Քաջատեղյակ եմ խնդիրներին, ունեմ ձիրք՝ դրանք լուծելու համար. «Ապրելու երկրի» Մարտունու համայնքապետի թեկնածու

Մարտունի խոշորացված համայնքում ՏԻՄ ընտրություններում առաջադրված «Ապրելու երկիր» կուսակցության նպատակն է հաղթել եւ ստեղծել ապրելու համայնք՝ ապրելու Մարտունի: «Հայկական ժամանակ»-ը նախընտրական խոստումների, ապագա ծրագրերի և այլ հարցերի շուրջ զրուցել է Մարտունիում կուսակցության համամասնական ցուցակը գլխավորող թեկնածուի՝ Արամ Մանուկյանի հետ:

- Պարոն Մանուկյան, ինչո՞ւ է «Ապրելու երկիր»-ը ՏԻՄ ընտրություններում առաջադրել հենց ձեր թեկնածությունը: Ինչպե՞ս եք գնահատում ձեր շանսերը:

- Մենք ճանաչել ենք իրար, եղել ենք մտերիմ և եկել ընդհանուր կոնսեսուսի, որ ես պիտի լինեմ: Միանշանակ յուրաքանչյուր գործողություն սկսելուց առաջ պետք է լինել մարտական և գնալ հաղթանակի: Թե ինչպես կլինի վերջում, ցույց կտան ընտրությունների արդյունքները:

- «Ապրելու երկրի» ձեր ավագանու համամասնական ցուցակում բոլոր գյուղերից չէ, որ ներկայացուցիչներ կան ներգրավված: Ինչո՞վ է սա պայմանավորված, եւ արդյոք խնդիր չի՞ առաջացնի քարոզարշավի ընթացքում ձեր ձայնը լսելի դարձնելու հարցում:

- Իհարկե, կարող է խնդիրներ առաջացնել, բայց ժամանակ չունեինք պատրաստվելու: Շատ արագ տեղի ունեցավ, եւ չկարողացանք պատշաճ ներկայացնել բոլոր համայնքները: Մենք ներկայացված ենք 12 համայնքում, 5 համայնքում ներկայացված չենք, բայց քանի որ մեզ մոտ ընդհանուր 19 բնակավայր է, դրանցից 2 բնակավայրը համայնքներին են միացված: Ստացվում է, որ ներկայացված չենք 7 բնակավայրում: Ամեն դեպքում, քարոզարշավը շատ մեծ կապ ունի: Հանդիպելու ենք բնակիչների հետ, ներկայացնելու ենք մեր ծրագրերը, վստահություն ենք ներշնչելու, որ մեզ հետ իրենք ունենալու են իսկապես ապրելու երկիր:

- Ավագանու համամասնական ցուցակն ի՞նչ տրամաբանությամբ է ձեւավորվել, ի՞նչ սկզբունքով եք առաջնորդվել ընտրություն կատարելիս:

- Քանի որ արդեն նշեցի՝ շատ քիչ ժամանակ ունեինք պատրաստվելու, ժամանակը թույլ չտվեց, որ հավուր պատշաճի բոլոր համայնքները ներկայացնենք ավագանիների միջոցով:  Բայց ընդհանուր առմամբ, եթե գնահատենք, թե ընտրված ավագանու թեկնածուներին ինչ սկզբունքով ենք որոշել, ապա հետեւյալն է՝ նախապատվությունը հիմնականում երիտասարդներին ենք տվել: Կանանց ենք նաեւ առաջնահերթություն տվել: Իսկ ամենակարեւորն այն է, որ այնպիսի մարդիկ են ընդգրկված, որոնք խնդիրներին ծանոթ են, ի վիճակի են պատասխանատվություն վերցնել իրենց վրա եւ դրանք կարգավորել:

- Իշխանության գալու պարագայում առաջնային ի՞նչ ծրագրեր եք իրագործելու:

- Համայնքը պետության հենասյուներից մեկն է, միանշանակ պետք է համայնքը զարգացնել, որ այն երկրի զարգացման հիմքը դառնա: Կան բազմաթիվ խնդիրներ, բայց առաջնահերթությունը տվել ենք այն հարցերի լուծմանը, որոնք հրատապ են՝ ներհամայնքային ճանապարհների վերանորոգում, մայթերի բարեկարգում, աղբահանության իրականացում, վերջինը ոչ բոլոր համայնքներում է առկա: Անչափ կարեւորում ենք ներհամայնքային տրանսպորտային ցանցի արդիականացումը: Մարդատար ավտոբուսների պատշաճ շահագործում, որպեսզի կարողանանք բոլոր համայնքները կապել կենտրոնի՝ Մարտունու հետ: Համայնքներ կան, որ այդ ցանցը ընդհանրապես չի գործում, դրանով ենք զբաղվելու, նաեւ երկարացնելու ենք երթուղու ժամերը՝ ներկայիս 15:00-ից հասցնենք մինչեւ 20:00-ն: 

- Պարոն Մանուկյան, համամասնական ընտրակարգով բացարձակ մեծամասնություն չլինելու պարագայում համայնքապետն ընտրվելու է կոալիցիոն տարբերակով: Նման արդյունքի դեպքում գնալո՞ւ եք համագործակցության ձեր մրցակից քաղաքական ուժերի հետ:

- Կարծում եմ՝ դեռ վաղ է այդ մասին խոսել, պիտի այդ իրավիճակը ունենանք, որ, ըստ դրա, անենք մեր քայլերը: Բայց ընդհանուր առմամբ մեր ուժն այնպիսին չէ, որ չկարողանա կամ չուզենա որեւէ մեկի հետ կոալիցիա կազմել: Բնականաբար, մենք կքննարկենք եւ կգանք ընդհանուր հայտարարի: Բայց այս պահին դեռ վաղ է ասել՝ ում հետ, ինչպես: Մենք դեռ նախընտրական փուլում ենք եւ մեր քարոզչությունն ենք իրականացնում:

- Մարտունի խոշորացված համայնքի բնակիչներն ինչո՞ւ պիտի ընտրեն հենց Ձեզ:

- Տեսեք, մենք նախ ներկայացրել ենք ծրագիրը, պիտի դա ուսումնասիրեն, տեսնեն, թե ինչ ենք ներկայացրել, ինչ խնդիրներ ենք առաջնային լուծման համար դիտարկել, հասկանան՝ ինչքանով է մեր ասածն իրենց համայնքների հետագա զարգացման համար կարեւոր: Երկրորդ շատ կարեւոր փաստը անձերն են, մարդիկ, որոնց մենք առաջադրել ենք: Եթե սկսենք առաջին համարից, այսինքն՝ ինձնից, ապա, գիտեք, որ ես մինչեւ այս եղել եմ Ձորագյուղ համայնքի ավագանու անդամ: Իմ աշխատանքով ապացուցել եմ, որ աշխատել եմ հանուն համայնքի, հանուն պետության: Քաջատեղյակ եմ բոլոր խնդիրներին, ունեմ կառավարչական ձիրք դրանք լուծելու համար: Կցանկանայի, որ առողջ քարոզարշավ տեղի ունենար, մրցակիցներին հաջողություն եմ ցանկանում, մեր երկրին էլ՝ խաղաղություն: Այս պահին շատ դժվար փուլում ենք գտնվում եւ ամեն կերպ պետք է նաեւ աջակից լինենք մեր բանակին, սահմանին կանգնած մեր տղաներին, որպեսզի նրանք զգան, որ իրենց թիկունքն ամուր է: