«Սյունիքի թևը հասկացավ՝ ընդդիմությունն է ուզում, որ «Զանգեզուրի միջանցքը» տան, Ալիևի հետ սինխրոն աշխատում են. քաղաքագետ

Քաղաքագետ Էդվարդ Անտինյանի կարծիքով՝ քանի դեռ «Հայաստան» խմբակցության անդամների լիդերը Ռոբերտ Քոչարյանն է, չեն պառակտվի, կպառակտվեն, երբ հասկանան, որ ոչ մի ֆինանսավորում չունեն: Ըստ նրա, սակայն, պիտակ է ամբողջ կյանքի համար այն, ում լիդերը Ռոբերտ Քոչարյանն է: Նույնիսկ եկեղեցի գնալով՝ չի մաքրվի այդ պիտակը:

Անտինյանի նկատառմամբ՝ Վարդևանյանը դուրս գալիս շնորհակալություն է հայտնել Ռոբերտ Քոչարյանից, սրանից պարզ է դառնում, որ նա լիդերի հետ խնդիր չունի:

«Արամ Վարդևանյանը քաղաքականության մեջ պատահական մարդ էր: Իրեն թվում էր, թե իրավական գիտելիքները կարող է քաղաքականության մեջ էլ օգտագործել, բայց հասկացավ՝ իր տեղը չէ: Ընթացքում փորձեց մի քանի հայտարարություններ անել, օգնել Ռոբերտ Քոչարյանին, սակայն կասկածի տակ դրեց իր մասնագիտական կարողությունները»,- «Հայկական ժամանակ»-ի հետ զրույցում նկատում է քաղաքագետը:

Անդրադառնալով «Վերածնվող Հայաստան» կուսակցությունից Գրիգորյանի և Սարգսյանի դուրս գալուն՝ վերջինս նշում է՝ խմբակցության Սյունիքի թևը հայրենասիրական լոզուգներով էր եկել, սակայն սպասելիքները չէր արդարանում. «Սյունիքի թևը տեսնում է, որ հենց ընդդիմությունն է ամեն բան անում, որ իշխանությունները «Զանգեզուրի միջանցքը» «հանձնեն»: Մարդիկ հասկացան, որ ընդդիմությունը ջանք ու եռանդ չէր խնայում ու աշխատում էր Իլհամ Ալիևի հետ սինխրոն: Սակայն այդ ֆոնին մենք տեսնում ենք Իրանի, ԱՄՆ-ի վերաբերմունքը, իսկ այդ վերաբերմունքին հասել են իշխանությունները բանակցությունների շնորհիվ»:

Անտինյանը չի բացառում, որ Սյունիքի պատգամավորները միգուցե մանդատները վայր չդնեն, այլ դառնան անկախ պատգամավորներ: «Նրանք հնարավոր է՝ մտածում են, որ իրենց պատգամավոր դառնալու մեջ այդքան էլ Ռոբերտ Քոչարյանը ներդրում չի ունեցել և կարող են առանձնանալ»:

Հարցադրմանը՝ չի՞ կարծում, որ նշյալ պատգամավորները, ամեն դեպքում, կախում ունեն Քոչարյանից և միգուցե խուսափեն առանձնանալ, քաղաքագետը վստահ է՝ Ռոբերտ Քոչարյանից ոչ ոք չի վախենում: «Ռոբերտ Քոչարյանից վախենում էին այն ժամանակ, երբ իշխանության էր, քանի որ օգտագործում էր բոլոր հնարավոր լծակները: Տուր նրան պաշտոն, և նա ամեն բան կվերացնի: Իսկ քանի դեռ պաշտոն չունի, ով է Քոչարյանը, որ նրանից էլ վախենան»,- ասում է նա:

Խոսելով այն տեսակետների մասին, թե կա տարաձայնություն ՀՅԴ-ականների և քոչարյանականների միջև՝ զրուցակիցը ընդգծում է՝ եթե խոր անհամաձայնություններ լինեին, ՀՅԴ-ն կսկսեր առանձին հանդես գալ, ոչ թե «Հայաստան» խմբակցության անվան ներքո:

«ՀՅԴ-ն Ռոբերտ Քոչարյանի շնորհիվ է հայտնվել խորհրդարանում, եթե նրանք առանձին լինեին, այդ շանսը չէին ունենա և առաջիկա 500 տարում էլ չեն ունենալու: Իրենց անունը Քոչարյանի հետ կապելով՝ կուսակցության վարկանիշն ավելի գցեցին: Հիմա նրանց լավ կողմերն էլ չեն հիշվում: Քոչարյանի թևին էլ «նեղել» չեն կարող, որովհետև դա նույնն է, ինչ դուրս գաս հենց նրա դեմ: Եվ հակառակն էլ չի կարող լինել, որ Քոչարյանը փորձի ինչ-որ արգելքներ դնել ՀՅԴ-ի դիմաց, որովհետև ի սկզբանե նա նրանց խոսք է տվել, որ իշխանություն են դառնալու, իսկ խոստումը չի կարողացել պահել»,- ասում է քաղաքագետը:

Անտինյանը, անդրադառնալով ընդդիմության խորհրդարան վերադառնալուն, նկատում է՝ նպատակը մեկն է՝ բերել նախագիծ, որով ամրագրում են՝ Արցախը չի կարող լինել Ադրբեջանի կազմում, իշխանությունները չեն ընդունի նախագիծը, իրենք էլ կասեն՝ տեսեք, նրանք ցանկանում են՝ Արցախը Ադրբեջանի մաս դառնա:

«ՀՀ իշխանությունները իրավունք չունեն այդ հարցին խառնվել, արցախցին դա պետք է որոշի: Բացի այդ, ասում են՝ բանակցությունները պետք է շարունակվեն, չի կարել զրոյական կետից սկսել, բայց 2007-ին Ռոբերտ Քոչարյանը ընդունում է Մադրիդյան փաստաթուղթը, որում ասվում է, որ Լեռնային Ղարաբաղի բնակչություն ասելով՝ հասկանում ենք ԼՂԻՄ-ը, այսինքն՝ դրա մեջ չեն մտնում Շահումյանն ու Գետաշենը: Նշանակում է 1991 թվականի հռչակագրից, որի հեղինակը Ռոբերտ Քոչարյանն է, հրաժարվել: Սա արդեն դավաճանություն է, ոչ թե անգրագիտություն: Պետք է ընդդիմադիր պատգամավորներին հարց տալ՝ ո՞վ է Մադրիդում հրաժարվել ԼՂԻՄ-ից, բա հիմա ի՞նչ հայտարարություններ եք անում: Ադրբեջանն էլ ասելու է՝ Հայաստանը ճնշում է Արցախին»,- կարծում է նա: