Ինչ է քննարկվել և որոշվել Բրյուսովի համալսարանի երեկվա գիտխորհրդի նիստում. բուհը հայտարարություն է տարածել

Երեկ հայտնել էինք, որ Բրյուսովի անվան պետական համալսարանի հիմնադրամի գիտական խորհրդի նիստ է տեղի ունեցել:

Համալսարանն այսօր հայտարարություն է տարածել՝ տեղեկացնելով, թե ինչ հարցեր են եղել օրակարգում և ինչ որոշումներ կայացվել:

Դրանցից մեկը վերաբերել է «Վ. Բրյուսովի անվան պետական համալսարան» hիմնադրամի հոգաբարձուների խորհրդի պրոֆեսորադասախոսական կազմի անդամների ընտրությանը, մյուսը՝ ասպիրանտների և հայցորդների ատեստավորմանը:

Բուհի տարածած հաղորդագրության համաձայն՝ նիստի օրակարգում ընդգրկված բոլոր հարցերը միաձայն գիտական խորհուրդը հաստատել է: Նշվում է նաև, որ նիստի ավարտին միաձայն ընդունվել է՝ ««Վ. Բրյուսովի անվան պետական համալսարան» հիմնադրամի գիտական խորհուրդն իր մտահոգությունն է հայտնում համալսարանի ռեկտորի ընտրությանը հաջորդող ապօրինությունների կապակցությամբ» խորագրով հայտարարություն: Այն ներկայացնում ենք ստորև.

««Վ. Բրյուսովի անվան պետական համալսարան» հիմնադրամի գիտական խորհուրդն իր մտահոգությունն է հայտնում համալսարանի ռեկտորի ընտրությանը հաջորդող ապօրինությունների կապակցությամբ: ՀՀ կառավարությունը մինչ օրս չի հաստատել Կարինե Հարությունյանի՝ Վ. Բրյուսովի անվան պետական համալսարանի՝ 2022 թ. դեկտեմբերի 9-ի հոգաբարձուների խորհրդի նիստում փակ, գաղտնի քվեարկության արդյունքներով ռեկտորի պաշտոնում ընտրվելու արդյունքները՝ չնայած նիստն անցել է սահմանված կարգի բոլոր կետերի խստագույնս պահպանմամբ՝ առանց որևէ խախտման:

Քվեարկության արդյունքներն արձանագրվել և ստորագրվել են հինգ անդամից բաղկացած հաշվիչ հանձնաժողովի կողմից, որը նախագահում էր ՀՀ կրթության, գիտության, մշակույթի և սպորտի ներկայիս նախարար Ժաննա Անդրեասյանը: Ավելին՝ քվեարկությունից հետո նա բարձրաձայն ընթերցել է արդյունքները, և հոգաբարձուների խորհուրդը միաձայն՝ բոլոր 20 անդամների կազմով, բաց քվեարկությամբ հաստատել է դրանք։ Նիստի տեսաձայնագրությունը համալսարանը հրապարակել է իր ֆեյսբուքյան էջում:

Ակնհայտ է, որ ՀՀ կառավարությունը ոչ մի կերպ չի ցանկանում ընդունել Կարինե Հարությունյանի՝ ռեկտորի պաշտոնում ընտրվելու օրինական փաստը:

Ռեկտորի ընտրությանը հաջորդող առաջին աշխատանքային օրը հրաժարականներ ներկայացրին ՀՀ փոխվարչապետ Համբարձում Մաթևոսյանը և ԿԳՄՍ նախարար Վահրամ Դումանյանը: Այս հրաժարականներին հաջորդեց համալսարանի հոգաբարձուների խորհրդի լուծարումը. 2022 թ. վերջին աշխատանքային օրը՝ դեկտեմբերի 30-ին, ԿԳՄՍ նախարարը գրությամբ հայտնեց համալսարանին հոգաբարձուների խորհրդի լիազորությունները դադարեցված լինելու մասին: Համբարձում Մաթևոսյանը՝ որպես հոգաբարձուների խորհրդի նախագահ, դեկտեմբերի 9-ին նախագահել է նիստը և կողմ քվեարկությամբ հաստատել ընտրության արդյունքները, սակայն առ այսօր չի ստորագրել հոգաբարձուների խորհրդի՝ դեկտեմբերի 9-ի նիստի արձանագրությունը և ընտրության արդյունքների մասին որոշումը: Ստեղծված իրավիճակում ԿԳՄՍ նախարարությունը, քայլեր չձեռնարկելով և փաստացիորեն պաշտպանելով Կառավարության որդեգրած դիրքորոշումը, նշում է, որ չստորագրված արձանագրությունը և որոշումը խոչընդոտ են ընտրության արդյունքները հաստատելու համար։

Համալսարանի գիտական խորհուրդը կոչ է անում պետական բոլոր կառույցներին դադարեցնել նման գործելաոճը, ինչը ստեղծում է արհեստական ճգնաժամ ու խոչընդոտում բուհի բնականոն գործունեությանը, և հայտնում իր անսասան աջակցությունը օրինականորեն ընտրված ռեկտոր Կարինե Հարությունյանին»:

Նշենք, որ երեկ լրացավ Երևանի Վ․ Բրյուսովի անվան համալսարանի վերընտրված ռեկտոր Կարինե Հարությունյանի պաշտոնավարման ժամկետը, նա արձակուրդ է մեկնել:

Բուհի ներկայիս փոխռեկտոր, ռեկտորի պարտականությունները կատարող Ցոլակ Ակոպյանը «Հայկական ժամանակ»-ի հետ զրույցում հայտնել էր, որ Համբարձում Մաթևոսյանը շարունակում է չստորագրել Հարությունյանի վերընտրման արձանագրությունը, իսկ Դավիթ Գյուրջինյանը հայց է ներկայացրել դատարան, հոգաբարձուների խորհրդի հիմնադիր և լիազոր 10 անդամները ներկայացրել են հրաժարական, խորհուրդը լուծարվել է: