Հայ առաքելական եկեղեցու վիրահայոց թեմում մեծ սկանդալ է հասունանում

«Ոչ ոք այլեւս չի գնում թեմի առաջնորդի քարոզներին: Եթե դուք տեսնեք, թե ինչ է կատարվում հայկական եկեղեցում, դուք ուղղակի կլացեք: Նախ, այնտեղ ահավոր սակագներ են` պսակադրությունները` 300 հազար լարի, մկրտությունը` 100 հազար լարի: Մարդիկ գնում են վրացական եկեղեցիներ: Փաստեր կան, որ հայերի պսակադրությունները վրացական եկեղեցիներում են անում»,- մեզ հետ զրույցում ասաց Վրաստանի նախագահին, ինչպես նաեւ Վրաստանի օմբուդսմենին կից ազգային եւ կրոնական փոքրամասնությունների խորհրդի անդամ Գեորգի Էլիբեգովը:

Բայց սա թերեւս ամենամեղմ մեղադրանքն է, որ Էլիբեգովը մեր զրույցում ներկայացրեց Հայ առաքելական եկեղեցու վիրահայոց թեմի առաջնորդ տեր Վազգեն եպիսկոպոս Միրզախանյանին: Նա հայտնեց, որ արդեն մի քանի տարի է, թեմի առաջնորդից պահանջում են հայրապետական խորհուրդ ձեւավորել, ինչից վերջինս կտրականապես հրաժարվում է` հայտարարելով, թե միայն Աստված իրավունք ունի վերահսկել եկեղեցին, այլեւս ոչ ոք: «Մենք չգիտենք, թե ուր են գնում հայկական եկեղեցուն տրված գումարները»,- ասում էր Էլիբեգովը:

Ըստ նրա, եկեղեցուն հատկացված գումարները ոչ նպատակային ծախսելու կասկածներն առաջացել են, երբ Բիձինա Իվանիշվիլին 100 հազար լարի (մոտ 60 հազար դոլարից ավելի) է փոխանցել հայրապետական հաշվի վրա: «Երբ մենք Վազգեն Միրզախանյանից պահանջեցինք բացատրել, թե ուր են գնացել այդ գումարները, քանի որ ոչ ոք չէր տեսել, թե ուր են դրանք գնացել, մեզ ասացին, թե գումարը ծախսվել է սուրբ Գեւորգ եկեղեցու վերակառուցման վրա:

Մենք գտանք եկեղեցու հովանավորին, պարզվեց Ռուբեն Վարդանյանն է: Եկեղեցու վերականգնման ծախսերն ամբողջությամբ արվել են Ռուբեն Վարդանյանի ֆոնդով»,- պատմում էր Էլիբեգովը: Նա հայտնեց, որ եկեղեցուց պահանջել են փաստաթուղթ տրամադրել, թե ուր են գնացել այդ փողերը, բայց այդպես էլ պատասխան չեն ստացել: «Մեզ մոտ արդեն կասկածներ առաջացան, որ տրամադրվող գումարները շռայլվում են: Դրանից հետո եկեղեցու բակում պարզ չէ, թե որտեղից, երեք ջիփեր հայտնվեցին: Դուք լրագրող եք, հիմա ինձ բացատրեք նաեւ, թե ինչու եկեղեցին պետք է 11 ոչ կառավարական կազմակերպություն ունենա, որոնք փակ են գործում: Ամեն տարի 300 հազար դոլար է հատկացվում տարբեր միջոցառումների համար, բայց բացարձակապես ոչինչ չի արվում»,- Թբիլիսիից խիստ վրդովված տոնով ասում էր Գեորգի Էլիբեգովը:

Ու քանի որ Վրաստանի պետական բյուջեից հայկական եկեղեցուն (տեղի մյուս եկեղեցիներին եւս) տարեկան 1.3-1.5 միլիոն լարի է հատկացվում, Էլիբեգովը հայ համայնքի մի քանի ազդեցիկ անձանց հետ պահանջել է հանձնաժողով ստեղծել, որը կհետեւի, թե ուր են գնալու այդ գումարները: «Մի քանի հեղինակավոր մարդիկ հավաքվեցին եւ պահանջեցին հանձնաժողով ստեղծել, որպեսզի նա (թեմի առաջնորդը-հեղ.) չկարողանա շռայլել այդ գումարները: Ես հանդիպում ունեցա Վրաստանի նախագահի հետ, բացատրեցի, թե ինչու ենք մենք հասարակական հանձնաժողով ցանկանում: Մեր պահանջով արդեն ստեղծվում է պետական հանձնաժողով, որն առանձին կառույց է եւ զբաղվելու է այդ հարցերով: Թե ով կլինի այդ հանձնաժողովի կազմում, մենք կքննարկենք վարչապետի եւ մյուսների հետ: Այժմ հայկական սփյուռքի ներկայացուցիչներով պետք է հանդիպենք Վրաստանի ինտեգրման հարցերով նախարար Պաատա Զաքարեիշվիլիի հետ, նաեւ խորհրդարանի ղեկավար Դավիթ Ուսուպաշվիլին եւ վարչապետ Իրակլի Ղարիբաշվիլիին ենք նամակով դիմել»,- ասում էր Գեորգի Էլիբեգովը: Նա ակնարկեց նաեւ Վիրահայոց թեմի առաջնորդ Վազգեն եպիսկոպոս Միրզախանյանի կասկածելի վարքի մասին: «Գիտենք, որ ինչ-որ թեթեւաբարո աղջիկների հետ կապ ունի. բազմաթիվ մարդիկ կվկայեն, որ Վազգեն սրբազանը թեթեւաբարո կանանց հետ ռեստորանային արշավներ է կազմակերպում: Տեսել են ու կարող են դա ապացուցել»,- հայտարարեց Էլիբեգովը, որ թեմի առաջնորդի գործունեության մասին զանազան դրվագներ ներկայացնելիս պարբերաբար վրդովմունքի պոռթկումներ էր ունենում:

Մեր հարցին` արդյո՞ք այս ամենի մասին տեղյակ են պահել ամենայն հայոց կաթողիկոս Գարեգին Երկրորդին, Գեորգի Էլիբեգովն ասաց. «Ես կարծում եմ, կաթողիկոսն ամեն ինչ գիտի: Մենք նամակով կդիմենք կաթողիկոսին: Մենք հասնելու ենք նրան, որ իրեն հետ կանչեն: Ամեն ինչ իր չափն ունի: Սա կարող է շատ վատ ավարտ ունենալ»:

Երբ Մայր աթոռից փորձեցինք ճշտել, թե տեղյա՞կ են, որ նման խնդիրներ կան վիրահայոց թեմում եւ ինչպես են վերաբերվում թեմի առաջնորդին ներկայացված մեղադրանքներին ու ինչ միջոցներ են ձեռնարկվելու, տեղեկատվական համակարգից տեր Հուսիկ աբեղա Սմբատյանը պատասխանեց. «Մայր աթոռն արդեն հարցում է արել վիրահայոց թեմի առաջնորդին եւ համապատասխան տեղեկագիրը ստանալուց հետո տեղեկություններ կփոխանցի»: