ՀՅԴ-ի պորտֆելները կմնան, ՕԵԿ-ը անիմաստ է համարում կոալիցիա կազմելը

«Օրինաց երկիր» խմբակցության ղեկավար Հեղինե Բիշարյանն ակնկալիքներ չունի, որ իրենց քաղաքական ուժին առաջարկ կլինի տեղ զբաղեցնել նոր ձեւավորվող կառավարության կազմում: Այս մասին նա ասաց խորհրդարանում՝ լրագրողների հետ զրույցում, երբ վերջիններս հիշեցրին նրան իշխանության հետ նախկին կոալիցիայի մասին եւ հետաքրքրվեցին ակնկալիքներից: Ավելին՝ Բիշարյանը հայտարարեց, որ կարճամտություն կլինի մաս կազմել անցումային կառավարությանը:

«Առաջիկայում երկրում ընտրություններ են, (նկատի ունի 2017-ի խորհրդարանական ընտրությունները-հեղ.), նոր սկիզբ է սպասվում, կարճամտություն կլինի մի պրոցեսի մեջ մտնել, որն անիմաստ է ուղղակի»,-ասաց նա:

Բիշարյանի համոզմամբ՝ իշխանությանը քաղաքական կամք է հարկավոր «կաշառակերությունից, օլիգարխիայից եւ օդիոզ դեմքերից ազատվելու համար.

«Կարծում եմ, որ առաջիկա ապրիլյան ընտրությունները պետք է որոշեն քաղաքական ուժերի դիրքերի փոփոխության, նոր ուժերի, նոր մարդկանց, որով գուցե ազգային համաձայնություն կձեւավորվի, որը կբերի երկրում ինչ-որ բան փոխելու հույս ու հավատ»,- ասաց Հեղինե Բիշարյանը:

ԱԺ պատգամավոր Ալեքսանդր Արզումյանը Հովիկ Աբրահամյանի կառավարության հրաժարականը նոր սկիզբ չի համարում, այլ պարզապես «հերթական փոփոխություն».

«Նոր սկիզբ պետք է անեինք 1992 թվականին, բայց չենք արել, հիմա հերթական փոփոխությունն է, աստված տա ֆալստարտ չլինի: Բոլոր նորեկներն էլ միշտ ամպագոռգոռ հայտարարություններով են հանդես գալիս, դեռ կտեսնենք»,-ասաց Ալեքսանդր Արզումանյանը՝ հավելելով, որ դեռ չի փորձի շատ գնահատականներ հնչեցնել, քանի որ կառավարության կազմը հայտնի չէ:

ՀՀԿ-ի գործընկեր ՀՅԴ-ն մտավախություն չունի, որ նոր կառավարության ձեւավորման ժամանակ կզրկվի իր պորտֆելներից, «որովհետև քաղաքական համագործակցության հուշագիրն ուժի մեջ է: Ավելին՝ այդ հուշագիրը հեռանկարային է»:

«Դաշնակցության պորտֆելները մնալու են»,-հայտարարեց Ռուստամյանը:

Լրագրողների դիտարկմանը, որ իշխող ուժը խորհրդարանական ընտրությունների նախաշեմին կառավարության փոփոխություն է անում՝ վարկանիշը բարձրացնելու համար, Արմեն Ռուստամյանը համաձայնեց, ավելին ասաց, որ դա բնական է: 

Ռուստամյանը հիշեցրեց, որ Հայաստանում իշխանություններ են եղել, որոնք «թքած են ունեցել իրենց վարկանիշի բարձրացման խնդրի վրա՝ համարելով, որ իրենց դեմ խաղ չկա».

«Բայց հիմա իշխանությունները հասկացել են, որ իրավիճակ է փոխվել, եւ իրենց իշխանությունը պահելու համար պետք է մտածեն իրենց վարկանիշի բարձրացման ուղղությամբ ու իրականացնեն համապատասխան քայլեր: Այս անգամ, անձերի փոփոխությունից զատ, պետք է փոխվի նաև բովանդակությունը ՝ խաղի կանոնները, ներիշխանական հարաբերությունները»,- ասաց նա:

Մեր հարցին ի պատասխան ՀՀԿ խմբակցության ղեկավար Վահրամ Բաղդասարյանը ասաց, որ ՀՀԿ խորհրդի եւ ԳՄ նիստերում պաշտոնանկությունների եւ նշանակումների հարց չեն քննարկել՝ բացառությամբ նոր վարչապետի թեկնածության առաջադրումը:

Հիշեցնենք, որ շրջանառվում են մի քանի անուններ, որոնք լքելու են իրենց պաշտոնը, ինչպես՝ Պաշտպանության նախարար Սեյրան Օհանյանը, Արտաքին գործերի նախարար Էդվարդ Նալբանդյանը, Գյուղատնտեսության նախարար Սերգո Կարապետյանը, Քննչական կոմիտեի ղեկավար Աղվան Հովսեփյանը, Հատուկ քննչական ծառայության ղեկավար Վահրամ Շահինյանը: