Մեր կողմն իր օրակարգն է առաջ բերել, Թուրքիայի կողմն էլ՝ իր. Արշակյանը՝ հայ-թուրքական բանակցությունների մասին

Այսօր ՀՀ Ազգային ժողովում ԱԺ փոխխոսնակ Հակոբ Արշակյանը, լրագրողների հետ զրույցում անդրադառնալով քիչ առաջ խորհրդարանում տեղի ունեցած միջադեպին, որի ժամանակ փոխնախագահ Ռուբեն Ռուբինյանի և «Հայաստան» խմբակցության պատգամավորների միջև տեղի ունեցավ վիճաբանություն, նկատեց՝ խմբակցությունն ինչ եկել է ԱԺ, բանակցությունների մասին տարբեր կարծիքներ են շահարկում, թե ՀՀ իշխանությունների վարած քաղաքականությունը չի բխում երկրի շահերից:

Նշենք, որ ԱԺ փոխնախագահ Հակոբ Արշակյանն իր ելույթում անդրադարձել էր «ազդեցության գործակալի» մասին թեզերին: «Ես ուզում եմ ընդամենը մեր ընդդիմադիր գործընկերներին տեղեկացնել, որ մարդուն փորձել պիտակավորել հեղափոխության, կամ որևէ այլ ժամանակաշրջանում որևէ երկրում գտնվելը կապել ազդեցության գործակալության հետ, դա նույնն է, որ ինչ-որ մեկի ազգանունից ելնելով՝ նրան կապել գործակալ լինել-չլինելու հետ: Խնդրում եմ՝ ձեր շուրջը նայեք. ազգանունների մեջ կարող է հանկարծ կասկածելի ազգանուններ հայտնաբերեք»,- ասաց Արշակյանը՝ հավելելով, սակայն, որ, խորհուրդ չի տա, քանի որ դա սխալ գործելաոճ է:

Արշակյանի ելույթի ժամանակ տեղից արձագանքեց «Հայաստան» խմբակցության պատգամավոր Հռիփսիմե Ստամբուլյանը, սակայն նրա ձայնը լսելի չէր, և չհասկացվեց, թե պատգամավորն ինչ էր ասում: ԱԺ փոխնախագահ Ռուբեն Ռուբինյանն էլ նախազգուշացում հայտարարեց նրան՝ տեղից միջամտելու համար: «Ձեր ամբողջ խմբակցությանը կոչ եմ անում՝ հանգստացեք»,- ասաց Ռուբինյանը:

Ռուբինյանը և ընդդիմադիր պատգամավորները սկսեցին միմյանց փոխադարձ վիրավորանքներ հասցնել: Այդ ընթացքում նա հայտարարեց ընդմիջում:

«Նման դրսևորում եղավ նաև այսօր ԱԺ ելույթների ժամանակ, երբ Թուրքիայի հետ բանակցող Ռուբեն Ռուբինյանին պիտակավորեցին՝ որպես Թուրքիայի հետ ազդեցության գործակալ: Ռուբինյանը բավականին կոշտ արձագանքեց, իմ ելույթը հնարավոր չեղավ ավարտել: Ես ցանկանում էի ասել, որ չի կարելի որևէ պաշտոնյանի որևէ ժամանակահատվածում որևէ երկրում եղած լինելը զուգահեռել ոչ ուղղակի մեկնաբանություններով»,- ասաց Արշակյանը:

Նա նաև նկատեց՝ իր ելույթի ժամանակ ԱԺ դահլիճից լսվել է վիրավորանք նաև իր հասցեին:

Լրագրողների դիտարկմանը, որ տեղի են ունեցել բանակցություններ Հայաստանի և Թուրքիայի միջև, սակայն ընդամենը մի քանի տող հայտարարություն է եղել այդ մասին, հարցին՝ ի՞նչ են բանակցել կողմերը, ԱԺ փոխնախագահն ասաց. «Դա առաջին հանդիպումն էր բանախոսների, և նորմալ է, որ շատ ինֆորմացիա չկա։ Թուրքիայի հետ խոսելու մեր օրակարգը չի փոխվել։ Այն հետևյալն է՝ առանց նախապայմանների Թուրքիայի հետ սահմանները պիտի բացվեն և հաստատվեն նորմալ դիվանագիտական հարաբերություններ»։

Հարցին՝ որևէ պայմանավորվածություն ձեռք բերվե՞լ է, Արշակյանն ասաց. «Առաջին հանդիպումն է տեղի ունեցել, մարդիկ ծանոթացել են, մեր կողմն իր օրակարգն է առաջ բերել, Թուրքիայի կողմն էլ՝ իր օրակարգը: Տեղի է ունեցել քննարկում, որից հետո կողմերը գնացել են իրենց մայրաքաղաքներ՝ քննարկելու այդ օրակարգային հարցերը»:

Լրագրողից մեկի այն հարցին էլ՝ հայ-թուրքական հարաբերությունների ինչ-որ փուլում Թուրքիան մշտապես Հայոց ցեղասպանության վերաբերյալ նախապայման է առաջ քաշել և վիժեցրել բանակցությունների գործընթացը, ի՞նչ երաշխիք կա, որ նույնը չի կրկնվի, Արշակյանը պատասխանեց, որ, այո, վտանգներ կան։

«Նման ռիսկ կա, բայց հույս ունենք, որ, այնուամենայնիվ, միջազգային մեր գործընկերների հետ համագործակցության արդյունքում մեզ կհաջողվի արդյունքի հասնել։ Դուք գիտեք, որ ՌԴ միջնորդությամբ են տեղի ունենում այս հանդիպումներն ու բանակցությունները, և ՌԴ ԱԳՆ-ն նույնպես դրական է գնահատում այս քննարկման կառուցողական մթնոլորտը։ Հույս ունեմ, որ մեր միջազգային գործընկերների օգնությամբ կկարողանանք սահմանների բացման, դիվանագիտական հարաբերությունների հաստատման հարցերը լուծել»,- ասաց Արշակյանը։