Գյումրիում տոնվեց Կամավորների միջազգային օրը. կայացավ «Տարվա կամավոր» մրցանակաբաշխությունը (լուսանկարներ)

Աշխատանք, որի վարձավճարը ժպիտն ու ջերմությունն է: Գյումրու «Երիտասարդական նախաձեռնությունների կենտրոն» ՀԿ-ն (YIC Gyumri) Հայաստանում «Erasmus+ երիտասարդություն» և «Եվրոպական համերաշխության կորպուս» ծրագրերի տեղեկատվական կենտրոնի, ՍԱԼՏՈ Արևելյան Եվրոպա և Կովկաս ռեսուրսային կենտրոնի հետ համատեղ այսօր տոնել է Կամավորների միջազգային օրը:

Մասնագիտությամբ սոցիալական աշխատող Ռիլիկան որպես կամավոր Գյումրի եկել է Էստոնիայից: Քաղաքը հատուկ է ընտրել, ասում է՝ այն աշխատանքը, որն իրականացնելու է, կապ ունի և՛ իր մասնագիտության, և՛ նախկին աշխատանքի հետ:

Եկել ու միանգամից գործի է անցել: «Հայկական ժամանակի» հետ զրույցում անկեղծանում է՝ անսահման շնորհակալ է Գյումրու «Երիտասարդական նախաձեռնությունների կենտրոն»-ից, քանի որ իրեն ինքնաբացահայտման հնարավորություն են տվել:

«Երբ վերադառնամ Էստոնիա, Գյումրուց կտանեմ ուրախությունն ու մարդկանց ջերմությունը: Էստոնիայում մարդիկ մի փոքր սառն են, հենց այդ ջերմությունն առաջին բանն է, որ տանելու եմ: Երբ վերադառնամ, ես լինելու եմ ավելի վառ, ավելի բարձր տրամադրություն եմ ունենալու: Եվ, իհարկե, բոլորին ասելու եմ, որ գան Հայաստան, գան Գյումրի, որովհետև սա հրաշալի վայր է»,- մեզ հետ զրույցում ասաց էստոնուհին:

Ռիլիկայի և մյուս կամավորների տոնն այսօր հետաքրքիր շեշտադրումներով է կազմակերպվել Գյումրիում: YIC Gyumri-ն 10 տարի շարունակ այս տոնի շրջանակներում կազմակերպվող մրցանակաբաշխությանը ներգրավել է միայն շիրակցի կամավորներին: 2021 թվականը, սակայն, եղավ բացառություն:

«Մրցանակաբաշխությունն այս տարի դարձրել ենք առավել հասանելի ու բաց: ՀՀ 8 մարզից թեկնածուներ են առաջադրվել: 50 հոգուց ընտրվել է 20 կամավոր, որոնք կարժանանան «Տարվա կամավոր» կոչմանը»,- ասաց Գյումրու «Երիտասարդական նախաձեռնությունների կենտրոն» ՀԿ նախագահ Արթուր Նաջարյանը:

Երևանաբնակ Մարիամ Մելքոնյանը Լոռիում գործող «Մաթեմիկ» ՀԿ-ի կամավորն է և մեկն այն 20-ից, որոնք արժանացան «Տարվա կամավոր» կոչմանը:

Մասնագիտությամբ Մարիամի կյանքում պատերազմը շատ բան է փոխել և առաջին միտքը, որ տվել է, կամավորական աշխատանքի փնտրտուքն է եղել. կամավոր-երևանաբնակ հեռավար դասեր է անցկացնում:

«Պատերազմը շատ բան փոխեց իմ կյանքում, և ես հասկացա, որ ուղղակի գնալ աշխատանքի և վերադառնալ տուն, ոչինչ չի նշանակում. այլ բան է պետք անել հանուն ապագայի:  Երակր ժամանակ փնտրում էի կամավորական աշխատանք և անպայման կրթական ոլորտում ու գտա «Մաթեմիկի էջը»:  Տեսա, որ կամավորներ են հավաքագրում, զանգեցի, միանգամից ինձ ներառեցին այդ գործում: Հիմա հեռավար դասեր եմ անցկացնում Լոռու գյուղերի երեխաների հետ»,- պատմեց Մարիամը:

Կամավորական աշխատանքից ստացած բավականությունը բառերով նկարագրել չի կարող Մարիամը, ասում է՝ դա ուրիշ ջերմություն է:

«Երբ ներդրում ես աշխատանք ու ժամանակ և ստանում երեխաների գոհունակությունն ու անկեղծ գնահատականը, երբ ասում են՝ ինչ լավ է, որ մեզ հետ եք, դա ամենամեծ գնահատականն է»,- ընդգծում է Մարիամը:  

«Տարվա կամավոր» մրցանակաբաշխությունից զատ, Գյումրիում հայ և վրացի կամավորները, որոնք Հայաստանում են Եվրոպական համերաշխության կորպուսի ծրագրով, վաղ առավոտից օգնել են գյումրեցի միայնակ տարեցներին, նրանց համար ուտելիք պատրաստել, տունն են մաքրել, լվացք արել:

Կամավորների մի խումբ էլ, ըստ Արթուր Նաջարյանի, աշխատել է Գյումրու գրադարաններից մեկի պահոցներում: Տարիներ շարունակ միմյանց վրա դարսված գրքերը տեսակավորվել, թարմացվել, կարգի են բերվել:

Գյումրիում Կամավորների միջազգային օրվա տոնակատարություն-միջոցառումներն այսքանով չեն սահմանափակվել: Հետաքրքիր օր են ունեցել 16-30 տարեկան գյումրեցիները, որոնք հանրային տրանսպորտից օգտվելու կարիք են ունեցել:

Քաղաքում տոնական հատուկ ավտոբուս է շրջել և տարիքային այդ խմբին տարել-հասցրել իր ցանկացած վայրը: Ավտոբուսում գտնված հայ և վրացի կամավորներն էլ և՛ իրենք են ներկայացել, և՛ իրենց աշխատանքն ու գործող եվրոպական ծրագրերն են հասանելի դարձրել երիտասարդներին:

«Մեր նպատակն է եղել յուրաքանչյուր կանգառում կանգնել, 16-30 տարեկաններին անվճար հասցնել իրենց ցանկացած վայրն ու ընթացքում ներկայացնել աշխատանքային պրակտիկա ապահովող կամավորական աշխատանքը, որն ամբողջովին անվճար է, ծախսերը հոգում է եվրոպական միությունը»,- ասաց Արթուր Նաջարյանը:

Սամսոն Մատինյան