Իլոն Մասկի «Tesla»-ների պատճառով իրական գնային պատերազմ է սկսվել չինական շուկայում

Էլեկտրական մեքենաների ամերիկյան արտադրող՝ Իլոն Մասկի «Tesla»-ն, իրական գնային պատերազմ է սանձազերծել չինական շուկայում, որի մասշտաբներն արդեն լարում են տեղական իշխանություններին։ Առճակատման արդյունքը կարող է լինել մի քանի ընկերությունների սննկացումը, որոնք պարզապես չեն կարող դենպինգ անել՝ շուկայի իրենց մասնաբաժինը պահպանելու համար։

Այս մասին գրում է Bloomberg-ը՝ շուկայի մասնակիցներին հղումով։

Առաջին անգամ «Tesla»-ն իր էլեկտրական մեքենաների լայնածավալ զեղչերի մասին հայտարարել է հոկտեմբերին, երկրորդ անգամ՝ հունվարին։ Ծրագրի արդյունքում ընկերությունների էլեկտրական մեքենաները չինական շուկայում նախորդ տարվա համեմատ 14%-ով էժան են, իսկ ԵՄ-ի և ԱՄՆ-ի շուկաների համեմատ՝ գրեթե 50%-ով։ Tesla-ի զեղչերը ստիպել են շուկայի մնացած հատվածին հետևել Մասկի ընկերության օրինակին։ Արդյունքում, 2022 թվականի վերջից չինական ավտոշուկայի գրեթե բոլոր խոշոր մասնակիցները հայտարարել են իրենց զեղչային ծրագրերի մասին՝ տեղական էլեկտրական մեքենաներ արտադրող միջազգային ավտոհսկաներին, ինչպիսիք են Volkswagen-ը, Mercedes-Benz-ը և Ford-ը: Ընդհանուր առմամբ, մոտ 30 էլեկտրական մեքենաներ արտադրող ընկերություններ առաջարկել են իրենց զեղչերը։

««Tesla»-ն ավերածություններ է ստեղծել շուկայում», - ասում է «Automotive»-ի գործադիր տնօրեն Յոխեն Զիբերտը, որի ընկերությունը գրասենյակներ ունի Շտուտգարտում և Շանհայում:

Տեղական իշխանություններին դուր չի եկել գնային պատերազմը. մարտի 22-ին Չինաստանի ավտոարտադրողների ասոցիացիան պահանջել է ընկերություններից դադարեցնել այն, քանի որ երկարաժամկետ հեռանկարում նման քայլերը չեն նպաստի առողջ մրցակցությանը և ոլորտի զարգացմանը։ Իշխանությունները ընկերություններին կոչ են անում «վերադառնալ բնականոն գործունեությանը»: Ասոցիացիան նաև պահանջել է մարզային իշխանություններից հրաժարվել տեղական արտադրողներին սուբսիդիաներ տրամադրելուց։ Նման կերպ, օրինակ, ֆրանսիական «Citroen» ապրանքանիշի գործընկեր «Dongfeng Motor Group»-ը կարողացել է իջեցնել «Citroen C6»-ի գինը 40.000 յուանով կամ դրա արժեքի 40%-ով։

Ավտոարտադրողները ներքաշվել են գնային պատերազմի մեջ՝ նաև կապված բավականին երկար տնտեսական խնդիրների հետ, որոնք առաջացել են երկարատև կորոնավիրուսային սահմանափակումների պատճառով, ինչը կտրուկ հարվածել է պահանջարկին: Բացի այդ, արգելափակումն իր ազդեցությունն է թողել հաստատված մատակարարման շղթաների վրա՝ հանգեցնելով արտադրության խափանումների և ընկերությունների համար չնախատեսված կորուստների: Սակայն ճգնաժամն այնքան էլ չի ազդել էլեկտրամոբիլների ոլորտի վրա. էներգիայի այլընտրանքային աղբյուրներով աշխատող մեքենաների վաճառքը (էլեկտրական մեքենաներ + հիբրիդներ) կրկնապատկվել է 2022 թվականին և հասել 5,67 միլիոն միավորի։ Առաջատարը մնում է «BYD» տեղական արտադրողը, որին բաժին է ընկնում շուկայի մոտ 30%-ը։ Սակայն մյուս արտադրողները, այդ թվում՝ «Tesla»-ն, շարունակում են ավելացնել արտադրությունն ու վաճառքը:

«Մենք պետք է հաղթահարենք այս գնային պատերազմը տարեսկզբին, և այնուհետ մենք ակնկալում ենք, որ արդյունաբերությունը խորը հիմնարար համախմբում կունենա: Գրեթե բոլորը համաձայն են, որ Չինաստանում այս պահին չափազանց շատ ավտոարտադրողներ կան», - գործակալությանը ասել է «Nio»-ի գլխավոր ֆինանսական տնօրեն Սթիվեն Ֆենգը:

Փորձագետները խոստովանում են, որ գնային պատերազմի շարունակությունն անխուսափելիորեն կհանգեցնի սննկացման և որոշ արտադրողների՝ շուկայից դուրս գալու։ Այնուամենայնիվ, «Tesla»-ն և արևմտյան այլ խոշոր ավտոմոբիլային կոնցեռնները հանգիստ կհաղթահարեն դեմպինգը, իսկ չինական փոքր ընկերությունները, ամենայն հավանականությամբ, խնդիրներ կունենան, նշում է գործակալությունը:

Bloomberg-ը 2023 թվականին չինական էլեկտրական մեքենաների շուկայի չափը գնահատում է մոտ 8,1 միլիոն միավոր։ Սա 2,5 անգամ ավելի է, քան սպասվում էր Եվրոպայում (3,2 միլիոն վաճառք տարեվերջին) և ավելի քան 4 անգամ ավելի, քան ԱՄՆ-ում (1,9 միլիոն էլեկտրական մեքենա):