ԼՂ նախկին պաշտոնյաները ՀՀ-ում «5-րդ շարասյան» մասն են կազմում», Շահրամանյանը հատուկ առաքելությամբ է այստեղ. Ստեփանյան

Քաղաքագետ Դավիթ Ստեփանյանը համամիտ է Ազգային ժողովի նախագահ Ալեն Սիմոնյանի արտահայտած այն տեսակետի հետ, ըստ որի՝ Լեռնային Ղարաբաղի պաշտոնյա այլևս գոյություն չունի և Հայաստանում ԼՂ ներկայացուցչության շենքի իմաստը պետք է վերանայել։

«ԼՂ ներկայացուցիչները իրենք են գնացել Արցախը լուծարելու, ինքնալուծարելու ճանապարհով, հետևաբար չեն կարող լինել թեկուզ պատգամավորներ։ Այդ կոչումները, որով իրենք հանդես են գալիս, համարում եմ, որ իրականությանը չեն համապատասխանում։ Եթե անգամ ներկայանում էլ են, դրանից որևէ բան չի փոխվում»,- «Հայկական ժամանակ»-ի հետ զրույցում ասում է Ստեփանյանը:

Միևնույն ժամանակ նա նկատում է, որ Լեռնային Ղարաբաղի ներկայացուցիչները, որոնք իրենց համարում են պաշտոնյաներ, անգործության են մատնված: Քաղաքագետի կարծիքով՝ վերջիններս խուսափում են այն պատասխանատվությունից, որը ունեն իրենց ընտրած ժողովրդի առջև:

Ստեփանյանի համոզմամբ՝ Հայաստանում ԼՂ, այսպես կոչված, պաշտոնյաների ներկայությունը ձեռնտու է միայն Ռուսաստանին․ «Իհարկե, Ռուսաստանը չի ցանկանա, որ ԼՂ պաշտոնյաները այլևս գոյություն չունենան մեր երկրում, չլինի իրենց ներկայացնող շենքը։ Եթե այդպես չլիներ, ապա Սամվել Շահրամանյանը այժմ կլիներ Բաքվի բանտում, ոչ թե ուղղաթիռով կհասներ Հայաստան։ Եթե այստեղ է, ուրեմն հատուկ առաքելություն ունի և իր հնարավորությունների ու ուժերի չափով փորձում է իրականացնել այդ առաքելությունը»։

Հարցադրմանը՝ ո՞րն է այդ առաքելությունը, Ստեփանյանը նկատում է. «Ներսից իրավիճակը սրել, խնդիրներ ստեղծել երկրում, որը դեռ չի հաջողվում իրականացնել, բայց եթե հնարավորություն ունենային, միանշանակ է, որ գնալու էին այդ քայլին։ Այս մարդիկ Հայաստանում «5-րդ շարասյան» մասն են կազմում»։

Վերջինս նշում է, որ Ռուսաստանի նպատակն է՝ Հայաստանի հետ կատարվի և տեղի ունենա այն ամենը, ինչը կատարվել է Լեռնային Ղարաբաղի հետ, իսկ ԼՂ ներկայացուցիչները, այստեղ գտնվելով, փորձում են ՀՀ-ի համար այդ ճակատագիրը պատրաստել։

Ինչ վերաբերում է նրան, որ վերջիններս անդադար միայն մեղադրանքներ են հնչեցնում Հայաստանի իշխանության հասցեին և ԼՂ լուծարման պատասխանատվությունը փորձում բարդել ՀՀ-ի վրա, Ստեփանյանը սա ևս պայմանավորում է ՌԴ-ի գործոնով․ «Լեռնային Ղարաբաղի այս վերնախավը վաղուց պաշտպանում է Ռուսաստանի շահերը, նույնիսկ իր ժողովրդի շահերը չի գերադասում։ Դա է նաև պատճառներից մեկը Ղարաբաղի կործանման հարցում»։

Ստեփանյանը այն կարծիքին է, որ ԼՂ ներկայացուցչության շենքի կարևորության և պաշտոնյաների գոյություն ունենալու վերաբերյալ պնդումները ատրիբուտներ են, և ԼՂ հարցը որևէ շենքով կամ Շահրամանյանով դիտարկել պետք չէ։

«ԼՂ հիմնահարցը ավելի խորը արմատներ ունի։ Այդ շենքը թեկուզ մնա էլ, որևէ բովանդակություն չունի, ինչպես դրա մեջ իրենց պաշտոնյա համարողները չունեն ասելիք։ ԼՂ խնդիրը չի կարգավորվել, ուստի եթե չի կարգավորվել, չի կարող որևէ մեկը ասել, որ ԼՂ հարցը փակ է։ Թեկուզ շենքն էլ կարող է լինել, Շահրամանյանն էլ իրեն կարող է նախագահ կոչել, ինչ-որ մարդիկ՝ պատգամավորներ, բայց եթե իրենք ղարաբաղցիների անունից ոչինչ չեն ներկայացնում, դրանից որևէ բան չի էլ փոխվում։ Արցախը հայաթափված է մնում, օրակարգ չկա առաջին հերթին ԼՂ ներկայացուցիչների մոտ»,- ասում է նա։

ԼՂ նախկին պաշտոնյաների առաջացրած խնդիրներից խուսափելու համար ՀՀ իշխանությունը պետք է ձեռնամուխ լինի այն քայլերին, որոնք կարող են թույլ տալ պաշտպանել Հայաստանի Հանրապետության ինքնիշխանությունը, ասում է Ստեփանյանը՝ թվարկելով դրանք. «Արևմուտքի և Եվրամիության հետ հարաբերությունների ամրապնդումը, Իրանի և Ֆրանսիայի հետ ավելի մոտ հարաբերություններ ձևավորելը, ինչպես նաև կողմնորոշվելը, թե որ ճանապարհով է ուզում գնալ Հայաստանը»։

Մերի Խաչատրյան