Հայաստանը կարող է դիրքավորվել որպես թվայնացման տարածաշրջանային կենտրոն․ Երևանում կայացավ Doing Digital Forum-ը

Աշխարհն օր օրի դառնում է ավելի թվային: Իսկ ինչպե՞ս կարող է բիզնեսը նոր տեխնոլոգիաների կիրառմամբ հասնել մրցակցային առավելության, դրա հետ մեկտեղ ունենալ տվյալների պաշտպանություն ու կիբերանվտանգություն: Այս ու մի շարք այլ հարցեր քննարկվեցին ապրիլի 5-ին Երևանում կայացած Doing Digital Forum-ի ընթացքում: Ֆորումի հիմնադիր կազմակերպիչը SPRING PR ընկերությունն էր, համակազմակերպիչը` Ամերիաբանկը։

«Ամերիաբանկն ավելի, քան 5 տարի է, ինչ թվային փոխակերպման ճանապարհին է»: Ասում է Ամերիաբանկի Ինովացիաների և թվայնացման գծով տնօրեն Արտյոմ Շամցյանը` հավելելով, որ այս ու նմանատիպ ֆորումները հնարավորություն են տալիս կիսվելու փորձով և քաղած դասերով:

Doing Digital Forum-ը համախմբել էր ոլորտի առաջատար մասնագետներին: Ֆորումի գլխավոր խոսնակը թվային փոխակերպումների և ֆինթեքի միջազգային փորձագետ Քրիս Սքիներն էր, որը ամենաազդեցիկ մասնագետներից ու ամենավաճառվող հեղինակներից մեկն է աշխարհում:

Ֆորումի շրջանակում ելույթների ու պանելային քննարկումների միջոցով բիզնեսի և թվային տեխնոլոգիաների ոլորտում լավագույն փորձով, գիտելիքով և տեսլականով կիսվեցին նաև խոսնակներ Սինգապուրի սոցիալական գիտությունների համալսարանից, Forbes-ից, McKinsey, Visa, Fastex, Hexens, Beta Financial Technologies, ICDT Global ընկերություններից, FAST հիմնադրամից, ինչպես նաև ՀՀ կառավարությունից, ՀՀ կենտրոնական բանկից և այլն:   

DDF-ի հիմնադիր, SPRING PR-ի համահիմնադիր Տաթևիկ Սիմոնյանի խոսքով՝  թվային էկոհամակարգի բոլոր խաղացողների միջև մշտական հաղորդակցության անհրաժեշտությունը սահուն և անխափան փոխակերպման գործընթաց ապահովելու համար է։

«Ֆորումը ներկայացնելու է թվային տնտեսության նոր միտումներն ու լավագույն փորձը։ Հայաստանը դիրքավորելու ենք համաշխարհային տեխնոլոգիական հանրության շրջանակներում՝ որպես թվային լուծումների ինովացիոն հաբ»,- ասաց Սիմոնյանը։

Ամերիաբանկի Տաղանդների ու ծառայությունների գծով տնօրեն Արմինե Ղազարյանն էլ ընդգծեց՝ Հայաստանն ունի մարդկային հզոր կապիտալ, ինչն ամուր հենք է, որպեսզի այն դառնա տեխնոլոգիաների և նորարարությունների տարածաշրջանային նոր հանգրվան:

«Իսկ ի՞նչն է տանելու մեզ դեպի այդ հանգրվանը։ Տեխնոլոգիանե՞րը: Ոˊչ, տեխնոլոգիան բավարար չէ: Պատասխանն է` մարդիկ»,-իր ելույթում ասաց նա:

Քրիս Սքիները լրագրողների հետ զրույցում ևս անդրադարձավ Հայաստանի ներուժին: Նրա խոսքով` եթե Հայաստանը ցանկանում է զարգանալ` որպես տարածաշրջանային թվային կենտրոն, ապա երկրի ղեկավարությունը պետք է դրա առաջնորդության դերն ստանձնի։

«Այն փաստը, որ փոխվարչապետի, Կենտրոնական բանկի ներկայացուցչի մասնակցությամբ և Սփրինգ Փիառի ու Ամերիաբանկի նախաձեռնությամբ իրականացվում է այս ֆորումը, ցույց է տալիս, որ կա այդ ընկալումն ու հանձնառությունը, որ Հայաստանում տեղի ունենա այդ թվային փոխակերպումը»,- նշեց Սքիները։

Ըստ նրա՝ չափազանց կարևոր է հասկանալ, թե ինչպես է աշխարհը թվայնացվում և փոխակերպվում, և շատ կարևոր է փոխակերպման և թվայնացման այս ընկալումը Հայաստան բերելը:

Ֆորումի ժամանակ ելույթով հանդես եկան նաև ՀՀ փոխվարչապետ Մհեր Գրիգորյանն ու ԿԲ նախագահ Մարտին Գալստյանը։

Փոխվարչապետի խոսքով՝ վերջին տարիներին Հայաստանում տեխնոլոգիական խորագրով անցկացվող միջազգային միջոցառումների ինտենսիվությունն ինքնին այն բանի տեսանելի ցուցիչն է, որ Հայաստանի տնտեսական ու հանրային կյանքում թվային փոխակերպումը գերակայող օրակարգ է դարձել:

«Թվային ապագան պետք է իրականություն դառնա հենց քաղաքացիների ու մասնավոր հատվածի էական դերակատարմամբ, և պետությունը հնարավոր ջանքեր է գործադրելու բաց և հասանելի տվյալների քաղաքականություն ներդնելու, կրիտիկական ենթակառուցվածքներ, խաղի կանոններ և նպաստավոր ու անվտանգ միջավայր ձևավորելու գործում։ Սա է Կառավարության հիմնարար մոտեցումը թվային բարեփոխումների իրականացման գործում»,- ասաց Գրիգորյանը:

ԿԲ նախագահն էլ նկատեց՝ թվային տնտեսությունը փոխում է մեր կենսակերպը, բիզնես անելու եղանակները, և բոլորի պես Հայաստանն էլ է հետևում տեխնոլոգիական զարգացման արագ տեմպերին:

«Հույս ունենք, որ արագընթաց տեխնոլոգիական բեկումները թույլ կտան մեր հասարակությանն ավելի արդյունավետ ու ավելի բարգավաճ լինել:»,- ասաց նա:

Ներկաների հավաստմամբ` DDF-ը նոր գաղափարներ բացահայտելու, մասնագիտական կապերի ձևավորման ու փորձի փոխանակման լավագույն հարթակներից է: