Ինչո՞ւ է ընդդիմությունն արյան վրա դիվիդենդ հավաքում. կարո՞ղ էր կանխվել Մերձավանի ողբերգական միջադեպը, թե՞ ոչ

Ինչպես հայտնի է, սեպտեմբերի 23-ին՝ կեսգիշերին, անհայտ դիմակավորված անձը Մերձավան համայնքում ինքնաձիգից կրակ է բացել Փարաքար խոշորացված համայնքի ղեկավար Վալոդյա Գրիգորյանի և նրան ուղեկցող 2 անձանց ուղղությամբ:

Վալոդյա Գրիգորյանը և քրեական ոստիկան Կարեն Աբրահամյանը տեղում մահացել են, երրորդ անձը՝ Արծրուն Գալստյանը, հոսպիտալացվել է. նրա կյանքին վտանգ չի սպառնում:

Դեպքի վայրի զննությամբ տեսանկարահանող սարքերի տեսաձայնագրությունները ևս առգրավվել են: Տարածված կադրերում երևում է, թե ինչպես է հանցագործը ինքնաձիգով կրակոցների շարք արձակել, երբ ընկել են 3-ն էլ, մոտեցել է հենց Վալոդյա Գրիգորյանին ու կողքին գտնվող ընկերոջը՝ քրեական ոստիկան Կարեն Աբրահամյանին, ընկած վիճակում ևս մի քանի կրակոց արձակել նրանց վրա, զենքի կոթով հարված հասցրել ընկած Գրիգորյանի գլխին, համոզվել, որ սպանված են ու հեռացել:

Քննչական կոմիտեից հայտնել են, որ Մերձավանում տեղի ունեցած կրակոցների, համայնքապետ Վալոդյա Գրիգորյանի և ևս մեկ անձի սպանության դեպքի առթիվ Արմավիրի մարզային քննչական վարչության Վաղարշապատի քննչական բաժնում նախաձեռնվել է քրեական վարույթ: Նախաքննության ընթացքում նշանակվել են դատաբժշկական փորձաքննություններ:

Մինչ քննիչներն ու ոստիկանությունը փորձում են գնալ սպանության հետքերով՝ պարզելու հանգամանքները, ընդդիմադիր քաղաքական գործիչներն ու ուժերը արդեն «պարզեցին ու գտան» մեղավորներին՝ սլաքներն ուղղելով իշխանության ուղղությամբ՝ տեղի ունեցածը որակելով քաղաքական վենդետա:

«Իրազեկ քաղաքացիների միավորում» հասարակական կազմակերպության համակարգող Դանիել Իոաննիսյանը «Հայկական ժամանակ»-ի հետ զրույցում նկատում է. «Ես չափազանց ադեկվատ մարդ եմ, որպեսզի մտածեմ, որ կարող է իշխանությունը որոշել է բոլոր ընդդիմադիրներին գնդակահարել, օրը 3 հոգու գնդակահարելու է. աբսուրդ է»:

Իոաննիսյանն ընդգծում է՝ տեղի ունեցածը դատապարտելի և շատ խնդրահարույց դեպք է:

«Խնդրահարույց է նաև պետության առումով և ոչ միայն սպանությամբ պայմանավորված ողբերգությամբ: Պետք է ամեն ինչ անել, որ դրան մասնակցած, օժանդակած, աջակցած, կազմակերպած, իրականացրած բոլոր մարդիկ մի քանի տասնամյակ արևի երես չտեսնեն: Ինչ վերաբերում է սպանության մոտիվներին, ես ավել բան չգիտեմ, քան ձեր ընթերցողները, նաև, թե որքանով է դա կապված ամիսներ առաջ Մերձավանում տեղի ունեցած հանցագործությունների հետ»,- ասում է նա:

Վերջինս միաժամանակ նկատում է՝ պետք է նաև հասկանալ՝ արդյոք իրավապահ մարմինները ողջամտորեն կարո՞ղ էին կանխել սպանությունը, եթե ավելի պրոֆեսիոնալ գործեին․ դրանից էլ է պետք հետևություն անել, որոշ մարդկանց պատժել, որոնք իրենց տեղում չեն. «Կան հանցագործություններ, որոնք ոստիկանությունը ողջամտորեն չի կարող կանխարգելել, կան հանցագործություններ, որ ավելի պրոֆեսիոնալ լինելու դեպքում կարող է կանխարգելել: Ես այդքան ինֆորմացիա չունեմ այս հանցագործության մասին, որպեսզի դրա հետ կապված դատողություններ անեմ: Նորից եմ ասում՝ նրանց սպանողները տասնամյակներ շարունակ չպետք է արևի երես տեսնեն»:

Իոաննիսյանը կրկնում է՝ մարդկային չէ ողբերգության դեպքում քաղաքական շահարկումներ անելը:

Նկատենք, որ ՀՀ վարչապետ Նիկոլ Փաշինյանը, անդրադառնալով Մերձավանում տեղի ունեցած կրակոցներին և Փարաքար խոշորացված համայնքի ղեկավարի սպանությանը, սոցցանցերի իր էջերում գրառում էր կատարել՝ ընդգծելով. «Խստորեն դատապարտում եմ Փարաքար խոշորացված համայնքի Մերձավան բնակավայրում տեղի ունեցած լկտի զինված հարձակումը, որի հետևանքով սպանվել են համայնքի ղեկավար Վ․ Գրիգորյանը և նրա ընկերը։ Եվս մեկ վիրավորված անձ գտնվում է ծայրահեղ ծանր վիճակում։ Ցավակցում եմ սպանվածների հարազատներին և Փարաքարի սիրելի ժողովրդին։ Վիրավորում ստացած անձին մաղթում եմ շուտափույթ ապաքինում։

ՀՀ իրավապահները պարտավոր են շուտափույթ բացահայտել հանցագործության մեջ ներգրավված բոլոր անձանց։ Նաև մանրամասն վերլուծության պետք է ենթարկվի հարցը, թե կանխարգելիչ ինչպիսի գործողություններ պետք է կատարվեին Փարաքարում բռնությունների շարք թույլ չտալու համար, ովքեր պիտի կատարեին այդ գործողությունները և ինչու չեն կատարել։ Այս վերլուծությունից կարվեն անհրաժեշտ հետևություններ»: