Կյանքեր փոխելու գաղափարը նոր հասցե ունի. բացվել է «Արթիկի երիտասարդների տուն» բաց երիտասարդական կենտրոնը

Ի սկզբանե երկու համայնքի վերաբերյալ քննարկումներ ունեինք, սակայն Արթիկի մեր գործընկերները կարողացան ապացուցել, որ հենց իրենց է պետք ունենալ երիտասարդների տուն:

«Երիտասարդական նախաձեռնությունների կենտրոն» ՀԿ խորհրդի նախագահ Արթուր Նաջարյանը հպարտությամբ նշում է՝ «Արթիկի երիտասարդների տուն»-ը Հայաստանում դարձավ 6-րդը, որը բացում են՝ հստակ նպատակով և ասելիքով:

Երիտասարդների տներում ոչ ֆորմալ կրթություն ապահովող բացառիկ մոդել է կիրառվում, որոնք շատ հաճախ շրջադարձային դերակատարություն ունեն 13-ից 18 տարեկան պատանիների ու երիտասարդների կյանքում: Յուրաքանչյուր հաջող ձեռնարկ կազմակերպությանն ու գործընկերներին տանում է նորի հետևից:

Ինտելեկտուալ ժամանցի կազմակերպում, զբաղվածության, բարեկեցության ապահովում, առողջ ապրելակերպի ու մասնագիտական կողմնորոշման հարցեր և ոչ միայն: Երիտասարդների տները նաև բնավորություն ու աշխարհայացք են ձևավորում: Ապահով այդ տարածքի պատերից ներս պատանիներն ու երիտասարդները երբեմն կարող են հայտնվել ֆիլմերում՝ իրենց տեսած միջավայրերում, հնարավորություն ունենալ փորձել բաներ, որոնք առօրյա կյանքում համարել են անհնար ու անհասանելի:

Երիտասարդական տները նաև կարծրատիպեր են կոտրում: Գործում են հավասարության, ամեն ինչի ինքնուրույն հասնելու, երբեք չընկրկելու և միշտ առաջ քայլելու անխախտ սկզբունքներով:

Արթիկի երիտասարդների տունը բացվել է 2023-ին՝ «Երիտասարդական նախաձեռնությունների կենտրոնի», ՄԱԿ-ի մանկական հիմնադրամի՝ ՅՈՒՆԻՍԵՖ-ի և Արթիկի համայնքապետարան միջև կնքված եռակողմ հուշագրով: Համայնքապետարանը տարածքն է տվել, որը վերանորոգվել, կառուցապատել, գույքով ու տեխնիկայով ապահովվել են ԵՆԿ-ն ու և ՅՈՒՆԻՍԵՖ-ը:

«Այս կենտրոնը, ըստ հուշագրի, տարեկան ծառայություն պիտի տրամադրի 300 պատանու, բայց մենք ընդամենը մի ամսում արդեն 350 պատանու ենք հյուրընկալել։ Երիտասարդների տան ստեղծմամբ համայնքապետարանը մեր միջոցով՝ որպես մասնագիտական կառույցի, երիտասարդական համայնքային ծառայություն է մատուցում իր երիտասարդներին: Սա ներդրում է Արթիկում երիտասարդների զարգացման համար, իսկ երիտասարդների զարգացմանն ուղղված ցանկացած ներդրում ներդրում է համայնքի և երկրի ապագայի մեջ»,- ասում է Արթուր Նաջարյանը։

Կենտրոնը նախատեսված է օրական՝ առնվազն 25, առավելագույնը մինչև 35 պատանու առօրյա ծառայություններ մատուցելու համար, բայց այս թիվը միջինում 55, օրեր են եղել՝ հասել է մինչև 126-ի:

«Իհարկե, սա խնդրահարույց է, քանի որ տարածքը բավական փոքր է ու այդքան մեծ թվով պատանիների ու երիտասարդների համար նախատեսված չէ։ Բայց նաև պետք է ասել, որ եթե մյուս տեղերում հատուկ միջոցառումներ էինք կազմակերպում, որպեսզի կարողանայինք երիտասարդներին հավաքագրել, այստեղ ոչինչ չենք արել, պաշտոնական բացումը չեղած՝ արդեն մեկ ամսվա ընթացքում շուրջ 150 երիտասարդ է այցելել»,- ընդգծում է պատասխանատուն:

Երիտասարդներին նման տները պետք են ոչ միայն Հայաստանում, այլ ամբողջ աշխարհում: Իր փորձից է նման կարծիք հայտնում ՅՈՒՆԻՍԵՖ-ի ներկայացուցչի տեղակալ  Սիլվիա Մեստրոնին:

«ՄԱԿ-ի մանկական հիմնադրամի փորձով կարող է ասել, որ ոչ միայն Հայաստանում, այլ ողջ աշխարհում անչափ կարևոր է երիտասարդներին տրամադրել ապահով տարածքներ, որտեղ նրանք կաշխատեն միասին, իրենց ստեղծագործական ներուժը կիրացնեն։ Եվ ոչ ֆորմալ կրթությունը շատ լավ կարող են համադրել դպրոցներում ստացող ֆորմալ կրթության  հետ»,- ասում է նա։

Արթիկ այցելած ՀՀ-ում Արգենտինայի փոխդեսպանն էլ վստահ է՝ կենտրոնը հարյուրավոր երիտասարդների կյանքեր է փոխելու։

Մինչ այս նման երիտասարդական տներ արդեն բացվել ու գործում են Գյումրիում, Սպիտակում, Գավառում, Արմավիրում, Էջմիածնում։