Քննարկման առանցքում են եղել աշխատանքի և սոցիալական հարցերի ոլորտներում կատարված բարեփոխումներն ու անելիքները

ՀՀ ԱԺ «Քաղաքացիական պայմանագիր» խմբակցությունը փետրվարի 4-ին կազմակերպել էր աշխատանքային քննարկում, որի առանցքում աշխատանքի և սոցիալական հարցերի ոլորտներում կատարված բարեփոխումներն ու առաջիկա անելիքներն էին:

Բացելով քննարկումը՝ խմբակցության ղեկավար Հայկ Կոնջորյանն անդրադարձել է վերջին տարիներին սոցիալական պաշտպանության ոլորտում Կառավարության իրականացրած բարեփոխումներին՝ ընդգծելով դրանց բազմաշերտությունն ու ծավալայնությունը:

Աշխատանքի և սոցիալական հարցերի նախարար Արսեն Թորոսյանը կարևորել է նման ձևաչափով քննարկումը, ամփոփ անդրադարձել իրականացված աշխատանքներին:

«Աշխատանքի և սոցիալական հարցերի նախարարության պորտֆելը շատ մեծ է, լայնածավալ: Պետական բյուջեում մեր հատկացումներն ամենամեծն են՝ հաշվի առնելով շահառու քաղաքացիների մեծաթիվ լինելը: Մեր շահառուները մեր բոլոր քաղաքացիներն են իրենց կյանքի որևէ փուլում, և դա չափազանցություն չէ: Մենք ունենք 660 հազարից ավելի նպաստառուներ և կենսաթոշակառուներ, որոնք պետական բյուջեից ստանում են իրենց նպաստները և կենսաթոշակները: Ունենք այլ ծառայություններից օգտվող տասնյակ հազարավոր քաղաքացիներ»,- ասել է նախարարը:

Անդրադառնալով կենսաթոշակների հարցին՝ Արսեն Թորոսյանը պարզաբանել է, որ Կառավարությունն այդ հարցին վերջին տարիներին մոտենում է նորարարական գործիքներով, ինչը հետվճարն է: «660 հազարից ավելի մեր քաղաքացիները և որոշ այլ քաղաքացիներ, որոնք այլ տեսակի նպաստներ են ստանում, կարող են իրենց կենսաթոշակը կամ նպաստը ստանալիս առևտրի կետերից առևտուր անել անկանխիկ եղանակով և ստանալ հետվճար, որը մինչ հունվարի 1-ը եղել է 12 տոկոս և մինչև 6000 դրամ, իսկ հունվարից դարձել է 20 տոկոս՝ մինչև 10 հազար դրամ»,- պարզաբանել է Արսեն Թորոսյանը՝ ներկայացնելով տեսանելի արդյունքներն այս հատվածում: Նախարարը հայտնել է, որ մինչև ապրիլ լուծվելու է այն քաղաքացիների հարցը, որոնք տեղաշարժվելու խնդիր ունեն: Այդ քաղաքացիների բանկային քարտերը «Հայփոստի» միջոցով կուղարկվեն նրանց բնակության վայրեր:

Արսեն Թորոսյանը ներկայացրել է նաև աշխատատեղերի աճը, նշել, որ ավելացել է նաև գրանցված աշխատողների թիվը:

ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը հարցրել է՝ որքան աշխատատեղ է ավելացել Հայաստանում թավշյա, ոչ բռնի հեղափոխությունից հետո, ինչին ի պատասխան՝ նախարարը հայտնել է, որ այդ թիվը 281 հազարից ավելի է, այսինքն՝ հեղափոխությունից հետո ավելացել է այդքան մոտ 300 հազար աշխատատեղ: «Եթե ոմանք խոստանում են 300 հազար աշխատատեղ, մենք դա արել ենք, նույնիսկ առանց ասելու ենք արել»,-նկատել է նա:

«Քաղաքացիական պայմանագիր» խմբակցության պատգամավոր Մարիամ Պողոսյանն էլ հետաքրքրվել է Սահմանամերձ բնակավայրերում բնակարանային ապահովման ծրագրով (16 միլիոնի ծրագիր)՝ հարցնելով, թե շարունակվելու է այդ ծրագիրը, և որ գյուղերն են լինելու ծրագրում: Հայկ Կոնջորյանը ևս բարձրաձայնել է ֆեյսբուքյան օգտատերերի հետաքրքրվածությունն այդ ծրագրի հետ կապված: «Այդ ծրագրով արդեն ունենք 2384 հաստատված դիմում: Ունենք համայնքներ, որտեղ կառուցվել է համարյա 300 տուն: Տավուշի մարզի Կողբ գյուղում կառուցվել է 280 տուն: Կարող ենք ասել, որ սա շատ հաջողված ծրագիր է»,- ասել է նախարարը՝ հավելելով, որ 3 խմբի համար առաջիկայում մտադրություն կա վերաբացելու ծրագիրը:

«Քաղաքացիական պայմանագիր» խմբակցության պատգամավոր Լիլիթ Ստեփանյանը բարձրաձայնել է քաղաքացիներին հետաքրքրող մեկ այլ հարց, որը վերաբերում էր ութժամյա աշխատաժամանակը կրճատելուն ուղղված Կառավարության նախագծին: «Այս պահին փոփոխություններ չունենք: Քանի որ շատ ենք խոսում աշխատելու մասին և աշխատանքով հարցեր լուծելու մասին, կարծում եմ՝ պետք է կենտրոնանանք աշխատելու և ոչ թե չաշխատելու վրա»,- ասել է Արսեն Թորոսյանը՝ հավելելով, որ թեև ՀՆԱ-ի կրկնակի աճ կա այժմ, բայց դեռ պետք է շատ աշխատել՝ հասնելու Արևելյան Եվրոպայի, Արևմտյան Եվրոպայի երկրների բարեկեցությանը, աշխատանքի արտադրողականության այնպիսի աճին, որը թույլ կտա մտածել այդպիսի ծրագրերի մասին: