Ցուցադրել է իր և Քիմի ինտիմ լուսանկարները. Ուեսթի շուրջ նոր սկանդալի ֆոնին նա պաշտոնապես սկսել է նախագահական քարոզարշավը

Ամերիկացի ռեփեր Քանյե Ուեսթը, որը վերջերս պաշտոնապես փոխել է իր անունը և ներկայանում է որպես Յե, հայտարարել է նախագահական իր քարոզարշավի մեկնարկի մասին։ Ուեսթն ասել է, որ ցանկանում է առաջադրվել Դոնալդ Թրամփի հետ միասին և խոստովանել, որ Թրամփն ապշել է իր առաջարկից: 

Այս ամենը տեղի է ունենում մի շարք սկանդալների ֆոնին, որոնցից ամենավերջինը պնդումներն էին այն մասին, թե Ուեսթը ոչ ադեկվատ է վարվել «Ադիդաս»-ի հետ իր համատեղ ձեռնարկության աշխատակիցների նկատմամբ, այդ թվում՝ ցուցադրելով նրանց անպարկեշտ լուսանկարները: 

ԱՄՆ նախագահական ընտրություններին մասնակցելու մտադրության մասին Ուեսթը հայտարարել էր նախորդ նախագահական ընտրություններում պարտվելուց անմիջապես հետո, որին նա նույնպես մասնակցել էր՝ հավաքելով մոտ 60 հազար ձայն 160 միլիոն ընտրողից։ 

Այժմ ռեփերը ակտիվ քարոզարշավ է սկսել, իր նախընտրական լոգոն տեղադրել «Թվիթեր»-ում, իսկ մի քանի օր առաջ էլ հայտարարել էր՝ վարձել է ազդեցիկ ալտ-աջ բլոգեր Միլո Յանոպուլիսին՝ որպես իր նախընտրական շտաբի ղեկավար։

2 օր առաջ Ուեսթը հանդիպել էր անձամբ Դոնալդ Թրամփի հետ նախկին նախագահի՝ Մար-ա-Լագոյի գոլֆի ակումբում, որտեղ նա ճանապարհորդել էր սպիտակամորթ ազգայնական ակտիվիստ Նիկ Ֆուենտեսի հետ։ 

Թրամփի հետ հանդիպումից հետո Ուեսթը հրապարակել էր մի շարք տեսանյութեր, որտեղ նկարագրում է հանդիպումը։ Ըստ Ուեսթի՝ մի պահ Թրամփը «բղավել է նրա վրա, որ կպարտվի» և նրա նախկին կնոջը՝ Քիմ Քարդաշյանին, անպարկեշտ բառեր ուղղել։

BBC-ն գրում է, որ Ռեփերի արշավը սկսելու պահը դժվար թե կարելի է հաջողված անվանել։ Ուրբաթ օրը սպորտային հագուստի խոշոր արտադրող «Ադիդաս»-ը հայտարարել էր, որ ներքին հետաքննություն է անցկացնում Ուեսթի նկատմամբ: Ռեփերը մինչև վերջերս համագործակցում էր ընկերության հետ՝ թողարկելով իր հայտնի սպորտային կոշիկները Yeezy ապրանքանիշի ներքո։

Հետաքննությունը սկսվել է Rolling Stone ամսագրի հոդվածից հետո, որտեղ ընկերության մի քանի աշխատակից Ուեսթին մեղադրել էր անպարկեշտ պահվածքի համար: Աշխատակիցները պնդել էին, որ Ուեսթը ցույց է տվել իր և իր նախկին կնոջ՝ Քիմ Քարդաշյանի անպարկեշտ լուսանկարները, վիրավորական արտահայտություններ արել կին գործընկերոջ նկատմամբ և սպորտային կոշիկների դիզայնի մասին խոսելիս անընդհատ նշել էրոտիկ դրդապատճառների մասին: 

Ուեսթը, գործընկերների խոսքով, թունավոր և անկարգ մթնոլորտ է ստեղծել աշխատավայրում։ «Ադիդաս»-ի ղեկավարներն աչք են փակել դրա վրա, սակայն մինչև վերջ չի հաջողվել: Ինքը Ուեսթը դեռ չի մեկնաբանել այս պնդումները։ 

«Ադիդաս»-ի ներկայացուցիչը Reuters-ին տված մեկնաբանությունում ընդգծել է, որ մեղադրանքների արժանահավատության աստիճանը դեռ պարզ չէ։ «Սակայն մենք շատ լուրջ ենք վերաբերվում նման պնդումներին և որոշել ենք անմիջապես անկախ հետաքննություն սկսել»,- հավելել է նա։ 

Այժմ «Ադիդաս»-ը չի համագործակցում Քանյե Ուեսթի հետ մեկ այլ՝ ավելի հին սկանդալի պատճառով։ Վերջին տարիներին Ուեսթը սկսել է իրեն դրսևորել որպես ամերիկյան աջերին համակրող և ավանդական արժեքները պաշտպանող քաղաքական գործիչ: 

Ուեսթը մի շարք հակասեմական հայտարարություններ է արել «Յութուբ»-ի հոսքերում և լրատվամիջոցներում՝ վրդովված լինելով խոշոր հեռարձակողների պահվածքից և Միացյալ Նահանգներում երաժշտական արդյունաբերության կառուցվածքից: 

Հոկտեմբերի սկզբին Փարիզի Նորաձևության շաբաթում Ուեսթը կրում էր «White Lives Matter» («Սպիտակ կյանքերը կարևոր են») կարգախոսով շապիկ, որը շատերը համարել էին BLM շարժման կարգախոսի վիրավորական ծաղրերգություն («Սևերի կյանքը կարևոր է»): Սրան Ուեսթը պատասխանել էր, որ քննադատներին վարձատրում է գաղտնի հրեական հասարակությունը:

Մինչ Ուեսթը շարունակում էր իր հակասեմական արտահայտությունները, նրա գործակալությունը և հագուստի մի շարք խոշոր ապրանքանիշեր, այդ թվում՝ Gap-ը և Balenciaga-ը, դադարեցին աշխատել նրա հետ: Երաժիշտը պատմել է, որ դրա պատճառով մեկ օրում կորցրել է երկու միլիարդ դոլար։ 

Հիշեցնենք՝ 2020 թվականին Ուեսթի նախագահական արշավը ամբողջական չէր եղել: 

Նա այն ժամանակ հովանավորել էր երկու գովազդային հոլովակ, սակայն քարոզարշավի մասին շատ ուշ հայտարարեց ու չհայտնվեց վեց նահանգի թեկնածուների ցուցակում։ Իսկ ընտրողների հետ միակ հանդիպմանը նրան ամենաշատը հիշել էին հղիության արհեստական ընդհատման մասին լացով խոսելիս։