Կյանքն էլիտար շենքերում

Եւ այսօր իր քարե սառնությամբ կանգնած է, օրինակ, Հյուսիսային պողոտան` թվում է` գրեթե դատարկ ու անմարդաբնակ: ՀՀ նախկին վարչապետ Հրանտ Բագրատյանը վերջերս հայտարարել էր, թե իրականացված էլիտար շինարարության պահանջարկը չկար, ու հազարավոր բնակարաններ չվաճառված են մնացել: Օրերս մենք փորձեցինք պարզել, թե շատերի արցունքների վրա կառուցված, մասնավորապես, Հյուսիսային պողոտայում կոնկրետ որքան բնակարան կա, եւ դրանցից քանիսն է վաճառված: Այս հարցին պատասխանող պետական կառույցը, սակայն, այդպես էլ չգտնվեց` մեկը մյուսին էր մատնացույց անում, 2-րդը` 3-րդին: ՀՀ կառավարությանն առընթեր կադաստրի պետական կոմիտեից մեզ համոզում էին, թե իրենց մոտ դա ֆիքսվում է միայն միավորներով եւ հնարավոր չէ ասել` տվյալ միավոր բնակարանը արդյո՞ք Հյուսիսային պողոտայում է գտնվում: Քաղաքաշինության նախարարությունում եւս բանից անտեղյակ էին: Երեւանի քաղաքապետարանի հողի վերահսկողության վարչության պետ Հայկ Ասատրյանը նույնպես մեզ հետ զրույցում վստահեցրեց, թե քաղաքապետարանը նման տեղեկությունների չի տիրապետում: «Ինչ վերաբերում է Հյուսիսային պողոտայում կառուցված շենքերի քանակին, ապա թվով 7 շենքի շինարարության ավարտի փաստագրման ակտերը տրամադրվել են իրենց (խոսքը կառուցապատողների մասին է -խմբ.), որից հետո, ըստ էության, նրանք պետք է դիմեն Կադաստրի պետական կոմիտե, որպեսզի պետական գրանցում ստանան... Դրա համար, տեխնիկապես էլ, մեր գործառույթների մեջ չի մտնում, որ մենք տեղեկություններ ունենանք, թե քանի բնակարան է վաճառված, քանիսը` ոչ»,- ասաց նա` հավելելով, որ 4 բազմաբնակարան շենք էլ դեռեւս գտնվում է կառուցման փուլում: Իսկ ուշ երեկոյան, շրջելով էլիտար այս պողոտայում, շենքերի պատուհաններին ընդամենը հատուկենտ վառվող լույսեր կարելի է հաշվել: Մեզ 30-ի չափ հաջողվեց: Իսկ ապակեպատ դռներից ընդարձակ շքամուտք մտնողին այստեղ դիմավորում են անվտանգության ծառայության բարեհամբույր աշխատակիցը կամ աշխատակիցները եւ հետաքրքրվում` ո՞ւմ տուն եք գնում: Նրանցից մեզ հետ զրուցածները վստահեցնում էին, որ թեեւ կոնկրետ իրենց կողմից հսկվող շենքում այժմ քիչ բնակվող կա, այնուամենայնիվ, բոլոր բնակարանները վաճառված են: Իսկ անվտանգության աշխատակիցների մատուցած ծառայության դիմաց վճարում են էլիտար շենքերի էլիտար բնակիչները` որպես սպասարկման վարձ: Այս պողոտայում, ինչպես հայտնի է, ծառեր գոյություն չունեն: Բակերում խաղահրապարակներ եւս չկան, թեեւ բակեր էլ` որպես այդպիսին, կարելի է ասել, չերեւացին: Շենքերի արանքում ընկած փոքրիկ տարածքներում կայանած ավտոմեքենաներ էին ու հատուկենտ կարուսելներ: Որոշ դեպքերում խաղահրապարակի պես մի բան` շատրվանով հանդերձ, կա անմիջապես շենքի ներսում: Մի շարք պատշգամբներում շարված են այն ծաղկամաններից` ծաղիկներով, որոնք վերջին շրջանում առանձնապես են հայտնի, քանի որ Երեւանի քաղաքապետարանն է իր կանաչապատում ու ծաղկապատում ակցիայի շրջանակներում դրանցից տեղադրում մայրաքաղաքի տարբեր հատվածներում: Իսկ պողոտայի` դեռեւս անավարտ շենքերից մեկի երկայնքով, որպես ընթացող աշխատանքները փակելու միջոց, մի պաստառ էր ձգված` վրան գրված` «Սիրում եմ քեզ, Երեւան»: Երեւանն` այո, իսկ երեւանցիներին, փաստորեն` ոչ, որովհետեւ Երեւանում, ինչպես, ասենք, Հյուսիսային պողոտայում, ամեն մի քառակուսի մետր հողատարածքից փող սարքելու հնարավորություն կա, իսկ տվյալ տարածքում ապրող մարդիկ, ոչ էլիտար, իհարկե, այդ ճանապարհին միայն բարդություններ են ստեղծում: Քանի որ Հյուսիսային պողոտայի տարածքում ապրած եւ պետության կարիքների համար տնավեր դարձած բնակիչները իրենց բնակարանների դիմաց խիստ անհամարժեք փոխհատուցում էին ստացել, այն էլ` մաս-մաս, ու հետեւաբար` քչերն էին հնարավորություն ունեցել թեկուզ շատ փոքր, ու թեկուզ ծայրամասում բնակարան գնել, փորձեցինք պարզել, թե այսօրվա դրությամբ ի՞նչ վիճակ է` որտե՞ղ են այն ընտանիքները, որոնք այդպես էլ չհասկացան, թե պետության այդ ի՞նչ կարիք էր, որի պատճառով իրենք պետք է լքեին իրենց բնակարանները, ո՞ր մասն է վարձով բնակվում: «Պետական կարիքների զոհեր» հասարակական կազմակերպության նախագահ Սեդրակ Բաղդասարյանը մեզ հետ զրույցում նշեց, որ խոսքը տասնյակից ավելի ընտանիքների մասին է: Ու այս մարդիկ չեն դադարեցնում արդեն տարիներ ձգվող իրենց պայքարը: Նրանք պահանջում են համարժեք փոխհատուցում: 3 այդպիսի գործ, Ս. Բաղդասարյանի փոխանցմամբ, հ/կ-ի աջակցությամբ կազմվել եւ ուղարկվել է Եվրադատարան: Եւս 2-ը` նախապատրաստման փուլում են, որոնք նախադեպ կդառնան հաջորդ գործերի համար: Մեր իշխանությունների գործուն աջակցությամբ իրենց տներից վտարված մարդկանց համար ոչ միայն կառուցվող բազմաթիվ բնակարանների մի չնչին մասը խնայվեց, այլեւ, հասարակական կազմակերպության նախագահի տվյալներով, 3-4 անգամ նրանց պակաս վճարվեց: Մինչդեռ, էլիտար շինարարության ապահոված շահույթը, դարձյալ Հ. Բագրատյանի ներկայացրած թվերով, 800 % է կազմում: Հիշեցնենք նաեւ, որ Հյուսիսային պողոտայում կառուցապատում իրականացնելու ծրագիրը կառավարությունը հաստատել է 2000 թվականին: Իսկ արդեն 2007-ին պողոտան բացվեց, որի կառուցապատման աշխատանքներին անձամբ Ռոբերտ Քոչարյանն էր հետեւում: