«Ոսկե բանալի, ժանգոտ կողպեք» մրցանակաբաշխության ժամանակ Երեւանի քաղաքապետարանն արժանացել է «Ժանգոտ կողպեքի»

Այսօր՝ հոկտեմբերի 19-ին, «Ինֆորմացիայի ազատության կենտրոնի»՝ «Ոսկե բանալի, ժանգոտ կողպեք» ամենամյա մրցանակաբաշխության ժամանակ Երեւանի քաղաքապետարանը արժանացել է «Ժանգոտ կողպեքի»։

Այս մասին տեղեկանում ենք Երեւանի քաղաքապետարանի աշխատակազմի տեղեկատվության եւ հասարակայնության հետ կապերի վարչության տեղակալ Տարոն Գեւորգյանի ֆեյսբուքյան գրառումից։

Վերջինս նշել է, որ «Ինֆորմացիայի ազատության կենտրոնի» նման գնահատականն առնվազն սուբյեկտիվ եւ անձնական ամբիցիաների վրա է հիմնված:

«Որպես պատճառ բերվում է քաղաքաշինության ոլորտի վերաբերյալ արված մեկ, կրկնում եմ՝ մեկ հարցում, որին, ի դեպ, ինչպես և ԻԱԿ-ի մյուս հարցումներին, նույնպես ժամանակին պատասխանվել է (եթե դա հնարավոր չի եղել, օրենքի հղումով ծանուցել ենք 30-օրյա ժամկետում պատասխանելու մասին): Պետական գերատեսչության և լրատվամիջոցի համագործակցության և, ըստ այդմ, գործունեությունը որակելու հիմնական ցուցիչը այդ նույն պետական կառույցի լրատվության վարչության հետ աշխատանքն է, իսկ այս պարագայում ԻԱԿ-ի մեր գործընկերները առաջնորդվել են, հավանաբար, այլ չափորոշիչներով: Դատողությունները և հետևությունները թողնում ենք ձեզ»,- մանրամասնել է նա։

Գեւորգյանը նաեւ շեշտել է՝ Երեւանի քաղաքապետարանի և մասնավորապես աշխատակազմի լրատվության վարչության գործելաոճի կարևորագույն սկզբունքներից է ԶԼՄ-ների հետ բաց եւ թափանցիկ աշխատանքը՝ օրենքի տառին համապատասխան:

«Մենք փորձում ենք անել հնարավորինը, որպեսզի քաղաքապետարանի և վարչական շրջանների տարեկան ծրագրերի վերաբերյալ ոլորտային տեղեկատվությունը լինի հնարավորին օպերատիվ, հասանելի և մատչելի՝ այդ կերպ առավելագույնս նպաստել ԶԼՄ-ի կողմից արծարծվող թեմայի, խնդրի արագ լուսաբանմանը: Հաճախ դուք, հարգելի լրագրողներ, ինքներդ եք փաստում, որ քաղաքապետարան արված մեծ թվով հարցումների պատճառներից մեկը ժամանակին տրված մեր սպառիչ, անհրաժեշտության դեպքում՝ փաստաթղթային հիմնավորումներով ու օրենքների հղումներով պատասխաններն են: Դատելով ձեր գրավոր ու բանավոր արձագանքներից՝ մեր՝ ի դեմս Երևանի քաղաքապետարանի, և Ձեր՝ ի դեմս ԶԼՄ-ների ներկայացուցիչների, համագործակցությունը ստացված է»,- հավելել է նա:

Ավելի ուշ «Ինֆորմացիայի ազատության կենտրոնը» պարզաբանմամբ հանդես եկավ՝ նշելով՝  Երևանի քաղաքապետարանին տրվել է «ժանգոտ կողպեք» երկու հիմքով։ Ստորեւ ներկայացնում ենք այն․

«Առաջին դեպքում ԻԱԿ-ի հարցման ոդիսականն է, որի լիարժեք պատասխանը երեք ամիս շարունակ չի տրամադրում քաղաքապետարանը։ Մեր բազմաթիվ հարցումները, անգամ վարչական բողոքը, մնացել են անպատասխան այս կառույցի կողմից, կամ հարցումներին պատասխանները ներկայացվել են օրենքի խախտմամբ, այդ թվում՝ օրենքի սխալ կիրառմամբ կամ սխալ մեկնաբանման հետևանքով: Այսպիսի համառություն մենք երկար տարիներ ականատես չէինք եղել եւ ստիպված ենք այս կառույցին հանդիպել արդեն դատարանում։

Երկրորդ դեպքում՝ ավելի քան երկուսուկես տարի Ֆիզիկայի բանավանի բնակիչները փորձում են ստանալ անհրաժեշտ տեղեկատվություն իրենց շահերի պաշտպանության համար։ Քաղաքապետարանը բազմիցս խախտել է բնակիչների՝ տեղեկություն ստանալու իրավունքը, չի տրամադրել և կամ ուշացրել է կարևոր փաստաթղթերի տրամադրումը, չի տվել առարկայական ու կոնկրետ պատասխաններ նրանց հարցերին։

- Գիտավանի բնակիչները պատշաճ չեն տեղեկացվել հանրային լսումների մասին,

- Քաղաքացիները երկու անգամ 500 ստորագրությամբ ու անձնական տվյալներով նամակ են ուղարկել անձամբ քաղաքապետին, ուղիղ և ավագանու միջնորդությամբ հանդիպում են խնդրել քաղաքապետի հետ, առաջարկել են քննարկել խնդիրը, հրավիրել են բանավան․․․ Որևէ անգամ քաղաքապետը անձամբ չի պատասխանել քաղաքացիներին, որևէ արձագանք չի ստացել անձամբ հանդիպելու դիմումը, ոչ մի պատշաճ արձագանք չի եղել 500 քաղաքացիների պահանջին ու մտահոգությանը։

- Չեն տրամադրվել անհրաժեշտ Շինփաստաթղթերը
Արդյունքում թաղամասի բնակիչները զրկվել են օր առաջ նշված փաստաթղթերը դատական կարգով վիճարկելու և հայցի ապահովման միջոց կիրառելու հնարավորությունից։

ՏԱ ամենամյա մրցանակաբաշխության արդյունքները որոշվում են վաթսունից ավելի չափանիշների գնահատման հիման վրա։ Այս տարի ի լրումն, մենք հարցումներ ենք իրականացրել նաեւ յոթ տասնյակից ավելի լրագրողների եւ մեդիա կազմակերպությունների ներկայացուցիչների շրջանում՝ պարզելու նրանց կարծիքը բաց եւ փակ պետական կառույցների մասին։ Նշենք, որ գնահատման ժամանակաշրջանը ներառում է 2020թ. սեպտեմբերից մինչեւ այս տարվա սեպտեմբերը»: