Մոսկվայում սպանված հայերից մեկը Ս. Ալեքսանյանի աշխատակից Ձկնկուլն է (տեսանյութ)

17:06. ՀՀ ԱԺ պատգամավոր Սամվել Ալեքսանյանի նախկին աշխատակից Արմեն Իսրայելյանի (Ձկնկուլ մականվամբ) կինը՝ Քրիստինեն, Armtiems.com-ի հետ զրույցում այսօր հաստատեց, որ Մոսկվայում սպանված ՀՀ քաղաքացիներից մեկն իր ամուսինն է:

Նրա խոսքով՝ դեպքից ժամեր առաջ խոսել է ամուսնու հետ, սակայն իրադարձությունների նման ընթացք հեռախոսազրույցում չի նշմարվել: Քրիստինեն հրաժարվեց այլ մանրամասներ ներկայացնել:

Ավելի ուշ Armtimes.com-ին հայտնի դարձավ, որ մյուս սպանվածը՝ Էդուարդ Նշանյանը (Մականունը Ճուտ), նույնպես որոշ ժամանակ աշխատել է ՀՀ ԱԺ պատգամավոր Սամվել Ալեքսանյանի ընկերություններից մեկում, սակայն դեպքից ամիսներ առաջ ազատվել է աշխատանքից:

Էդուարդ Նշանյան ու Արմեն Իսրայելյանը մոտ երկու շաբաթ առաջ միասին մեկնել են ՌԴ: Դա եղել է այն բանից հետո, երբ Արմեն Իսրայելյանն ու Սամվել Ալեքսանյանն իրենց «հաշիվները պարզել էին»: Այս մասին Արմեն Իսրայելյանն էլ է իր հարցազրույցներից մեկում հայտարարել:

16:50. Ռուսական  հայտնի Life.ru կայքը որոշ տվյալներ է հրապարակել երեկ Մոսկվայում Հայաստանի երկու քաղաքացիների սպանության վերաբերյալ: Մասնավորապես, հստակեցվում է, որ սպանությունը տեղի է ունեցել Շչերբինկա շրջանում:

Պարզվել է, որ ենթադրյալ մարդասպանը իր զոհերի վրա 7 կրակոց է արձակել: Բնակարանը պատկանել է սպանվածներից մեկին:

Բացի այդ, նշվում է, որ սպանվողները, ենթադրաբար, գործարարներ են:

Սպանության վայրում աշխատում է օպերատիվ-քննաչական խումբը:

16:48. Մեր տեղեկություններով, ՀՀ ԱԺ պատգամավոր Սամվել Ալեքսանյանի նախկին աշխատակից Արմեն Իսրայելյանը (մականունը՝ Ձկնկուլ) եւ Էդուարդ Նշանյանը (մականունը՝ Ճուտ) հրազենային մահացու վնասվածք են ստացել գլխի շրջանում:

Նույն այդ տեղեկություններով, Էդուարդ Նշանյանի քույրը՝ Հասմիկ Նշանյանը հոկտեմբերի 17-ից չի կարողացել կապ հաստատել եղբոր հետ եւ դիմել է ոստիկանություն: Ըստ այդմ՝ Արմեն Իսրայելյանն ու ընկերը սպանվել են մի քանի օր առաջ, իսկ ՌԴ իրավապահները նրանց դիերը հայտնաբերել են երեկ:

14:20. Մեր տեղեկություններով, այսօր Մոսկվայում սպանված հայերի`Արմեն Իսրայելյանի (մականունը Ձկնկուլ) եւ Էդուարդ Նշանյանի (մականունը` Ճուտ) սպանության մեջ կասկածվում է ազգությամբ հայ, որի նկատմամբ հայտարարվել է հետախուզում:

ՌԴ-ում ՀՀ դեսապանատան մամուլի խոսնակ Լեւոն Թորգոմյանը քիչ առաջ մեզ հայտնեց, որ սպանված Է. Նշանյանը (1973թ.) եւ Ա. Իսրայելյանը (1970թ) գրանցված են քաղաք Երեւանում, դեսպանատան տեղեկություններով` չեն աշխատել, իսկ թե երբ են Մոսկվա տեղափոխված եղել, դեսապանատունը տեղեկություն չունի: Լեւոն Թորգոմյանը մեզ հայտնեց, որ ՀՀ քննչական մարմինները մշտական կապի մեջ են գտնվում Ռուսաստանի Դաշնության համապատասխան մարմնի հետ եւ լրացուցիչ տեղեկություն ստանալուն պես դրանք կհրապարակվեն:

Նշենք, որ Արմեն Իսրայելյանն ու Էդուարդ Նշանյանը սպանվել են հրազենից:

ՌԴ գլխավոր քննչական կոմիտեում հարուցվել է քրեական գործ ՌԴ քրեական օրենսգրքի 105 հոդվածի 2-րդ մասով (2 եւ ավելի անձանց սպանություն): ՌԴ քննչական կոմիտեից հայտնում են, որ սպանությունը տեղի է ունեցել այսօր, Նոր Մոսկվայի Ռոդնիկի միկրոշրջանում: Ըստ այդմ, արտաքին զննությամբ, սպանված 46-ամյա Իսրայելյանի եւ 39-ամյա Նշանյանի մարմնի վրա հայտնաբերվել են հրազենային վնասվածքներ: Սպանվածները բնակվելիս են եղել վարձակալած բնակարանում:

ՌԴ Քննչական կոմիտեն հայտնում է նաեւ, որ հարցաքննվում են հարեւանները, հնարավոր ականատեսները:

Ռուսական «ren.tv»-ի թղթակիցը զրուցել է սպանվածների հարեւանի հետ:  

13:00. Ռուսաստանի իշխանությունների տրամադրած տեղեկատվությամբ՝ հայտնի է հոկտեմբերի 23-ին Մոսկվայում սպանված ՀՀ քաղաքացիների ինքնությունը: Առկա է գործով կասկածյալ, ով ներկայում գտնվում է հետախուզման մեջ:

Այս մասին իր ֆեյսբուքյան էջում գրել է ՀՀ ԱԳՆ մամլո խոսնակ Տիգրան Բալայանը: Վերջինս անուններ չի հրապարակել: Մեր տեղեկություններով սպանվածներն են Երեւանի բնակիչներ 46-ամյա Արմեն Իսրայելյանը եւ 43-ամյա Էդուարդ Նշանյանը:

Արդեն տեղեկություններ են տարածվել, որ Արմեն Իսրայելյանը նույն ինքը հայտնի Ձկնկուլն է, որը նախկինում աշխատել է ՀՀ ԱԺ պատգամավոր Սամվել Ալեքսանյանի մոտ: Տարածված տեղեկությունների համաձայն Էդուարդ Նշանյանն էլ հայտնի է Ճուտ մականվամբ: 

Տեղեկությունները պաշտոնապես դեռ չեն հաստատվում: Արմեն Իսրայելյանի կինը՝ Քրիստինեն, հեռախոսազանգերին չի պատասխանում: Սամվել Ալեքսանյանն այսօր Ազգային ժողով չի գնացել:

Հիշեցնենք, որ Ալեքսանյանի նախկին աշխատակից Արմեն Իսրայելյանը, որը 2002-ից աշխատել է ՀՀ ԱԺ պատգամավոր Սամվել Ալեքսանայնին պատկանող ընկերություններից մեկում, armtimes.com-ի թղթակցին պատմել էր, թե ինչպես է Ալեքսանյանն առեւանգել իրեն, խլել բիզնեսները: Մեր հրապարակումից հետո ՀՔԾ-ում մի քանի դրվագներով քրեական գործ հարուցվեց, սակայն Ձկնկուլը 19 օրվա մեջ 19 տարբեր հերքումներով հանդես եկավ՝ մեկ նշելով, թե խմած է հարցազրույց տվել, մեկ էլ՝ թե տեղյակ չի եղել, որ զրուցակիցը լրագրող է եղել, այլ իմացել է, որ «իր ընտանիքի անդամ է»: