«Խաղը», կամ ի՞նչ է պետք զոհաբերել հաջողության հասնելու ճանապարհին. ռուսական թատրոնում պրեմիերա էր

Արդյոք գոյություն ունի՞ կանանց ընկերություն. ի՞նչ է պետք զոհաբերել հաջողության հասնելու ճանապարհին, ի՞նչ է թաքնված շպարված ու խնամված կնոջ կերպարի տակ կուլիսներից այն կողմ, ի՞նչ է կատարվում նրա հոգում։ 

Երեւանի Կ. Ստանիսլավսկու անվան ռուսական դրամատիկական թատրոնի փոքր բեմում այսօր պրեմիերա էր։ Ներկայացումը կոչվում էր «Խաղը»։ Այն բեմադրել է թատրոնի դերասանուհի Ելենա Վարդանյանը: Սա, ի դեպ, դերասանուհու ռեժիսորական դեբյուտն էր: 

Մեկ ժամ տեւողությամբ ներկայացումը հումորային, ծիծաղաշարժ դրվագների եւ տխուր հույզերի համադրություն է։ Դերասաններ Լիլիա Մուկուչյանին, Լալիտա Բուկիանին ու Մանվել Խաչատրյանին հաջողվեց հանդիսատեսին հասցնել թուլացնող ծիծաղի եւ վայրկյանների ընթացքում «լրջացնել»՝ ստիպելով թախծել։ Խաղացին, պատմեցին, ասացին բաներ, որոնց մասին մենք հաճախ վախենում ենք բարձրաձայնել, նույնիսկ՝ մտածել։

Հանդիսատեսին «Խաղը» դուր եկավ։ 

«Հայկական ժամանակ»-ի հետ զրույցում ներկայացման ռեժիսոր Ելենա Վարդանյանն ասաց, որ չնայած սա իր առաջին բեմադրությունն էր, բայց լարվածություն գրեթե չուներ։ 

«Դեռ երկու տարի առաջ էինք ուզում այս ներկայացումն անել, բայց անընդհատ զբաղվածության պատճառով կարծես հետաձգվում էր։ Հունվարին բոլորովին պատահական դերասանուհի Լիլիա Մուկուչյանի հետ որոշեցինք, որ պիտի այն հիմա բեմադրենք, եւ ես պիտի զբաղվեմ բեմադրական աշխատանքով»,- ներկայացման ավարտից հետո մանրամասներ պատմեց Վարդանյանը։

Խոսելով հանրահայտ ամերիկյան դրամատուրգ Դոն Նիգրոյի պիեսն ընտրելու առանձնահատկության մասին՝ դերասանուհի-ռեժիսորն ասաց՝ Նիգրոյի գործերը մեծ ճանաչում են վայելում եւ չեն իջնում աշխարհի շատ թատրոնների բեմերից: Բացառություն չէ նաև ռուսական թատրոնը, որտեղ արդեն երկրորդ ներկայացումն է բեմադրվում՝ ըստ Դ. Նիգրոյի պիեսի։

«Մեր հիմնական նպատակն է այսօր աշխարհին, մարդկանց տալ դրական լիցքեր։ Հիմա աշխարհում ամեն ինչ այնքա՜ն տխուր է: Կարծում եմ՝ մեր՝ արտիստներիս, հիմնական դերն ու առաքելությունը մարդկանց ուրախացնելը, դժվարին ժամանակներում նրանց մի փոքր հոգսերից ու առօրյայից կտրելը պիտի լինի»,- ասաց Ելենա Վարդանյանը։  

Դերասան Մանվել Խաչատրյանն էլ «Հայկական ժամանակ»-ի հետ զրույցում հայտնեց, որ պիեսում իր կերպարը չի եղել, միայն անունն է եղել:

«Իմ կերպարն ավելացրել է ռեժիսորը, բայց այնքան հաջող գործ է ստացել, որ տպավորություն է, թե հենց հեղինակն է գրել»,- ասաց դերասանը: Խոսելով ներկայացման բուն ասելիքի մասին՝ Խաչատրյանն ասաց՝ պիեսն այն մասին Է, թե ինչքան դժվար է դերասանի կյանքը․ «Բեմից այն կողմ տպավորություն է, թե դերասանի մոտ ամեն ինչ հեշտ է ու թեթեւ, բայց այս ներկայացումը բացահայտում է դերասանների ներքին խոհանոցը, այն, թե իրականում ինչերի միջով են անցնում նրանք»։

Մանվել Խաչատրյանը նաեւ հայտնեց, որ փորձերը շատ հետաքրքիր են անցել, եւ որ սա իր մարմնավորած կերպարներից ամենաթեթեւ ու հիշարժանն է:

«Առաջարկը ստացել էի Ելենա Վարդանյանից եւ դերասանուհի Լիլիա Մուկուչյանից: Միջանցքում խոսում էին, մի փոքր կամուկացով մոտեցան ինձ՝ երեւի մտածելով, որ զբաղվածությունս շատ է, չեմ հասցնի: Միանգամից համաձայնեցի, որովհետեւ թեման հետաքրքրեց»,- անկեղծացավ դերասանը:

Դոն Նիգրոյի «Գորգոնները» պիեսի հիման վրա բեմադրված «Խաղը» ներկայացումը այսուհետ համալրում է ռուսական թատրոնի խաղացանկը: Ներկայացումը նախատեսված է 18 տարեկանից բարձր անձանց համար:

«Խաղը» ներկայացման բեմանկարիչը Արթուր Հարությունյանն է, խորեոգրաֆը՝ Նունե Կիրակոսյանը: Ներկայացումը հանդիսատեսը կարող է դիտել նաեւ մարտի 10-ին, 15 եւ 16-ին: