Գալը՝ քեզնից, ջուրը՝ մեզնից. Գյումրին մեծ տոնի է պատրաստվում

Ջրցաններ՝ Վարդանանց հրապարակում, ջրով լցված ավազաններ քաղաքի այն հատվածներում, որոնցում կան դրանք: Այս կիրակի բոլորը հրավիրված են Գյումրի՝ Վարդավառը միասին տոնելու, ուրախանալու, լիցքաթափվելու:

Նրանք, ովքեր այս շաբաթ-կիրակին պլանավորում են անցկացնել իրենց բնակավայրից դուրս, Գյումրու համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը խորհուրդ է տալիս որպես ուղղություն առանց վարանելու ընտրել Գյումրին:

«Քաղաքի յուրաքանչյուր այցելու մեզ համար հատուկ հյուր է, և յուրաքանչյուր մարդ, ով ցանկություն ունի Վարդավառը նշել Գյումրիում, հատուկ հյուր կլինի, այնպես որ, բոլորին սիրով հրավիրում և սպասում ենք»,-«Հայկական ժամանակ»-ի հետ զրույցում ասաց Թովմասյանը:

Տոնը կմեկնարկի վաղ լուսաբացին՝ Թատերական հրապարակից: Նախ կլվացվեն քաղաքի արձանները, այնուհետ լվացված Գյումրին բարի լույս կասի բոլորին:

Տարվա ամենաջրառատ տոնը պաշտոնապես կսկսվի ժամը 13:00-ից՝ Վարդանանց հրապարակում: Մինչև 7 տարեկան երեխաների համար առանձնացված հատված կլինի: Կտեղադրվեն լողավազաններ:

Ջրով լցված կլինեն նաև «Մուշ» թաղամասի, Թատերական հրապարակի և Բագրատունյաց օղակի լողավազանները: Անսահմանափակ քանակությամբ ջուր կմատակարարեն նաև ջրցանները:

Տոնի ռիթմը սկզբից մինչև վերջ կապահովի DJ SMOKE-ը:

«Ֆորմալ իմաստով 2 ժամ է տրամադրված միջոցառման անցկացման համար, բայց, եթե ժամը 15:00-ից հետո էլ մեր համաքաղաքացիներն ու հյուրերն ուժ և ցանկություն ունեցան մնալ հրապարակում և շարունակել տոնը, կազմակերպիչները ևս կերկարացնեն այդ ժամանակահատվածը:

Նրանք, ովքեր կմոռանան դույլերը, համայնքապետարանը կտրամադրի, բայց հասկանալի է, որ աբոլորին այդ դույլ տրամադրելն ուղղակի անհնար է լինելու, ուստի ցանկալի է, որ սեփական դույլերով իջնեն հրապարակ»,-մանրամասնում է համայնքապետարանի մշակույթի և երիտասարդության հարցերի բաժնի պետը:

Տարածքում ծառայություն կիրականացնեն նաև ուժային կառույցների ներկայացուցիչները: Պատասխանատուն հույս ունի, որ բոլորը Վարդավառի տոնին կմասնակցեն բարձր տրամադրությամբ և առողջ բանականությամբ: Կպահպանեն բարեկրթության կանոնները, կլինեն զգուշավոր և ուշադիր հատկապես երեխաների նկատմամբ, չեն մտի նրանց համար տեղադրված լողավազանների մեջ, զերծ կմնան կոնֆլիկտային իրադրություններից:

«Խնդրում եմ բոլորին տոնականության մեջ չմոռանալ անվտանգության կանոնները և հարգել միմյանց, չկորցնել զգոնությունը: Միմյանց նկատմամբ շփման դրսևորումներում չմոռանալ, որ կան չգրված օրենքներ ևս, որոնք պետք է պահպանել: Լիահույս եմ, որ փոխըմբռնման մեջ կանցնի տոնը և մարդաշատությունը չի խաթարի ընթացքը»,-ասում է Լիլիթ Թովմասյանը:

Ինչու այս կերպ մեծամասշտաբ նշել Վարդավառը: Թովմասյանն ասում է՝ իհարկե, ոչ ինքնանպատակ: Զբոսաշրջային այն գերակտիվության մեջ, որն առկա է Գյումրիում տարվա այս ժամանակահատվածում, քաղաքի հյուրին կարող ենք զարմացնել մեր ազգայինն ընդգծելու այս հնարավորությամբ նաև:

«Կարող ենք ցույց տալ այն, ինչը զբոսաշրջիկը չի կարող տեսնել աշխարհի ոչ մի անկյունում: Բացի ընդունված պրոդուկտից, թանգարան, մշակութային միջոցառումներ և այլն, շատ կարևոր է, երբ կա ազգային ընդգծումը՝ ավանդական և ժողովրդական տոների ներկայացումը, ընդ որում դրանց պատշաճ ներկայացումը՝ հենց զբոսաշրջիկին դրանում ներգրավելով:

Սա է հիմնական պատճառը, որ որոշեցինք քաղաքի կենտրոնական հրապարակում ևս մեկ անգամ նշել Վարդավառը»,-մանրամասնեց Գյումրու համայնքապետարանի պատասխանատուն:

Անցկացվելիք միջոցառումներով պայմանավորված՝ հուլիսի 24-ին, ժամը՝ 08:00-16:00-ն, բոլոր տրանսպորտային միջոցների համար փակ կլինի Վարդանանց հրապարակը:

Այս տոնի կազմակերպման և անցկացման համար համայնքի բյուջեից տրամադրվել է 880.000 դրամ:

Հիշեցնենք, 2019-ին ևս Գյումրիում Վարդավառը նշվել էր մեծ շուքով: