Որդի Խաչատուրովի արկածները

Սերժ Սարգսյանը հինգշաբթի օրը ՀՀ ԶՈՒ գլխավոր շտաբի պետ Յուրի Խաչատուրովի որդուն՝ գնդապետ Գրիգորի Խաչատուրովին, նշանակեց Պաշտպանության նախարարության երրորդ բանակային կորպուսի հրամանատար՝ կնքելով պայմանագիր հինգ տարի ժամկետով: Ընդ որում, նրան այդ պաշտոնին նշանակելու համար այնտեղից ազատեց գեներալ-մայոր Օնիկ Գասպարյանին՝ նշանակելով արդեն Յուրի Խաչատուրովի տեղակալ։

Որդի Խաչատուրովի նշանակումը բավական բացասական արձագանք ունեցավ հասարակական շրջանակներում այն առումով, որ այդ երիտասարդ զինվորականը մինչ այժմ հայտնի է եղել որպես խիստ բացասական համարում ունեցող սպա թե՛ պաշտպանության համակարգում, թե՛ հասարակական-քաղաքական շրջանակներում: Նա հայտնի է որպես անվերահսկելի զինվորական, քանի որ վայելել է հոր՝ ՊՆ-ում երկրորդ մարդու լիակատար ու բազմակողմանի հովանավորությունը: Հիշեցնենք, Գրիգորի Խաչատուրովի անունը շոշափվել է մի շարք աղմկոտ պատմությունների ու հանցագործությունների հետ: Օրինակ, 2010 թվականին Գրիգորի կամ Գրիշա Խաչատուրովը հայտնի դարձավ Արարատի մարզի Վազգեն Սարգսյանի անվան զորամասում տեղի ունեցած չարաշահումների շրջանակներում: Հիշեցնենք, որ այդ զորամասի գումարտակի հրամանատար, «Ռոժ» մականունով հայտնի Վարդան Մարտիրոսյանն ու գնդի հրամանատարի անձնակազմի հետ տարվող աշխատանքների գծով տեղակալ Արթուր Կարապետյանը մեղադրվում էին զինվորներից գումարներ շորթելու մեջ: Նրանք զինվորներին ստիպել էին, որ բանկերից տարբեր չափի վարկեր վերցնեն ու տան իրենց: Հետո զինվորները չէին կարողացել մարել այդ վարկերն, ու այդպիսով հրամանատարների դրամաշորթությունը բացահայտվել էր: Գրիգորի Խաչատուրովն այդ զորամասի հրամանատարն էր, եւ կարծիք կար, որ սույն չարաշահումները կատարվել են հենց նրա գիտությամբ ու հովանավորությամբ: Թեեւ որդի Խաչատուրովն ինքը լրագրողների հետ զրույցում այդ գործը «սարքված» էր համարել:

Բայց կարճ ժամանակ՝ մոտ մեկ տարի հետո գործը կարճվեց «գործուն զղջման» հիմքով եւ ոչ թե հանցակազմի բացակայության պատճառով: Իր գործընկերների հետ միասին Գրիգորի Խաչատուրովը որոշ ժամանակ դադարեցրեց զինծառայությունը, բայց մամուլի հրապարակումների համաձայն՝ դեպքից մոտ մեկ տարի հետո իր թիմով նորից վերականգնվեց: Իսկ 2013 թվականի այդ օրերին մամուլում հրապարակումներ տարածվեցին, թե Գրիգորի Խաչատուրովը Տավուշի մարզի զորամասերից մեկում հարբած վիճակում ծեծի է ենթարկել չորս զինվորի: Եվ ահա այս ու նման այլ պատմություններից հետո վերջինս երկու օր առաջ նշանակվում է բարձր պաշտոնի՝ երրորդ բանակային կորպուսի հրամանատար:

Արդյոք անցյալում Գրիգորի Խաչատուրովի անվանն առնչվող այս պատմությունների դեպքում ճի՞շտ էր նրան նման բարձր պաշտոնի նշանակելը: Պաշտպանության նախարարի մամուլի խոսնակ Արծրուն Հովհաննիսյանը չցանկացավ մեկնաբանություն տալ՝ ասելով, որ նման պաշտոններին նշանակումներն ու ազատումները տեղի են ունենում գերագույն գլխավոր հրամանատարի կողմից: «Եվ մենք չենք կարող մեկնաբանել նրա ոչ ազատման, ոչ էլ նշանակման հրամանները»,- պատասխանեց Արծրուն Հովհաննիսյանը:

Պաշտպանության նախարարությանն առընթեր Հանրային խորհրդի ղեկավար Գեղամ Հարությունյանն էլ չի ընդունում, որ Արարատի մարզի այդ զորամասում եղած չարաշահումները տեղի են ունեցել Գրիգորի Խաչատուրովի մասնակցությամբ կամ, միգուցե, գիտությամբ: «Ո՞վ է ասել, որ նա չարաշահումներ է արել: Չարաշահումների մեջ մեղադրվելը մի բան է, չարաշահումներ թույլ տալը՝ մեկ այլ բան: Ամենատարբեր կարծիքներ կարող են լինել, բայց դա չի կարող նշանակել, որ այդ խոսակցությունները հավաստի են, եւ դրանք պետք է ընդունել որպես ճշմարտություն: Գրիգորի Խաչատուրովը ամենապատրաստված եւ արժանավոր սպաներից մեկն է, որի նշանակումը անձամբ ես ճիշտ եմ համարում»,- ասաց Գեղամ Հարությունյանը:

Վերջինս հավելեց, թե 2014-2016 թվականներին Գրիգորի Խաչատուրովը վերապատրաստվել է Ռուսաստանի ԶՈՒ գլխավոր շտաբի ռազմական ակադեմիայում: Եվ ընդամենը վերջերս է վերադարձել Հայաստան ու միանգամից նշանակվել է ՊՆ երրորդ բանակային կորպուսի հրամանատար: Գեղամ Հարությունյանը նաեւ համաձայն չէ այն կարծիքների հետ, թե Գրիգորի Խաչատուրովի անվանն առնչվող չարաշահումների կամ հանցագործությունների գործերը կարճվել են հայր Խաչատուրովի միջամտությամբ: Կամ նա հենց հոր հովանավորությամբ է բանակում նման բարձր պաշտոններ ստանում: «Մեկ այլ առիթով կասեինք, որ դինաստիական ավանդույթները շատ լավ են, կխրախուսեինք այդ երեւույթը, որ զինվորականի որդին զինվորական է դառնում: Եթե նա ընտրել է հոր ճանապարհն ու զինվորական է դարձել, ի՞նչ է, հոր պատճառով առաջխաղացում չպե՞տք է ունենա: Լավ կարծիք ունեմ իր մասին»:

Եվս մի կարեւոր հանգամանք՝ երրորդ բանակային կորպուսն իր մեջ ներառում է Տավուշի մարզի ողջ զորամիավորումները: Իսկ Տավուշը, ինչպես գիտենք, պաշտպանական առումով բավականին վտանգավոր հատված է: Ադրբեջանը հայկական սահմանները հենց այդ հատվածից է պարբերաբար գնդակոծում եւ երբեմն մարդկային կորուստներ պատճառում: Հենց երեկ ադրբեջանական զինուժը մոտ մեկ ժամ հրաձգային զենքերից կրակ էր բացել Հայաստան-Վրաստան միջպետական ավտոճանապարհի մաս կազմող Ոսկեպար-Բաղանիս ճանապարհի վրա:

«Ես էլ եմ լսել Գրիգորի Խաչատուրովին առնչվող այդ պատմությունները: Եվ եթե այդ տարածքում նա ինչ-որ պահի չկարողանա արդարացնել իրեն, ապա ծանր արդյունքներ կբերի թե՛ նշանակողի, թե բոլորիս համար: Նշանակելն իրենց գործն է, թող նշանակեն, բայց եթե նա սխալվի, կունենանք լուրջ խնդիրներ: Բայց ես չեմ ցանկանում, որ իրենց այդ նշանակումների պատճառով մենք նորից անտեղի զոհեր ունենանք»,- իր հերթին մեկնաբանեց ազատամարտիկ Սուրեն Սարգսյանը:

Արմինե Ավետյան