Մենք հաճախ չենք նկատում ուրիշների խնդիրները. պոլսահայ երգչուհի Սիբիլը դարձել է City Of Smile-ի բարի կամքի դեսպան

Պոլսահայ երգչուհի Սիբիլը վերջին շրջանում ակտիվորեն մասնակցում է Հայաստանի մշակութային և հասարակական կյանքին, իսկ նրա նոր երգը՝ «Ավրորայի աղոթքը», որը աղոթք է Տիրամորը՝ բոլոր պատերազմներում որբացող անմեղ մանուկների համար, դարձել է յուրաքանչյուրիս սրտի աղոթքը:

Ավելին՝ օրեր առաջ երգչուհին դարձել է «City Of Smile/ Ժպիտների քաղաք» բարեգործական հիմնադրամի բարի կամքի դեսպանը: Սիբիլն այսուհետ առավել հաճախ կբարձրաձայնի քաղցկեղ և արյան հիվանդություններ ունեցող երեխաների, երիտասարդների խնդիրներն ու ձեռքբերումները։ Հիշեցնենք, որ բարեգործական հիմնադրամի առաքելությունն է օգնել քաղցկեղ ունեցող երեխաներին, երիտասարդներին և նրանց ընտանիքներին հիվանդությունը հաղթահարելու դժվարին ճանապարհին:

Երգչուհու հետ մեր զրույցը ներկայացնում ենք ստորև.

- Հարգելի Սիբիլ, Ստամբուլից մինչև «City Of Smile/ Ժպիտների քաղաք» հիմնադրամ տանող ճանապարհն ի՞նչ պատմություն ունի։

- Հայտնի իրողություն է, որ վերջին մեկուկես տարվա ընթացքում բոլորս շատ դժվար ու տխուր ժամանակներով անցանք: Համաճարակը անսպասելիորեն մեզանից շատ հարազատ ու մտերիմ մարդկանց խլեց, իսկ մենք առողջության արժեքավոր լինելը սկսեցինք ավելի լավ հասկանալ:

Մեր օրերում աշխարհում համարյա ամեն ինչի ճարը կա, բայց եթե քաղցկեղով հիվանդ կարիքավոր մարդիկ անհրաժեշտ բուժումները չեն ստանում, նրանց կյանքը վտանգվում է: Երբ համավարակի ընթացքում արգենտինահայ հաղորդավար Լեո Մումջյանն ինձ հրավիրել էր մասնակցելու առցանց համերգին, նրան առաջարկել էի համերգը բարեգործական նպատակի ծառայեցնել և ողջ հասույթն ուղղել քաղցկեղով տառապող երեխաների բուժմանը: Անշուշտ, տարիներ շարունակ լսել էի «City Of Smile/ Ժպիտների քաղաք» հիմնադրամի գործունեության մասին, սակայն «Միասին երեխաների հետ» առցանց համերգի շնորհիվ հիմնադրամի հետ մեր կապն ավելի ուժեղացավ:

Մյուս կողմից՝ Ստամբուլի Հրանտ Դինքի անվան դպրոցի հայաստանցի աշակերտուհի Հասմիկ Վարդերեսյանը նույնպես իր՝ «Հասմիկի հետ» էջում տեղեկացնում էր «City Of Smile/ Ժպիտների քաղաք» հիմնադրամի գործունեության մասին՝ պոլսահայերին հրավիրելով մասնակցել քաղցկեղով հիվանդ երեխաների բուժման համար կազմակերպվող դրամահավաքին: Յուրաքանչյուրի տարած աշխատանքը շատ կարևոր և արժեքավոր է, և այդ աշխատանքն է, որ բարի պատմություն է կերտում:

- Իբրև «Ժպիտների քաղաքի» բարի կամքի դեսպան՝ ո՞րն է ձեր ուղերձը հատկապես պոլսահայությանն ու աշխարհի հայությանը, նաև բոլոր նրանց, ովքեր կարող են օգնել, սակայն չեն լսել այդ՝ օգնություն կանչող մոր ձայնը։ Մինչդեռ դուք այդ ձայնն ամեն օր եք լսում և բարձրաձայնում։

- Իսկապես այս առաջարկն ինձ համար մեծ անակնկալ ու պատիվ է: Մեզանից շատերն ունեն հանգիստ և ապահով կյանք, և հաճախ առօրյա կյանքի մեջ չենք նկատում ուրիշների խնդիրները, նույնիսկ չենք մտածում այդ դժվարությունների մասին, բայց ցանկության դեպքում հնարավոր է տեսնել, լսել ու ձեռք մեկնել: Ամեն ինչի ճարը կա, սակայն հիվանդության ճարը պարտադիր կերպով այդ դեղերն ընդունելն է: Դժբախտաբար, քաղցկեղի բուժումը մեծ ֆինանսներ է պահանջում, մինչդեռ հիվանդ երեխաներն այս դեղերի շնորհիվ պիտի վերականգնվեն: Օգնության համար գումարի չափը կարևոր չէ, ամեն մի օգնություն վստահաբար պիտի հասնի իր հասցեատիրոջը: Եկեք միասնաբար մեր երեխաներին ժպիտ պարգևենք, թող բոլորն իրենց բուժումները ստանան ու առողջացած իրենց տները վերադառնան: Թող նրանց մայրիկների աչքերը արցունքոտ չմնան:

Հ.Գ. Ամբողջ աշխարհում և Հայաստանում հազարավոր երեխաներ պայքարում են քաղցկեղի դեմ։ Նրանցից ամեն մեկը ամեն վայրկյան հույս ունի, որ մի բարի ձեռք առանց երկար-բարակ մտածելու կօգնի իրենց թեթևացնել ֆինանսական բեռը։ Ժպիտ­­նե­­­րի քա­­ղաքի բնա­­կիչ­­նե­­­րը նրանք են՝ երե­­խաները, իսկ այդ ժպիտ­­նե­­­րի հե­­ղինակ­­նե­­­րը՝ մենք։ Երե­­խանե­­րը՝ հայ­­րե­­­նիքում, թե հայ­­րե­­­նիքից հե­­ռու, տա­­նը, թե ման­­կա­­­տանը, առողջ, թե հի­­վանդ, համավարակի, պատերազմի, թե խա­­ղաղու­­թյան օրերում եր­­ջա­­­նիկ լի­­նելու իրա­­վունք ու­նեն…

Հիմնադրամի գործունեության մասին առավել մանրամասն տեղեկություն կարող եք ստանալ https://cityofsmile.org/hy/ կայքում։

Լիլիթ Պողոսյան, Թուրքիա