ԱՄՆ նախագահ Բայդենն ամփոփել է իր քաղաքական կարիերան և հրաժեշտի ուղերձ հրապարակել

Ջո Բայդենը հույս է հայտնել, որ իր վարչակազմի ձեռք բերած հաջողությունները կշարունակվեն տասնամյակներ շարունակ:

Չորեքշաբթի՝ հունվարի 15-ի երեկոյան, նախագահ Ջո Բայդենը իր հրաժեշտի ուղերձն է հղել Սպիտակ տան Օվալաձև գրասենյակից։ Նա ամփոփել է ոչ միայն իր չորս տարվա նախագահությունը, այլև կեսդարյա քաղաքական գործունեությունը։

Նախագահ Բայդենը ազգին ուղղված իր հրաժեշտի խոսքում բարձր է գնահատել ժողովրդավարական ինստիտուտները, որոնք կառավարում են Ամերիկայի Միացյալ Նահանգները։

«Այս ամենի կենտրոնում 50 տարի մնալուց հետո ես գիտեմ, որ հավատալ Ամերիկայի գաղափարին, նշանակում է հարգել ազատ հասարակությունը կառավարող ինստիտուտները՝ նախագահությունը, Կոնգրեսը, դատարանները, ազատ և անկախ մամուլը: Իշխանությունների տարանջատման, զսպումների և հավասարակշռության մեր համակարգը կարող է կատարյալ չլինել, բայց այն պահպանել է մեր ժողովրդավարությունը մոտ 250 տարի, ավելի երկար, քան պատմության մեջ որևէ այլ երկիր, որը երբևէ փորձել է նման համարձակ փորձարկումներ»,- ասել է նա:

Բայդենն Ամերիկան և ամերիկացիներին համեմատել է Նյու Յորքի Ազատության արձանի հետ. «Ես շատ էի մտածում այն մասին, թե ով ենք մենք, և գուցե նույնիսկ ավելին այն մասին, թե ովքեր պետք է լինենք»:

Նա նկարագրել է Ազատության արձանի ստեղծումը Նյու Յորքում, որը Ֆրանսիայի նվերն է. «Ինչպես բուն Ամերիկայի գաղափարը, այն կառուցել է ոչ թե մեկ մարդ, այլ բազմաթիվ մարդիկ տարբեր ծագումներից, աշխարհի տարբեր մասերից: Ինչպես Ամերիկան, այնպես էլ Ազատության արձանը կանգուն չէ, փոթորիկներ միշտ կգան: Այն ճոճվում է մի քանի սանտիմետրով, բայց երբեք չի ընկնում իր տակ գտնվող ջրի հոսքի մեջ: Դա ինժեներական հրաշք է»:

Անդրադառնալով իր ժառանգությանը և իր վարչակազմի ձեռքբերումներին՝ Ջո Բայդենը հույս է հայտնել, որ դրանք կշարունակվեն տարիներ շարունակ։

«Ժամանակ կպահանջվի, որպեսզի լիովին զգանք մեր համատեղ արածի ազդեցությունը: Բայց սերմերը տնկված են, և նրանք կաճեն, կծաղկեն տասնամյակներ շարունակ»,- ասել է նա։

Վերջինս թվարկել է իր նախագահության որոշ ձեռքբերումներ՝ ներառյալ տարեցների համար դեղատոմսով դեղերի գների իջեցումը, զենքի անվտանգության մասին օրենքների ընդունումը և վետերանների առողջության խնամքը:

Բայդենը նաև բարձր է գնահատել իր ձեռքբերումները արտաքին քաղաքականության մեջ և նշել, թե ինչպես է ինքն «ուժեղացրել ՆԱՏՕ-ն»։

«Ուկրաինան դեռ ազատ է, և մենք առաջ ենք անցել Չինաստանից և շատ այլ երկրներից»,- ասել է Բայդենը՝ հավելելով, որ ինքը տնտեսական աճ է գրանցել՝ միաժամանակ պաշտպանելով շրջակա միջավայրը և զգուշացրել է գլոբալ տաքացման դեմ պայքարում իր առաջընթացը խաթարելու ջանքերից:

«Մենք անում ենք երկուսն էլ, սակայն հզոր ուժերը ցանկանում են օգտագործել իրենց չվերահսկվող ազդեցությունը, որպեսզի չեղարկեն այն քայլերը, որոնք մենք ձեռնարկել ենք կլիմայական ճգնաժամի դեմ պայքարելու համար»,- ասել է ԱՄՆ նախագահը։

Սպիտակ տան հեռացող ղեկավարը նաև նշել է, որ իրեն անհանգստացնում է Միացյալ Նահանգների մի քանի հարուստ մարդկանց միջև «իշխանության վտանգավոր կենտրոնացումը»:

«Այսօր Ամերիկայում օլիգարխիա է ի հայտ գալիս, որը բնութագրվում է ծայրահեղ հարստությամբ, ուժով և ազդեցությամբ, որն իսկապես սպառնում է մեր ողջ ժողովրդավարությանը, մեր հիմնական իրավունքներին ու ազատությանը, ինչպես նաև հաջողության հասնելու բոլորի արդար հնարավորություններին»,- ասել է Բայդենը Օվալաձև գրասենյակից իր հրաժեշտի ելույթում։ 

Բայդենը նախազգուշացրել է Միացյալ Նահանգներում «տեխնոլոգիական արդյունաբերական համալիրի» ազդեցության մասին՝ օգտագործելով բառեր, որոնք կրկնում էին հանրապետական նախագահ Դուայթ Էյզենհաուերի 1961 թվականին ազգին ուղղված հրաժեշտի ուղերձում: