ՀՎԿ-ում բունտ է հասունանում. արդեն դժգոհություններ կան տարածքային կառույցներում

Հայկական վերածնունդ կուսակցության կառավարման խորհրդում ընդգրկված «Հայկանդուխտ» կուսակցության նախագահ Արմենուհի Ղազարյանը մամուլից է տեղեկացել, որ ՀՎԿ-ում ներքին խժդժություններ կան կապված համամասնական ցուցակի հետ: Սակայն ինքն անձնապես իրոք դժգոհություններն ունի: «Ես ցուցակների մասին, ընdհանրապես, ոչինչ չգիտեմ, կազմել ե՞ն, չե՞ն կազմել, կազմում ե՞ն, ո՞ւմ են տեղ տվել, ո՞ւմ տեղ չեն տվել: Նման կարգի տեղեկատվության ես չեմ տիրապետում»,- Armtimes.com-ի հետ զրույցում ասաց Արմենուհի Ղազարյանը՝ նշելով, որ իրոք ունի որոշակի դժգոհություններ:

«Շուտով ես հրապարակայնորեն կասեմ եւ բոլորդ էլ կիմանաք: Բոլոր շարքերի մեջ էլ դժգոհություններ կան, եթե դուք մտնեք շարքերը, որոնք ՕԵԿ-ից վերակազմակերպվել են իբրեւ թե նոր ՕԵԿ են գրանցվել, բոլորն էլ, դժգոհողները լիքն են: Գնացեք Արմավիրի կառույցը, գնացեք Արտաշատի կառույցը, մյուս տեղերի կառույցները, Երեւանում էլ կառույցներ կան եւ տեսեք, որ բոլորը դժգոհում են»,- ասաց Արմենուհի Ղազարյանը՝ չցանկանալով մանրամասնել թե ինչն է դժգոհության պատճառ դարձել:

«Ես դա կասեմ ճշտումներ անելուց հետո, ես երկար չեմ սպասեցնի, հրապարակայնորեն դա կդարձնեմ: Ճիշտ հասկացեք, հեղինակության խնդիր է, ես որոշ փաստեր պետք է ճշտեմ դեռ: Ես, ո՛չ Անահիտ Եղոյանն եմ, ո՛չ էլ մյուսները: Ես 22 տարվա քաղաքական գործիչ եմ»,- նշեց նա: Հարցին՝ ո՞ր դեպքում կփոխեք ձեր վերաբերմունքը եւ կշարունակեք աշխատել ՀՎԿ-ի հետ, նա ասաց, որ դա բացառվում է: «Ես ունեմ ինքնասիրություն, ես հարգում եմ իմ կուսակցությունը, իմ երկիրը, ժողովուրդը: Եթե իմ ժողովրդին նորից ուզում են խաբել, դա իմ ինքնասիրությանը կպնում է այնքանով, որ ես անամոթաբար գնացել եմ այնտեղ, մտածելով, որ մարդիկ ուղղվում են»,- ասաց «Հայկանդուխտ»-ի նախագահը:

Արմենուհի Ղազարյանի խոսքով, վերջերս ՀՎԿ-ի կառավարման խորհրդի անդամ Անահիտ Եղոյանն էլ հայտարարել է, թե ինքը ՀՎԿ-ի կառավարման խորհրդի անդամ չէ: Անահիտ Եղոյանը նշել էր նաեւ, որ «Հայկանդուխտը» ՀՎԿ-ի կառավարման խորհրդում չի եղել, քանի որ այդ կուսակցությունը լուծարման գործընթացում է եղել: «Լուծարման ընթացք չկա: Ես, եթե գործում եմ, ուրեմն՝ գործում եմ: Մենք 2015 թվականին Անի Պլազա հյուրանոցում համաձայնության պայմանագիր ստորագրեցինք, որով կուսակցությունները, եթե հիշում եք, բոլորս էլ միացանք: Կառավարման խորհրդի անդամ եմ, համագումար ենք անցկացրել, ելույթ եմ ունեցել, կառավարման խորհրդի բոլոր նիստերին մասնակցել եմ, բացառությամբ վերջին նիստից»,- հակադարձեց Արմենուհի Ղազարյանը՝ նշելով, որ բացակայել է միայն այն նիստից, որին պետք է մասնակցեր Վանաձորում ՀՎԿ-ի համամասնական ցուցակը գլխավորած Արկադի Փելեշյանը:

«Միայն այդ նիստին չեմ գնացել, որովհետեւ ես չեմ կարող մարդ ծեծողի հետ նստել եւ ինչ-որ մի հարց քննարկել: Փելեշյանի հետ կապված ես չեմ գնացել»,- ասաց Արմենուհի Ղազարյանը՝ պնդելով, որ չմասնակցելով իր վերաբերմունքն է հայտնել:

«Հարցն այն է, որ Անահիտ Եղոյանը հայտարարում է, որ ես կառավարման խորհրդի անդամ չեմ: Եթե անդամ չեմ, ապա ինչպես եմ մասնակցել նիստերին, ինչպես անդամատոմս ունեմ: Եվ ո՞վ է լիազորել նրան նման կերպ խոսել կառավարման խորհրդի անդամի մասին, իրեն գրավոր լիազորե՞լ են»,- ասաց նա եւ Անահիտ Եղոյանին առաջարկեց հրապարակել կառավարման խորհրդում ներկայացված 12 կուսակցության անուն:

ՀՎԿ լրատվական-քարոզչական մասի ղեկավար Էդգար Առաքելյանն էլ մեր զրույցում հայտարարեց, որ կուսակցության ներսում որեւէ տարաձայնություն չկա, ավելին՝ կուսակցությունում գոյություն ունի առողջ աշխատանքայի պրոցես, զբաղված են կուսակցաշինության գործընթացով եւ առավել քան երբեւէ այսօր միավորված են: «Դա ապացուցեց նաեւ վերջին ՏԻՄ ընտրությունները, որ կուսակցությունն այնքան հզոր էր, որ հանրապետության մասշտաբով ՏԻՄ ընտրություններում ցուցաբերեց երկրորդ ցուցանիշը, ունեցավ երկու ցուցանիշ՝ մի քանի տասնյակ գյուղապետեր, 300-ից ավելի ավագանիներ հիմա ՀՎԿ-ից են»,- ասաց Էդգար Առաքելյանն ու անդրադարձավ Արմենուհի Ղազարյանի պնդմանը:

Նրա խոսքով, ՀՎԿ-ի ձեւավորման փուլում Արմենուհի Ղազարյանը կուսակցությունը չի լուծարել իր կուսակցությունը՝ վերակազմավորման նպատակով եւ չի հանդիսացել ՀՎԿ-ի հիմնադիր: «Եթե բացեք պետռեգիստրի տվյալները, դուք կտեսնեք, որ կուսակցությունը չի լուծարվել: Հետեւաբար, Արմենուհի Ղազարյանը չէր կարող լինել հա՛մ իր կուսակցության անդամ, հա՛մ ՀՎԿ-ի անդամ՝ միեւնույն ժամանակ իր կուսակցությունը լիներ հիմնադիր: Հետեւաբար, կուսակցությունից դուրս գալու, մտնելու խնդիր չկա»,- ասաց նա:

Էդգար Առաքելյանը նշեց նաեւ, որ ՀՎԿ-ն համագործակցել է այլ կուսակցությունների հետ եւ երբեմն-երբեմն այդ կուսակցությունները մասնակցել են կառավարման խորհրդի նիստերին: