Տրանսպորտը բարելավելու, բուժոլորտը կարգի բերելու կարիք կա. ինչ խնդիրներ է համայնքներում արձանագրում պատգամավորը

8-րդ գումարման Ազգային ժողովի «Քաղաքացիական պայմանագիր» խմբակցության պատգամավոր, Ֆինանսավարկային եւ բյուջետային հարցերի մշտական հանձնաժողովի անդամ Արուսյակ Մանավազյանը տևական ժամանակ է, ինչ մարզային այցեր է կատարում՝ հասկանալու, թե համայնքներում առանցքային ինչ խնդիրներ կան, ինչ դժգոհություններ ունեն քաղաքացիները և ինչպես լուծել դրանք:

«Հայկական ժամանակի» հետ զրույցում պատգամավորն ասում է՝ հիմնականում այցելում է 44-օրյա պատերազմից հետո անհետ կորածների ընտանիքներին, այցերի ընթացքում զուգահեռ՝ հանդիպում նաև համայնքների բնակիչների ու համայնքապետերի հետ: Վերջինիս խոսքով՝ խնդիրները հիմնականում գյուղատնտեսական կամ ենթակառուցվածքային ոլորտներին են վերաբերում՝ մարզային ճանապարհներ, տրանսպորտ, ոռոգման համակարգեր և այլն:

«Շատ են հարցերն ու խնդիրները նաև գյուղատնտեսական վարկերի տրամադրման հետ կապված, որովհետև Կառավարությունը մշակում է հասանելի ու ճկուն ծրագրեր՝ կապված գյուղատնտեսության հետ, իսկ բանկային համակարգը, մեծ ռիսկեր տեսնելով, շատ ժամանակ մասնակի է հասանելի դարձնում այդ ծրագրերի իրագործումը գյուղացիների համար»,- ասում է նա:

Պատգամավորի փոխանցմամբ՝ բնակիչների հիմնական դժգոհությունը տրանսպորտի հետ է կապված, որը պիտի ապահովի ակտիվ կապը մարզկենտրոնի կամ մայրաքաղաքի հետ, սակայն շատ դեպքերում բնակիչները կանգնում են խնդրի առաջ երթուղին շահագործողի ոչ բարեխիղճ աշխատանքի պատճառով:

«Կառավարությունը արդեն որոշ մարզերում ներդրել է ցանցային տրանսպորտի մոդելը, որի արդյունավետությունը կտեսնենք ընթացքում: Խնդրահարույց է նաև գյուղերը իրար կապող ճանապարհների վիճակը: Վերջին տարիներին Կառավարությունը մեծ թափով վերանորոգում է միջպետական ճանապարհները, ու կան բազմաթիվ նախագծեր մարզային ճանապարհների մասով»,- շեշտում է Արուսյակ Մանավազյանը:

Հարցադրմանը՝ իսկ ի՞նչ իրավիճակ ունենք այս տարի գյուղատնտեսության հետ կապված, բերքատվությունը, մասնավորապես՝ ծիրանի, խաղողի, առա՞տ կլինի, պատգամավորը արձանագրում է՝ այն համայնքները, որտեղ հասցրել է լինել, ցրտահարության դեպքեր չեն արձանագրվել, և արդեն նկատելի է, որ ունենալու ենք առատ բերքատվություն, մասնավորապես՝ ծիրանի, խաղողի, սալորի, դեղձի և այլ մրգերի տեսակներից:

Անդրադառնալով մարզերում մշակութային կյանքի զարգացմանը՝ վերջինս նկատում է՝ հաշվի առնելով վերջին երկու տարիների դեպքերը՝ համավարակը, պատերազմը, սպորտային ու մշակութային կյանքը մնացել է հետին պլանում. «Սակայն այս տարի արդեն նկատելի է մեծ ակտիվություն և ոչ միայն պետական աջակցության մակարդակով»: Պատգամավորը հիշեցնում է, որ վերջին շրջանում Հայաստանի մի քանի մարզերում անց են կացվել վարչապետի գավաթի մրցաշարեր, որոնց հազարավոր մարդիկ են մասնակցել:

Անդրադառնալով հարցին, որ ՀՀ առողջապահության նախարարությունը բազմիցս հաղորդագրություններ է տարածում՝ նշելով՝ համայնքային բուժհաստատությունները վերազինվում են նոր տեխնիկայով, վերանորոգվում են պոլիկլինիկաները, արդյոք տեսանելի՞ են այդ փոփոխությունները, Մանավազյանը նշում է, որ այն մարզերում, որտեղ ինքը եղել է, փոփոխություններ չի նկատել դեռ:

«Մարզային պոլիկլինիկաները կարիք ունեն խիստ վերազինման ու վերանորոգման, իսկ բուժաշխատողները՝ պրոֆեսիոնալ վերապատրաստման: Մեծ են դժգոհություններն այդ ոլորտում պացիենտին ուշադրություն ու վերաբերմունք ցուցաբերելու հարցում, ինչը մոտեցման խնդիր է ու ոչ մի կապ չունի պրոֆեսիոնալ մասնագիտական պատրաստվածության ու տեխնիկայի հագեցվածության հետ»,- շեշտում է պատգամավորը:

Այցերի ընթացքում վերջինս հանդիպել է նաև մի շարք դպրոցների տնօրենների և անձնակազմերի հետ և արձանագրել՝ մարզերում որոշ դպրոցներ ունեն սեյսմիկ անվտանգության խնդիրներ, բայց Կառավարությունը, ըստ աստիճանի, մշակել է հիմնանորոգման հերթականությունը:

«Խնդիր կա նաև մասնագիտական լաբորատորիաների: Նեղ մասնագիտական առարկաների դասավանդման համար մեկ ուսուցիչը դասավանդում է նաև հարակից մյուս գյուղերում, ինչի համար ստանում է ճանապարհածախսի գումար, բայց կրկին գալիս ենք նույն խնդրին, որ տրանսպորտի համար ճանապարհածախսը հատկացվում է, իսկ գյուղերում գրեթե տրանսպորտ չկա: Կրթական ոլորտում այլ կարևորագույն խնդիր, որի մասին ասում են, ավագ դպրոցի հետ է կապված: Գյուղերում չկա կրթական մասնագիտական հոսք, որով աշակերտը կուղղորդվի հետագա մասնագիտություն ընտրելու հարցում»,- արձանագրում է զրուցակիցը:

Պատգամավորը նաև վստահեցնում է՝ բոլոր այն խնդիրները, որոնք արձանագրել է, դրանց վերաբերյալ Կառավարությունը մշակած նախաձեռնություններ ունի. «Դեռ շարունակական են լինելու իմ մարզային այցելությունները: Հիմա բյուջեի քննարկումներ են, ավարտից հետո կրկին մարզերում կլինեմ, և գուցե նոր խնդիրներ բարձրաձայնվեն, որոնք կունենան օրենսդրական լուծման անհրաժեշտություն»:

Անյուտա Աթանեսյան