Կարմիր ձու տուր, կարմիր օր տամ. Գյումրին հրավիրում է Սուրբ Հարության տոնի համաքաղաքային տոնախմբության

Այս կիրակի՝ ապրիլի 9-ին, Գյումրին բոլորին հրավիրում է Սուրբ Հարության՝ զատկական տոնախմբության: Եկեղեցական տաղավար այս տոնի սովորութամշակութային ընկալումների բացահայտումներ ու գունավոր օր է սպասվում տոնին միացողներին:

«Հավկիթախաղ Գյումրիում» խորագրով միջոցառման մեկնարկը կտրվի Աբովյան փողոցում: Ժամը 12:00-15:00-ն այստեղ կարելի է ականատեսն ու մասնակիցը դառնալ զատկական հավկիթախաղի, շրջել տոնին համահունչ տոնավաճառում:

«Հայկական ժամանակ»-ի հետ զրույցում Գյումրու քաղաքապետարանի Մշակույթի և երիտասարդության հարցերի բաժնի պետ Լիլիթ Թովմասյանն ասում է՝ ի տարբերություն անցած և նախորդ տարիների՝ այս տարի շատ մեծ ուշադրություն է դարձվել տոնի ծագումնաբանությանը, ժողովրդական ընկալումները հենց ժողովրդին ներկայացնելուն ավանդական խաղերի, խաղիկների ու ասիկների մատուցմանը:

Նույն փողոցում «Կարմիր ձու տուր, կարմիր օր տամ» խորագրով տոնածիսական խաղեր, ասիկներ կլինեն:

«Կլինեն մարդիկ և համապատասխան մշակութային կազմակերպություններ, որոնք կներկայացնեն բոլոր այն խաղիկները, որոնք արտասանվել և երգվել են Զատկին, այն ասիկները, որոնք ուղեկցել են տոնակատարությանը, այն խաղատեսակները, որոնցով անցել է տոնակատարությունն ավանդաբար: Ոչ միայն կհավաքվենք խաղալու, այլ նաև կծանոթանանք այս տոնի հետ կապված սովորութամշակութային ընկալումներին»,-ասում է Թովմասյանը:

«Ուրախության կիրակի» խորագիրը նախընտրողները Աբովյան փողոցում ազգային երգեր կերգեն, կպարեն, չիմացողներն էլ հենց տեղում կսովորեն, կմիանան շուրջպարին:

Ժամը 13։00-15։00-ից սկսած՝ կմեկնարկի զատկական տոնի առավել գունագեղ հատվածը. գյումրեցիներին ու քաղաքի հյուրերին կսպասեն Գյումրու թանգարանները: Ասլամազյան քույրերի պատկերասրահի բակում թղթե ձվեր կպատրաստեն՝ ցանկացողները՝ դրանք ներկելով ասլամազյանական գույներով: Ավետիք Իսահակյանի թանգարանի բակում ևս այս տոնին հատուկ միջավայր ու վարպետության դասեր կլինեն:

Մեկ շաբաթ անց Շիրազի տուն-թանգարանում Հայագիտական կենտրոնի ներկայացուցիչները կմեկնաբանեն «Կանաչ-կարմիր կիրակիի»-ի խորհուրդը:

Բոլոր միջոցառումներն ուղեկցվելու են ազգային-ժողովրդական երգ ու պարով: Վարպետության դասերին կարող է մասնակցել յուրաքանչյուրը:

Գյումրու քաղաքապետարանի Մշակույթի և երիտասարդության հարցերի բաժնի պետի խոսքով՝ լավ կլինի, եթե կարողանան այս տոնը Գյումրիում մշտապես նման մասշտաբով տոնել, դարձնել ավանդական:

«Եթե մարդիկ իմանան, որ Սուրբ Զատիկը Գյումրիում միշտ նշվում է այսպես և միշտ հետաքրքիր է, սա նաև կարող է նպաստել մարդկային հոսքին, համաժողովրդական տոնակատարություն ունենալուն: Տոնը նաև բազմաթիվ զբոսաշրջիկների է հետաքրքրում, քանզի նման տոնախմբությամբ ոչ բոլոր երկրներում են նշում Սուրբ Հարության տոնը, իսկ ցանկացած զբոսաշրջիկի ամեն ազդի ավանդույթն ու ժողովրդական բաղադրիչը մեծապես հետաքրքրում է»,- վստահ է նա:

Լիլիթ Թովմասյանը զրույցի ընթացքում անդրադարձավ նաև համացանցում տարածվող անհարկի խոսակցություններին՝ կապված այս տոնի կազմակերպման ու անցկացման համար ծախսվող ֆինանսական միջոցների հետ:

Ըստ նրա՝ այն, ինչ ներկայացրեց, ու հենց վաղը դրա մասնակիցը կլինեն գյումրեցիները, զբոսաշրջիկներն ու քաղաքի հյուրերը, իրականացվում է 150 հազարից 200 հազար դրամի շրջանակներում:

«Ուղիղ հակառակը՝ պետք է քննարկվեր, թե ինչպես է հնարավոր այդ գումարով, որով շատերը ծննդյան մեկ տոն չեն կազմակերպում, մենք կարողանում ենք համաքաղաքային մեծ տոնակատարություն ունենալ: Ասեմ՝ մենք համախմբել ենք համայնքապատկան ՀՈԱԿ-ների ներուժն ու այն կազմակերպությունների հնարավորությունները, որոնց հետ տարվա ընթացքում աշխատել ենք: Մեզ միացել է Գեղագիտության ազգային կենտրոնի Գյումրու մասնաճյուղը, «Ընտանիք» մանկապատանեկան ստեղծագործական կենտրոնը:

Ամեն ինչ արել ենք, որ վաղը ազգայինն ու ավանդականն առաջնային գաղափար լինի: Բոլորին հրավիրում ենք համաքաղաքային մեծ միջոցառման, որպեսզի քաղաքի կենտրոնում միմյանց տանք այդ ավետիսը և ժողովրդական տոներից ամենաժողովրդականը նշենք միասին»,- նշում է Թովմասյանը: