Ստեփանավանի այգու մոտ ամառանոց է կառուցվում. ինչ կապ ունի սեփականատերը դատախազի հետ ՖՈՏՈ

Ստեփանավանի «Ալեա» կոչվող այգու մոտ, անմիջապես ծառերի կողքին շինարարություն է ընթանում: Խմբագրություն դիմած քաղաքացին հայտնել է, որ ըստ քաղաքում տարածված տեղեկությունների տարածքը «դատախազի աներձագինն է»: Նույն խոսակցությունների համաձայն Ստեփանավանի քաղաքապետը խնդիրներ է ունեցել, դատախազը միջնորդել է, քաղաքապետն էլ լավության տակից որոշել է դուրս գալ այգու տարածքի հաշվին: 

Մեր այս տեղեկությունները Ստեփանավանի քաղաքապետարանում չմեկնաբանեցին: Ի պատասխան գրավոր հարցման՝ ի՞նչ շինարարություն է իրականացվում «Ալեա» կոչվող այգու տարածքում, Ստեփանավանի քաղաքապետարանի հասարակայնության հետ կապերի բաժնից ասացին.

«Ստեփանավանի «Ալեա» կոչվող տարածքում որեւէ շինարարություն չի իրականացվում: Շինարարական մի շարք աշխատանքներ ընթանում են  այգուն հարակից տարածքում, իրականացվող բոլոր շինարարությունների համար կան համապատասխան թույլտվություններ, որոնցում հստակ ամրագրված են պայմաններ, համաձայն որոնց այգուն որևէ վնաս չպետք է հասցվի: Այսուհանդերձ շինարարությունները իրականացվում են այգուց համապատասխան հեռավորության վրա, որը ինքնին բացառում է այգուն հասցվող որևէ վնաս: Քաղաքապետարանի համապատասխան ստորաբաժանումները մեծ ուշադրությամբ հետևում են շինարարական աշխատանքների ընթացքին, որպեսզի բացառվի ցանկացած գործողություն, որը կարող է վնաս հասցնել այգուն: Նշենք նաև, որ կա հատուկ պայման, որով բացառվում է որևէ ծառի հատում ինչպես այգու ներսում, այնպես էլ հարակից տարածքում»:

Այնուհետեւ մենք քաղաքապետարանի համապատասխան բաժնին ուղարկեցինք վերը տեղադրված լուսանկարը եւ հետաքրքրվեցինք, թե այդ նկարում երեւացող շինարարությունը ի՞նչ նախագծի հիմնա վրա է իրականացվում եւ ո՞վ է իրականացնում՝ ընդգծելով, որ ըստ մեզ փոխանցված տեղեկությունների՝ դատախազի հետ կապ ունի: Ի պատասխան մեզ հայտնեցին, որ մեր ուղարկած նկարում պատկերված տարածքը պատկանում է Աշոտ Բոչոլյանին:

«Տարածքը սեփականաշնորհված է: Սեփականատերը կառուցում է ամառանոց՝ քաղաքապետարանի կողմից տրված շին. թույլտվությամբ»,- ասվում էր քաղաքապետարանի հասարակայնության հետ կապերի եւ տեղեկատվության վարչության պարզաբանման մեջ: 

Թե ով է Աշոտ Բոչոլյանը, մեզ չհաջողվեց պարզել ստեփանավանցիներից: Չի բացառվում, որ շինթույլտվությունը տրամադրվել է  ուղղակի ինչ-որ մեկի բարեկամի անունով: Պարզեցինք միայն, որ թույլտվությունը տրամադրել է դեռեւս նախկին քաղաքապետ Սարգիս Ղարաքեշիշյանը, ուղղակի շինարարությունն է հիմա սկսվել: 

Ստեփանավանում գործող «Լոռե» Էկո ակումբ» հասարակական կազմակերպության նախագահ Մանյա Մելիքջանյանը մեզ հետ զրույցում ասաց, որ տեղյակ է կատարվող շինարարությանը, քաղաքապետի հետ գնացել, նայել են այդ տարածքը եւ պարզել, որ սեփականության վկայականը կա, շինարարությունը օրինական է:

Ստացվում է, որ բոլորը նախորդ քաղաքապետի որոշումն անուղղելի եւ անկասելի են համարել ու քաշվել մի կողմ՝ հաշվի առնելով, որ համայնքներում շինարարությունն իրականացվում է քաղաքապետի թույլտվությամբ եւ ավագանու որոշմամբ: Իսկ Հայաստանում կա Քաղաքաշինության նախարարություն, որը կարող է քաղաքաշինական նորմերին հակասող համարել այդպիսին համարվող կառույցը: 

Քաղաքաշինության նախարարությունից հետաքրքրվեցինք՝ արդյո՞ք այդ շինարարության մասին տեղյակ են եւ այն համարում են քաղաքաշինական նորմերին համապատասխան: Քաղաքաշինության նախարարի մամուլի խոսնակ Անահիտ Եսայանն ասաց, որ ծանոթ չէ խնդրին, սակայն եթե դիմում լինի՝ համապատասխան վարչությունը կուսումնասիրի: