Սեռական օրգաններ՝ ծածկված լավաշով. Սունդուկյան թատրոն բերվող ներկայացման պաստառը մեծ աղմուկ է բարձրացրել

Երեկվանից համացանցում տարածվում ու քննադատության է ենթարկվում Գ. Սունդուկյանի ազգային ակադեմիական թատրոնի պաստառներից մեկը, որում պատկերված են մերկ դերասաններ, եւ նրանց մարմնի որոշ հատվածներ ծածկված են լավաշով: Այն Ռուսաստանից Երեւան բերվող ներկայացման գովազդ է, պաստառում պատկերված անձինք էլ՝ դերասաններ՝ Եվգենի Բորոդենկոն, Նատալյա Եփրիկյանը, Եկատերինա Վորնավան ու Ալեքսանդր Գուդկովն են:

Հանրության հնչեցրած բազմաթիվ քննադատություններից ու դատապարտող մեկնաբանություններից հետո Սունդուկյան թատրոնը հայտարարություն տարածեց, սակայն հանգամանալից չմանրամասնելով, թե ի՞նչ ներկայացման մասին է խոսքը: Հայտարարության մեջ միայն նշված էր, որ ներկայացումը խաղացանկայինը չէ, տվյալ ներկայացման կազմակերպման շուրջ բանակցությունները չեն հասել պայմանագրի կնքման փուլին, հետեւաբար պաստառի էսքիզը չի ներկայացվել եւ չի ստացել թատրոնի համաձայնությունը։

Հատկանշական է, որ թատրոնի այս հայտարարությունը հանրությանն էլ ավելի է բորբոքել: Մարդիկ հարցադրումներ են անում՝ եթե նույնիսկ թատրոնի խաղացանկից չէ, ապա ինչո՞ւ են բեմ տրամադրել: «Բացատրեք այդ մարդկանց, որ հացը հայոց մեջ սրբություն է, լավաշը՝ առավել եւս: Իրենց «ստեղծագործական» նկրտումներն անընդունելի են»,- գրել է օգտատերերից մեկը:

Տեղի ունեցածի վերաբերյալ «Հայկական ժամանակ»-ը մեկնաբանություն խնդրեց Գ. Սունդուկյանի ազգային ակադեմիական թատրոնի տնօրեն Վարդան Մկրտչյանից: Վերջինս մեզ հայտնեց, որ պաստառն իրենք չեն տարածել, որեւէ կապ չունեն դրա ստեղծման հետ: Սակայն արդեն կապ են հաստատել ներկայացման պատասխանատուների հետ եւ ասել, որ հեռացնեն այն:

«Մի փոքր շտապել են պաստառը ստեղծելիս, որովհետեւ այն նույնպես պետք է մեզ հետ համաձայնեցնեին. գուցե չեն իմացել կամ կանոնները լավ չեն պատկերացրել: Մենք ասել ենք, նրանք ներողություն են խնդրել ու անմիջապես հանել: Եվ հիմա չեմ հասկանում այս ագրեսիայի իմաստը, հեռացնելուց հետո էլ արհեստականորեն շարունակում են տարածել»,-ասաց Մկրտչյանը:

Տնօրենը շեշտեց՝ այլեւս այդ պաստառը գոյություն չունի, եւ չի կարող նման պաստառով ներկայացումը տեղ ունենալ Սունդուկյան թատրոնում:

«Մենք դեռ իրենց հետ չունենք վերջնական պայմանագիր, որովհետեւ պայմանագիրը կնքվում է, երբ համաձայնեցվում են բոլոր կետերը: Այն, ինչ մենք գիտենք տվյալ ներկայացման մասին, լինելու է կատակերգություն, որտեղ ոչ մի արտառոց բան չկա: Պայմանագիրը դեռ չեն կնքել, քանի որ ներկայացուցիչն էլ առայժմ Երեւանում չէ»,- հավելեց նա:

Ռուսաստանից Երեւան բերվող ներկայացման եւ դրա աղմուկ հանած գովազդային պաստառի խորհրդի մասին զրուցեցինք նաեւ ներկայացման կազմակերպչական աշխատանքներով զբաղվող Աննա Թումանյանի հետ: Վերջինս մեր զրույցում հայտնեց՝ ներկայացումն այն մասին է, թե հատկապես ի՞նչ է կատարվում վերջին մի քանի ամիսներին Ռուսաստանից Երեւան եկած անձանց հետ, ինչերի միջով են նրանք այստեղ անցնում եւ ինչպես են իրենց առօրյան կազմակերպում: 90 րոպե տեւողությամբ ներկայացումը կոչվում է «Ընդհատակ անցնել Երեւանում»:

Հարցին՝ ի՞նչ խորհուրդ ունի պաստառին պատկերված կիսամերկ անձանց վրա հայկական լավաշը, Թումանյանը նշեց՝ ներկայացումը նաեւ այն մասին է, թե ինչպես են հայերն այստեղ՝ Հայաստանում, «թաքցրել» ռուսներին, իսկ այս դեպքում հայերին խորհրդանշողը գտել են՝ լավաշն է: «Այսինքն՝ կատարվող իրադարձությունների ֆոնին հայերը, որպես պաշտպան, լավաշով են ռուսներին փակել, թաքցրել խնդիրներից»,- ասաց նա:

Աննա Թումանյանը նաեւ ընդգծեց՝ որեւէ միտում չի եղել ինչ-որ մեկին վիրավորելու. «Գուցե ինչ-որ տեղ հայկականությունը խորհրդանշող տարրերի առումով չափից շատ ենք խորացել եւ ոչ տեղին ընտրություն կատարել: Պարզապես մեր շրջապատում որեւէ մեկի մտքով չի անցել, որ այդ քայլով կարող ենք վիրավորել ազգային նշանակություն ունեցող մի բան»:

Թումանյանի խոսքով՝ առաջին բացասական արձագանքները տեսնելով՝ անմիջապես բոլոր էջերից հեռացրել են գովազդային պաստառը, այժմ աշխատում են նորի վրա, որում, իհարկե, լավաշ այլեւս չի պատկերվելու:

Խոսելով «Ընդհատակ անցնել Երեւանում» ներկայացման մասին՝ Թումանյանը փոխանցեց՝ այն լինելու է խելահեղ թատերական ներկայացում՝ ինտրիգային սյուժեով, համարձակ հումորով «Comedy woman» կուլտային հեռուստաշոուի աստղերի մասնակցությամբ (Եկատերինա Վառնավա, Նատալյա Եփրիկյան, Ալեքսանդր Գուդկով եւ Եվգենի Բորոդենկո): Ներկայացման հատուկ հյուրն է լինելու Արսեն Գրիգորյանը:

«Ներկայացումը Հայաստանում լավագույնը փնտրող չորս «մոլորված մոսկովյան հոգիների» մասին է: Կլինի գունեղ էքստրավագանդ շոու՝ ոգեշնչված դասական փոփով եւ ժամանակակից սթենդափով: Կատակերգությունն ինքնահեգնանքի, կաբարեի, ինտերակտիվ խելահեղ միքս է, սպասվում է նաեւ հանդիսատեսի հետ տեղում իմպրովիզացիա»,- մանրամասնեց նա:

Թումանյանը նաեւ հավելեց՝ ներկայացումն ինչ-որ տեղ հայտարարություն-խոստովանություն է բոլոր այն հարցերի մասին, որոնց մարդը բախվել է անցած երեք տարիներին՝ համաճարակ, տնտեսական ճգնաժամ, «մշակույթի չեղարկում», նոր էթիկա, սեքսիզմ եւ ֆեմինիզմ: Հերոսները հեգնում են բոլոր կատակլիզմներն ու դիմանում, հեռուստադիտողին բեմում «տանելով» մե՛կ պլաստիկ վիրաբույժի կաբինետ, մե՛կ սահմանային հսկողություն եւ այլն:

Ազգագրագետ Հրանուշ Խառատյանի խոսքով էլ՝ այդ անձինք պաստառի վրա մե՞րկ են, թե՞ ներքնաշորով, լավաշը սիմվոլի՞կ է, թե՞ ոչ, դրանք հարցեր են, որոնց միանշանակ պատասխանելը բարդ է: «Կարող է սիմվոլիկան լինել, ու դա ընկալի հասարակությունը, բայց սկզբունքորեն կարծում եմ, որ պետական թատրոնում մերկությունն ինքին ցուցադրություն է ե՛ւ սիմֆոլիկ, ե՛ւ ֆիզիկական մարմնի»,- ասաց Խառատյանը:

Վերջինս ընդհանուր առմամբ ներկայացման սիմվոլիկայի հետ կապված որեւէ խնդիր չի տեսնում, բայց այն կարող էր այլ թատրոնում լինել:

«Թե հասարակությունն ինչպես է դրան վերաբերվում, դա այլ խնդիր է, եւ մյուս խնդիրը, այնուամենայնիվ, մերկության թեման է: Մերկությունն այսօր վաճառվող թեմա է, ու եթե Հայաստանում մենք 15-20 տարի լուռ հաշտվում ենք այդ վաճառքի հետ, ապա խնդիր է, թե ինչո՞ւ ենք այսօր դրան անդրադառնում»,- նկատեց Խառատյանը:

Ազգագրագետի դիտարկմամբ՝ մերկության թեման այսօր մեզանում քննարկումից դուրս է. «Ընդհանուր հոսքում մերկությունն այսօր կարծես թե հասկանալի է: Ստրիպտիզ ակումբներում մարդիկ կարող են գնալ ու գումարով մերկություն վայելել, եւ սա նորմալ ենք ընդունում, բայց հենց թատրոնին է բանը հասնում, սարքում ենք թեմա»: