ, որպեսզի նաև առողջական խնդիրներ ու ֆիզիկական վնասվածքներ չլինեն»,- ասում է նա։

Թատրոնի տնօրենը հույս ունի՝ «Մաուգլի»-ն մեծ հաջողություն է ունենալու, արդարացնելու է և՛ սպասումները, և՛ ծախսը:

«Երբեմն հարցնում են՝ արդյոք պե՞տք էր: Սա մեծ ռիսկ է, բայց ես կարծում եմ, որ պետք է լինի այդ ռիսկը, այդ համարձակությունը: Համարձակ պետք է լինես և՛ քո բեմադրաոճով, և՛ ասելիքով: Շատերը գուցե նաև չընկալեն մեզ․ ներկայացման մեջ շեշտադրումներ կան, շատերը կարող են վրդովվել: Մենք առաջ ենք նայում վստահ»,- եզրափակում է զրույցը Լյուդվիգ Հարությունյանը:

Սամսոն Մատինյան