Մեզ համար անընդունելի է Արցախի հայաթափման լուռ վկա դառնալու՝ խաղաղապահ զորախմբի տեսանելի դարձող գործելակերպը. վարչապետ

Այսօր՝ Կառավարության 2022 թվականի վերջին նիստի ժամանակ, ՀՀ վարչապետ Նիկոլ Փաշինյանը, անդրադառնալով Լաչինի միջանցքի փակման հարցին, հիշեցրեց՝ Լաչինի միջանցքի փակումը 2020 թվականի նոյեմբերի 9-ի եռակողմ հայտարարության 6-րդ կետի կոպիտ խախտում է:

«Այս կետով պարտավորություն են կրում եռակողմ հայտարարության կողմերից 2-ը՝ Ադրբեջանական Հանրապետությունը և Ռուսաստանի Դաշնությունը: Ադրբեջանը երաշխավորում է Լաչինի միջանցքով քաղաքացիների, տրանսպորտային միջոցների և բեռների երթևեկության անվտանգությունը, իսկ ՌԴ խաղաղապահ զորախումբը վերահսկողության տակ է պահում Լաչինի միջանցքը: Միջազգային հարթակներում Ադրբեջանի կողմից շրջանառվող այն դրույթը, թե Լաչինի միջանցքը բաց է երթևեկության համար, սին է և իրականության հետ ոչ մի կապ չունի»,- նշեց նա:

Երկրի ղեկավարը կրկին պնդեց, որ Լաչինի միջանցքը փակվել է Ադրբեջանի կողմից, և սա նրա միջազգային պարտավորության կոպտագույն խախտումն է. «Եթե նույնիսկ հիմնվեք Ադրբեջանի պրոպագանդիստական վարկածի վրա, թե Լաչինի միջանցքը փակել են էկոակտիվիստները, 2020 թվականի նոյեմբերի 9-ի եռակողմ հայտարարության 6-րդ կետով Լաչինի միջանցքով քաղաքացիների, տրանսպորտային միջոցների և բեռների անվտանգ երթևեկությունն ապահովելը Ադրբեջանի ուղիղ պարտավորությունն է»:

Նրա խոսքով՝ այս պայմաններում իրավիճակի հստակ պարզաբանմամբ պետք է հանդես գա ԼՂ-ում ՌԴ խաղաղապահ զորախումբը և ՌԴ-ն, որն անվտանգային կոնկրետ պարտավորություններ է ստանձնել Լեռնային Ղարաբաղի ժողովրդի առաջ:

«Ո՞րն է իրադրության Ռուսաստանի Դաշնության գնահատականը, ո՞րն է Լաչինի միջանցքի վերականգնելու նրա պլանը և ճանապարհային քարտեզը. սրանք հարցեր են, որոնց պատասխանները Հայաստանի Հանրապետությունը և Լեռնային Ղարաբաղի հանրությունը սպասում են ՄԱԿ-ի ԱԽ մշտական անդամից: Եթե ՌԴ-ն օբյեկտիվ կամ սուբյեկտիվ պատճառներով չի կարողանում ապահովել կայունությունն ու անվտանգությունը Արցախում, կարծում եմ, ինքը պետք է քննարկում նախաձեռնի ՄԱԿ-ի ԱԽ-ում և ԼՂ-ում ՌԴ խաղաղապահ զորախմբին ՄԱԿ-ի ԱԽ-ի մանդատով օժտելու կամ ԼՂ լրացուցիչ բազմազգ խաղաղապահ զորախումբ ուղարկելու հարց բարձրացնի»,- նկատեց Փաշինյանը:

Վերջինիս խոսքով՝ նման հարցադրում ծագում է նաև այն պատճառով, որ Լաչինի միջանցքի փակումն Ադրբեջանի կողմից ԼՂ-ում ՌԴ խաղաղապահ զորախմբի պատասխանատվության գոտի ներխուժելու առաջին դեպքը չէ. «Սրան նախորդել են Փառուխի իրադարձությունները 2022 թվականի մարտին և Խծաբերդինը՝ 2020 թվականի դեկտեմբերին, որի հետևանքով Հայաստանի Հանրապետության շուրջ 3 տասնյակ քաղաքացիներ շարունակում են մնալ գերեվարման մեջ»:

Ըստ Կառավարության ղեկավարի՝ բոլոր նախանշանները կան պնդելու, որ Ադրբեջանը հերթական ռազմական սադրանքն է պատրաստում, այդ թվում՝ նաև ԼՂ-ում, և իրադրության զարգացումները հրատապ պատասխանի սպասող հարցեր են բարձրացնում Լեռնային Ղարաբաղում Ռուսաստանի Դաշնության խաղաղապահ զորախմբի գործունեության հետ կապված»:

Միևնույն ժամանակ Նիկոլ Փաշինյանը շեշտեց՝ ՀՀ-ն ԼՂ-ում ՌԴ զորախմբի ներկայության համոզված կողմնակիցն է և այդ ներկայության ջատագովը. «Մեզ համար անընդունելի է Արցախի հայաթափման լուռ վկա դառնալու՝ ՌԴ խաղաղապահ զորախմբի ավելի ու ավելի տեսանելի դարձող գործելակերպը: Ամեն դեպքում, մենք այս հարցերի պարզաբանման շուրջ պետք է սերտորեն աշխատենք ՌԴ-ի և միջազգային գործընկերների հետ՝ հետագա սրում թույլ չտալու և իրադրության և համապարփակ կարգավորումների հասնելու համար: Պիտի նաև վերահաստատենք Ադրբեջանի հետ խաղաղության պայմանագիր ստորագրելու, սահմանների դելիմիտացիան ավարտին հասցնելու, տարածաշրջանային կոմունիկացիաները բացելու՝ Հայաստանի պատրաստականությունն ու հաստատակամությունը»: