Վահան Խաչատրյանը կհրաժարվի մանդատից, Հովհ. Մարգարյանը՝ չի որոշել. ով է ցուցակում հաջորդը

Հոկտեմբերի 2-ին Գյումրիում տեղի ունեցած ավագանու ընտրություններում «ԳԱԼԱ» կուսակցության ցուցակը գլխավորած Վահան Խաչատրյանը ինքնաբացարկ կներկայացնի եւ չի ընդգրկվի նոր ձեւավորվող ավագանու կազմում: Այդ մասին մեզ հետ զրույցում հայտնեց Խաչատրյանը՝ չնշելով պատճառները:

Հարցին, թե կուսակցության ցուցակում այլ ինքնաբացարկներ կլինե՞ն՝ Խաչատրյանը պատասխանեց. «Դեռ որոշված չէ, քննարկումներ են ընթանում»:

Նշենք, որ ընտրությունների նախնական արդյունքներով «ԳԱԼԱ»-ն ստանալու է 4 մանդատ: Ցուցակում Վահան Խաչատրյանին հաջորդող 4 անձինք են՝ «Ասպարեզ» ակումբի խորհրդի նախագահ, գործող ավագանու անդամ Լեւոն Բարսեղյանը, «galatv.am» կայքի գլխավոր խմբագիր Քրիստինա Մկրտչյանը, «Թիմ ռեսուրս» քաղաքական նախաձեռնությունների ՀԿ հաղորդման հեղինակ Արմենուհի Վարդանյանը, երաժիշտ Արամ Խաչատրյանը:

Գյումրու ընտրություններում անցողիկ շեմը հաղթահարած հաջորդ կուսակցությունը «Հայկական վերածնունդն» է (նախկին ՕԵԿ-ը): Այս կուսակցության ցուցակը գլխավորող Հովհաննես Մարգարյանը Գյումրու ավագանու մանդատը վերցնելու մասին մեր հարցին այսպես պատասխանեց. «Երբ որոշում կայացվեց, որ մենք մանդատ ունենք, այդ ժամանակ կպատասխանեմ: Դեռ որոշում չկա, Ընտրատարածքային ընտրական հանձնաժողովներում բողոքներ կան եւ մինչեւ այդ բողոքները օրենքով սահմանված կարգով չուսումնասիրվեն՝ որոշում չի կայացվի: Կարող է անվավեր է ճանաչվում այս ընտրությունը՝ չեղած բանի համար ի՞նչ որոշում ասենք»: Մարգարյանն ասաց, որ «Հայկական վերածնունդը» վերահաշվարկի պահանջներ ներկայացրել է ԸԸՀ:

Հիշեցնենք, որ Գյումրու ընտրություններում գրանցած արդյունքներով «Հայկական վերածնունդը» ստանալու է 5 մանդատ: Ցուցակում պատգամավոր Հովհաննես Մարգարյանին հաջորդում են «Անի» տեխնիկական անվտանգության ազգային կենտրոնի բաժնի պետ Սաշա Մարտիրոսյանը, Եվրոպական կրթական տարածաշրջանային ակադեմիայի Գյումրու մասնաճյուղի ռեկտոր Հասմիկ Եղիազարյանը, «Գազպրոմ-Արմենիա» ՓԲԸ իրացման բաժնի ճարտարագետ Ավետիս Առաքելյանը, Շիրակի գազաֆիկացման-գազամատակարարման մասնաճյուղի փականագործ Հենրիկ Պողոսյանը, Գյումրու թիվ 38 հիմնական դպրոցի տնօրեն Գոհարիկ Շահբազյանը:

Ընտրություններում ՀՀԿ-ից հետո երկրորդ տեղը զբաղեցրած ԲՀԿ-ի ցուցակը, ինչպես հայտնի է, գլխավորում է Գյումրու Մանկավարժական համալսարանի նախկին ռեկտոր Վարդեւան Գրիգորյանը: Այս կուսակցությունում եւս դեռեւս քննարկումների մեջ են: Ցուցակի երկրորդ համարը զբաղեցնող Հայաստանի օլիմպիական կոմիտեի Շիրակի մարզի ներկայացուցչության տնօրեն Արմեն Բադեյանը Գրիգորյանի վերաբերյալ մեր հարցին ի պատասխան ասաց. «Քուր ջան, ընենց հարցեր կուտաք...Մենք մեր կուսակցությունով դեռ որոշում չունենք»:

Հարցին՝ դուք ինքնաբացարկ ներկայացնելո՞ւ եք՝ Բադեյանը պատասխանեց. «Ինչի՞ համար ինքնաբացարկ ներկայացնեմ...Մենք դեռ չենք որոշել, ընդհանուր մեր թիմով կորոշենք՝ կասենք, որովհետեւ հարցեր կան, քննարկում ենք»: 

ԲՀԿ-ին ընտրությունների նախնական արդյունքներով 9 մանդատ է բաժին ընկնում 33 հոգանոց ավագանու կազմում:

Ինչ վերաբերում է ՀՀԿ-ՀՔԴՄ դաշինքի ցուցակին՝ այն գլխավորում է Սամվել Բալասանյանը, որը ոչ միայն չի ուզում հրաժարվել մանդատից, այլեւ ցանկանում է Գյումրու քաղաքապետը մնալ:

Հիշեցնենք, որ Գյումրու ընտրություններին մասնակցող կուսակցական ցուցակներում ընդգրկված անձինք մանդատ կարող են ստանալ միայն ընտրությունների վերջնական արդյունքների ամփոփումից, ԸԸՀ համապատասխան որոշումից եւ մանդատների բաշխումից հետո: Գյումրիում ընտրությունների վերջնական արդյունքները կհրապարակվեն առաջիկա կիրակի (քվեարկության օրվան հաջորդող 7-րդ օրը): Դրան կհաջորդի մանդատների բաշխումը: Այդ փուլից հետո ցուցակներում ընդգրկված անձինք կարող են հրաժարվել մանդատից:

ՀՀ ընտրական օրենսգրքի համաձայն՝ «Մանդատից հրաժարված կամ ընտրված և լիազորությունները վաղաժամկետ դադարած ավագանու անդամի մանդատը համապատասխան ընտրական հանձնաժողովի արձանագրությամբ այդ մասին հանձնաժողովին իրազեկելուց հետո՝ մեկշաբաթյա ժամկետում, տրվում է այդ կուսակցության, (կուսակցությունների դաշինքի) ընտրական ցուցակի հերթական հաջորդ թեկնածուին»: