Կանգառները տեղափոխում են` հանուն գործարարի շահի՞

Երեւանում հանրային տրանսպորտի այն կանգառները,  որոնք գտնվում են խոշոր խանութների կամ սպասարկման այլ օբյեկտների հարեւանությամբ, հետաքրքիր զուգադիպությամբ հերթով տեղափոխվում են:

Վերջին այդպիսի փոփոխությունը եղել է շուրջ մեկուկես ամիս առաջ` Մալաթիա-Սեբաստիա համայնքի Սեբաստիա փողոցում: «Մալաթիա» շուկայի մոտ գտնվող կանգառը, որը «Կոշիկի աշխարհ» խանութի եւ «Կարաս» սննդի կետի հարեւանությամբ էր, այլեւս գոյություն չունի: Արդյունքում` առեւտրի նշված կենտրոնները, որոնցից մեկը, տեղացիների համոզմամբ, կապվում է ԱԺ պատգամավոր Սամվել Ալեքսանյանի,  մյուսը` Սաշիկ Սարգսյանի անունների հետ (թեպետ նրանք, իհարկե, ընդհանրապես բիզնեսով չեն զբաղվում), ազատվել են մարդկանց եւ տրանսպորտային միջոցների կուտակումներից ու պոտենցիալ հաճախորդների համար դարձել են առավել նկատելի:

Իսկ նոր կանգառն այժմ գտնվում է մոտավորապես հարյուր մետր հեռավորության վրա: Ընդ որում, այդ տարածքում են դարձյալ պատգամավորի անվան հետ կապվող «Վեգա» տեխնիկայի խանութը եւ «Երեւան սիթի» սուպերմարկետը: Ու այնպես է ստացվել, որ նոր կանգառի տեղը բոլոր առումներով համար է մարդկանց բիզնեսներին: Այն խանութներից, որտեղից հաճախորդները մեծ մասամբ ծանր կամ ծավալով մեծ գնումներ են կատարում, հանրային տրանսպորտ նստելու համար ստիպված չեն երկար քայլել, իսկ առեւտրի մյուս կետերն էլ ազատվել են անցանկալի ստվերից:

Բայց ահա «Մալաթիա» շուկայից օգտվող քաղաքացիները, որոնց բեռները համեմատաբար շատ ավելի ծանր են լինում, այսուհետ ստիպված են բավական ճանապարհ կտրել` «նորանշանակ» կանգառ հասնելու համար: Եվ մեր հարցումները երեկ ցույց տվեցին, որ երեւանցիներից շատերը դժգոհ են այդ փոփոխությունից:

«Հարմար չի, «սետկաներով» շուկայից շալակած գալիս ենք, հարմա՞ր է: Չէ՛: Իսկ էնտեղ մոտիկ էր գոնե: Մի հատ նստարան գոյություն չունի` մարդիկ նստեն: Ասենք` ես տարիքով կին եմ, հիմա ի վիճակի չեմ կանգնել: Նստարան էնտեղ էլ չկար, բայց հենվում էի գոնե մի տեղ, անձրեւ էր գալիս՝ մտնում էինք խանութ: Կանգառը պետք է շուկայի մոտ լինի, ո՞վ է տեսել սենց բան: Էստեղ հատկապես շուկայի մարդկանց հարմար չէ: Կարող է հենց հիմա ինձ կարտոշկա է պետք, մի կես մեշոկ կարտոշկա եմ առել, կարա՞մ շալակեմ, բերեմ: Փողի թալակ է: Ամեն տեղ պետությունը մարդկանց քամում է, էդքան բան կարող եմ ասել, որ տաքսիներն աշխատեն, մարդիկ տրանսպորտի փող տան, տեղաշարժվեն»,- ասաց տիկին Քնարիկը եւ հաստատելով, որ կանգառի տեղափոխության նպատակը տաքսու վարորդներին հարստացնելն է, շտապեց բարձրանալ մոտեցած ավտոբուսը:

«Անհարմար է շատ: Մեծ տարիքով մարդ եմ, մի հինգ հարյուր մետր է, երկու հարյուր մետր է, հարյուր մետր է, բեռս ձեռքով պիտի վերցնեմ, գամ էստեղ, իսկ էն ժամանակ դուրս էինք գալիս շուկայից, կանգառը մոտիկ էր, ուզում էինք, որ շատ առեւտուր արած լինենք, կարողանում էինք տանել, բայց հիմա ինչո՞վ կարող ես տանել: Պիտի էսքան տեղը ձեռքով բերեմ. ես` հիվանդ մարդ, առողջությունս լավ չի, ստիպված քիչ եմ առնում, հարմար չի»,- իր դժգոհությունը հայտնեց 84-ամյա Վիլիկ պապը, որը երկրորդ խմբի հաշմանդամություն ունի: Նա նաեւ նկատեց, որ այս փոփոխության հեղինակներն ամեն ինչի մասին մտածել են, բացի ժողովրդի հարմարության: «Ես կուզենայի ասել, որ ժողովրդի մասին մտածող չկա: Կանգառն ինչո՞ւ են բերել էստեղ. երեւի էն խանութներին խանգարում էր, դիմացը փակում էր: Չգիտեմ, ես պարզաբանել չեմ կարող: Ուրեմն մեկի խանգարել է, որ ասել են` մարշներդ նվագեք, էստեղ դուք գործ չունեք: Վաղը մյուս օրն էլ կքանդեն, մի հատ մեծ շենք կսարքեն տեղը»,- կարծիք հայտնեց պապը:

Իսկ բավական ժամանակ առաջ էլ մի քանի մետր տեղաշարժվել էին Արաբկիր վարչական շրջանի Կիեւյան եւ Կասյան փողոցների կանգառատեղիները: Դրանցից մեկը գտնվում էր «Ռոբերտո», մյուսը` «Իդեալ» խանութների մոտ: Ու դարձյալ տպավորություն է, որ տնտեսվարողներն այստեղ շահագրգռվածություն են ունեցել:

Երեւանի քաղաքապետարանից գրավոր հարցմամբ փորձեցինք պարզել, թե ինչու է տեղափոխվել Սեբաստիա փողոցի վերոնշյալ կանգառը: Հետաքրքրվեցինք նաեւ Կիեւյան եւ Կասյան փողոցների հիշատակված կանգառների մասին: Եվ ստացված պատասխանից դուրս եկավ, որ կանգառներից երկուսում տրանսպորտային միջոցները տարիներ շարունակ կայանել են ապօրինի: «Մայրաքաղաքի Սեբաստիա փողոցում՝ «Կարաս» սննդի կետի դիմաց (Րաֆֆի եւ Վանթյան փողոցների միջնահատված) ընդհանուր օգտագործման տրանսպորտային միջոցների կանգառ երբեւիցե չի եղել, ուստի եւ ներկայումս կահավորված կանգառագոտին տեղափոխված չէ եւ սահմանված է Երեւանի քաղաքապետի դեռեւս 2010 թ. համապատասխան որոշմամբ»,- հայտնում են տրանսպորտի վարչությունից:

Ինչ վերաբերում է մյուս երկու կանգառներին, ապա նույն պատասխան գրության մեջ կարդում ենք. «Կասյան փողոցում՝ «Իդեալ» խանութի մոտ կանգառ նույնպես չի եղել, իսկ ներկայիս գործող կանգառի տեղը որոշվել եւ Երեւանի քաղաքապետի համապատասխան որոշմամբ սահմանվել է «Բարեկամություն» հրապարակում ուղեանցի կառուցումից հետո, որի արդյունքում առաջացել էր միահյուսվող ուղեգծերով տրանսպորտային հոսքերի վերադասավորման համար անվտանգ տարածություն ձեւավորելու անհրաժեշտություն։ Կիեւյան փողոցի կանգառագոտին իրոք տեղափոխվել է, սակայն ինչպես եւ վերոհիշյալ կանգառների դեպքում, դրա իրականացման հիմքում ընկած են ոչ թե այս կամ այն տնտեսվարողների շահերն ու հետաքրքրությունները, այլ դեպի Հր. Քոչար եւ Կասյան փողոցներ երթեւեկող ընդհանուր օգտագործման տրանսպորտային միջոցների համար անվտանգ վերադասավորման տարածություն ձեւավորելու (ստեղծելու) անհրաժեշտությունը»։