Լավրովյան առաջարկները մնացին օդում. Կիրո Մանոյան

ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանի կարծիքով ԼՂ հակամարտության բանակցություններում «նորություններ չեն լինի»:

Այս մասին լրագրողների հետ հանդիպմանն ասաց Մանոյանը՝ անդրադառնալով ԵԱՀԿ ՄԽ համանախագահների տարածաշրջան այցին: Հիշեցնենք, որ համանախագահները նախ այցելել էին Բաքու, ապա՝ ԼՂՀ, երեկ էլ Երեւան, որտեղ ՄԽ ամերիկացի համանախագահ Ջեյմս Ուորլիքն ասուլիսով հանդես եկավ:

«Ե՛ւ հայկական կողմի, ե՛ւ Մինսկի խմբի տեղեկատվությունը խոսում է այն մասին, որ քննարկումները գնում են զինադադարի ռեժիմն ամրապնդելու ուղղությամբ: Հարցի կարգավորման ուղղությամբ, կարծում եմ, նորություններ չեն լինի: Համանախագահները լավատես են, որ ԱԳ նախարարները կհանդիպեն, բայց չեմ կարծում, որ նախարարների հանդիպմանն անմիջապես կհաջորդի նախագահների հանդիպումը»,- ասաց Մանոյանը:

Կիրո Մանոյանի կարծիքով, մինչ տարեվերջ Սարգսյան-Ալիեւ հանդիպում չի կայանա:

Անդրադառնալով Ուորլիքի այն խոսքերին, որ ապրիլից հետո սահմանին հիմնականում հանգիստ է եղել, Մանոյանը համաձայնեց: Նա նաեւ հավելեց, որ ապրիլյան իրադարձությունները չափանիշ չեն: Եթե ապրիլի համեմատ հանգիստ է, դա դեռ չի նշանակում, որ հրադադարի ռեժիմը պահպանվել է:

Հարցին՝ ինչո՞վ բացատրել համանախագահների լավատեսության հիմքը, Մանոյանը պատասխանեց.

«Միշտ պետք է հաշվի առնենք, որ համանախագահները միջնորդներ են, եւ նրանց հայտարարությունները նպատակ ունեն հարցը կարգավորել: Դրա համար չեմ կարծում, որ համանախագահներից որեւէ մեկից կլսենք, որ սա մեղավոր է, նա մեղավոր է: Անգամ փոքրիկ քայլ առաջը փորձում են դրական գնահատել եւ այն համեմատում են ապրիլի հետ»:

Մանոյանի խոսքով՝ անհրաժեշտ է, որ ԵԱՀԿ ՄԽ միջնորդները փորձեն ամրապնդել զինադադարի ռեժիմը.

«Որովհետեւ, եթե չամրապնդվի, հնարավոր է նույնիսկ առանց Ադրբեջանի ցանկության, իրավիճակը շատ ավելի արագ սրվի եւ մենք հայտնվենք ապրիլյան օրերի վիճակում: Այնպես չէ, որ պատերազմը վերջացել է, զինադադարի պայմանագիր կա: Բայց այն ամեն օր խախտվում է, մի օր էլ հնարավոր է Ադրբեջանի խախտումների պատճառով բռնկումներն ավելի ուժգին լինեն»,- մանրամասնեց Մանոյանը:

Armtimes.com-ի հարցին, եթե բանակցություններում նորություններ պետք չէ սպասել, ի՞նչ կարգավիճակի մասին էր խոսում ամերիկացի համանախագահը, ըստ որի, բանակցությունների սեղանին ԼՂ կարգավիճակի հարցն է եւ այն որքանո՞վ կապ ունի Ալիեւի՝ օրեր առաջ հայտարարության հետ, Մանոյանն ասաց.

«Այս դեպքում կարեւոր է իր մեկ ասածը. պետք չէ կոնտեքստից դուրս բաներ ասել: Ասեց այն մասին, երբ հարցրեցին, որ Բաքվում ասել է տարածքներ զիջվելու մասին: Ինքն ասեց, որ խոսվում է ամեն ինչի մասին՝ ե՛ւ կարգավիճակի, ե՛ւ փախստականների, ե՛ւ խաղաղապահ ուժերի: Իսկ թե ինչ կարող է լինի կարգավիճակի հարցը, կարծում եմ, դա իրենց առաջարկի մեջ 2007 թվականի նոյեմբեր-դեկտեմբերից պարզ է Ղարաբաղի կարգավիճակը: Ղարաբաղ ասելով իրենք ուրիշ բան են հասկանում, մենք՝ ուրիշ: Կարգավիճակը պետք է ճշտվի ինքնորոշման իրավունքի հիման վրա: Այն իրենց մոտեցումն է եղել մոտավորապես 9 տարի»:

Ճշտող հարցին՝ ըստ իրեն բանակցությունները շարունակվելու դեպքում որ փաստաթղթի հիման վրա են բանակցելու՝ Մադրիդյա՞ն, Կազանի՞, թե՞ միգուցե այլ, Մանոյանը պատասխանեց.

«Չեմ կարծում, որ հիմա ինչ-որ փաստաթուղթ կա, որի շուրջ ասվելիքը պիտի լինի: Հիմնական սկզբունքներն են բոլորը: Մնացածն օրվա պայմաններից ելնելով հնարավոր է մեկ կետի վրա շեշտը դնեն, երկրորդը՝ պակասեցնեն: Այսպես կոչված լավրովյան առաջարկները, փաստորեն, մնացին օդում, որովհետեւ այդ մթնոլորտը չկա: Բայց դա չի նշանակում, որ օրինակ հինգ ամիս հետո, երբ հարցի էությունն ուսումնասիրող բանակցությունները սկսվեցին, դա կնշանակի պիտի սկսվի Լավրովի առաջարկից»: