Մեծ է, ոչ թե էն խեղկատակությունը. ինչու է Գյումրու Վարդանանց հրապարակում հայտնվել հին տոնածառի սյունը

Գյումրու տոնին ընդառաջ Վարդանանց հրապարակում հայտնվեց քաղաքի նախկին մայր տոնածառի հին սյունը: Ոմանք զարմացան, ոմանք տարակուսեցին. առաջին անգամ են տեսնում, որ Ամանորի տոնածառը սեպտեմբերի վերջին տեղադրվի:

Նրանք, ովքեր սպասում են, թե երբ են ավելանալու ճյուղերն ու խաղալիքները, կարող են չսպասել. չեն ավելանալու:

«Հայկական ժամանակ»-ի հետ զրույցում Գյումրու քաղաքապետարանի կոմունալ բաժնի ատասխանատու Անդրանիկ Չադրյանն ասում է՝ տեղադրել են, չափուձև անեն, թեքվածության պատճառը գտնեն, որ տանեն նորոգեն: Ընդամենը:

Ոչ մեկն էդ հին տոնածառը չի գնի, ծայրահեղ դեպքում կարելի է որպես ջարդոն հանձնել

Վերակենդանացման փուլում գտնվող այս թեք տոնածառը, սակայն, իր պատմությունն ունի և առաքելությունն ավարտել էր դեռ 2024-ի սեպտեմբերի 10-ին: Ծուռ ու վտանգավոր տոնածառի փոխարեն ավագանին որոշեց նորը գնել՝ շքեղ ու անվտանգ: Համայնքի բյուջեից 68 միլիոն դրամ էր տրամադրվելու տոնածառի, ևս 7 միլիոն դրամ էլ՝ Ամանորի հին դեկորների նորոգման ու նոր զարդարանքների ձեռքբերման համար։

Գյումրու ավագանու «Քաղաքացիական պայմանագիր» խմբակցության անդամ Լիլիթ Մուրադյանի հարցին, թե ինչ է լինելու հին տոնածառը, արդյոք հնարավոր չէ՞ օտարել ու ստացված գումարը տրամադրել նորի ձեռքբերմանը, քաղաքապետի խորհրդական Լենա Ջիլավյանը հստակ ասել էր՝ ո՛չ և մանրամասնել. «Ոչ մեկն էդ հին տոնածառը չի գնի, ծայրահեղ դեպքում կարելի է որպես ջարդոն հանձնել, անգամ մեր կողքի համայնքները դա չեն առնի, էդ մենք էինք, որ դիմացանք»:

Հետո Գյումրիում ջրերը պղտորվեցին, «Բալասանյան դաշինքը» յուր անդամներով կորավ, դեռ ձյուն չկար, բայց օրացուցային ձմեռը մոտենում էր: Քաղաքը ո՛չ տեր ուներ, ո՛չ տոնածառ:

2024-ի դեկտեմբերի 4-ին հայտնի դարձավ, որ Գյումրին տոնածառ, այնուամենայնիվ, ունենալու է: Վարչապետը խոստացավ, աշխատանքների պատասխանատվությունը ստանձնեց Շիրակի մարզպետը՝ համաձայն տարածքային կառավարման և ենթակառուցվածքների նախարար Դավիթ Խուդաթյանի հանձնարարականի:

Եվ, այո, Գյումրին ունեցավ 15 մետրանոց շքեղ, լուսավոր, գունավոր տոնածառ:

Չափուձև ենք անելու, հանենք տանենք արհեստանոց, սարքենք

Այս Ամանորը Գյումրին հավանաբար դիմավորելու է նախկին ավագանու որոշմամբ անպետք ու վտանգավոր համարված հին տոնածառով: Քաղաքապետարանը նախատեսում է նախկին պաշտոնյայի ասած ջարդոնի վերակենդանացմամբ շքեղ տոնածառ ունենալ հրապարակում: Հենց դրա համար էլ տարվա այս ժամանակահատվածում կանգնեցրել, ուսումնասիրում են:

Անդրանիկ Չադրյանը «Հայկական ժամանակ»-ի հետ զրույցում ասում է՝ իր կարծիքով՝ լավ բան են անում. ժողովրդին դուր կգա մեծ տոնածառը:

«Հավանական է էդ տոնածառը դրվի, մեծ, նորմալ տոնածառ է, ոչ թե էն փոքր խեղկատակությունը, կոպիտ ասած: Մենք երբ քաղաքում ունենք 20 քանի մետրանոց նորմալ տոնածառ, ընչի՞ բերենք 10 մետրանոցը դնենք, անունն ի՞նչ դնենք, մեր ժողովուրդը, մեր քաղաքը ումի՞ց է վատ, որ, ըսենք, լիարժեք չուրախանա ու մեծ տոնածառ չունենա: Ժողովրդին էլ բդի դուր գա, ավելի շքեղ, ավելի լավը, որ ունինք, ընչի՞ բերենք գաճաճ, կարճ տոնածառը: Դա Կառավարությունը, պարոն Փաշինյանը նվեր էր տվել»,- ասում է Չադրյանը:

Թե Կառավարության գնած տոնածառը որտեղ է, պաշտոնյան հստակ չգիտի: Ասում է՝ այդ հարցերով զբաղվելու փոխարեն ժամանակ չեն կորցնում նախկինի թերությունը գտնելու և շտկելու համար: Ըստ Չադրյանի՝ հենց այդ հարցը կարգավորվի, այլևս կարիք չի լինի տոնածառի ուղիղ տեսքն ապահովելու համար բետոնե ծանրոցներ և մետաղալարեր օգտագործել:

«Եթե մերը վաստանավիտ կարելի է էնել, նորմալ տեսքի բերել առանց տռոսի ձգելու, ավելի ճիշտ չէ՞»:

Հոկտեմբերի 4-ին Գյումրիում քաղաքի տոնն է նշվելու: Հարցին՝ արդյոք տոնածառի սյունը կմնա՞ տարածքում թե՞ ոչ, մինչ այդ կավարտվի՞ ուսումնասիրման աշխատանքը, Չադրյանը պատասխանում է. «Ավարտվի-չավարտվի, Գյումրու օրը չենք թողնելու, հանելու ենք»:

Ի դեպ, այդ հին տոնածառը Գյումրին ձեռք էր բերել 2000 թվականին։ Դրանից տասը տարի անց՝ 2015-ի հունվարին, ուժգին քամու հետևանքով այն շրջվել և վնասվել էր։ 2024-ին էլ համարվել էր ոչ պիտանի, որակվել ջարդոն: