Սասնա ծռեր քաղաքական խորհրդի երթին ՀԱԿ-ը չի՞ մասնակցի. Ի՞նչ է սպասվում վաղը

2008 թվականի մարտի 1-ից հետո յուրաքանչյուր տարի դեկտեմբերի 10-ին՝ մարդու իրավունքների պաշտպանության միջազգային օրը, Հայ ազգային կոնգրեսը երթ էր կազմակերպում, սակայն այս տարի Ազատության հրապարակից մեկնարկող երթն առաջնորդելու է «Սասնա ծռեր» քաղաքական շարժման խորհուրդը: Երեւանի քաղաքապետարանն արտոնել է Հիմնադիր խորհրդարանի անդամ Հարություն Աղլամազյանի իրազեկումը՝ ժամը 09:00-23:00-ն Ազատության հրապարակում հավաք եւ հավաքի ընթացքում՝ ժամը 15:00-18:00-ին Ազատության հրապարակ-Մաշտոցի պողոտա-Գ. Լուսավորչի փողոց-Արշակունյաց պողոտա-Ագաթանգեղոսի փողոց-Տիգրան Մեծի պողոտա-Հանրապետության հրապարակ-Աբովյան փողոց-Սայաթ-Նովայի պողոտա-Ազատության հրապարակ երթուղով երթ անցկացնելու վերաբերյալ։

Երթին ընդառաջ Armtimes.com-ը զրուցեց «Սասնա ծռեր» շարժման քաղաքական խորհրդի անդամ Արմենակ Կյուրեղյանի հետ:

- Պարոն Կյուրեղյան, Դատապարտյալների հիվանդանոցի մոտ ի՞նչ միջոցառում եք նախատեսել:

- Բողոքի ակցիա է լինելու, ուրիշ ոչ մի բան:

- Երթն անցնելու է նաեւ Սայաթ-Նովա պողոտայով: ԱԱԾ շենքի մոտ ակցիա լինելո՞ւ է:

- Չեմ կարող ասել, քաղաքից բացակայել եմ, չեմ կարող այդ մասին ձեզ ասել:

- Ամեն տարի նույն օրը ՀԱԿ-ն էր երթ անցկացնում: Քննարկում ունեցե՞լ եք ՀԱԿ ներկայացուցիչների հետ այդ հարցի շուրջ:

- Ես այդպիսի տեղեկություն չունեմ:

- Հնարավո՞ր է համատեղ եք երթն անելու:

- Չունեմ նման լուր եւ տեղեկություն: Դա այն օրն է, որ բոլոր քաղաքական ուժերը պետք է նման ակցիաներ անեն: Այնպես չի, որ նախաձեռնողը մենք ենք եւ չպետք է մասնակցել: Դա ընդհանուր գաղափար է, որը բոլորինն է, որ քաղբանտարկյալներ չպետք է լինեն:

- Մարդու իրավունքների խախտումները հիմնականում լինում են իշխանության ներկայացուցիչների կողմից: Հնարավոր համարո՞ւմ եք այս իշխանության գոյության ժամանակ մարդու իրավունքների խախտման դեպքերը նվազեն:

- Ձեր հարցում գրեթե պատասխանը կար: Իհարկե, այն իշխանությունները, որոնց մենք տեսնում ենք, թե ինչպես են ընտրվում, չեն կարող չխախտել մարդու իրավունքները: Պետք է խախտեն, որպեսզի իշխանությունը պահեն իրենց ձեռքում: Այսինքն՝ իշխանության ձեւավորման սկզբից, ընտրություններում համատարած խախտվում է մարդու իրավունքները:

- Ի՞նչ պետք է անեն քաղաքական ուժերն ու հասարակությունը, որ այս խախտումների թիվը մեղմվի եւ գնա վերացմանը:

- Ինձ թվում է՝ հասարակությունը, ամբողջ ժողովուրդը պետք է իրենց մեջ պատասխանատվություն տեսնեն այս երեւույթների հանդեպ: Ամեն մարդ պետք է հասկանա, որ ինքն էլ ինչ-որ բան պետք է անի, որպեսզի մարդու իրավունքները չխախտվեն Հայաստանում եւ միասնական ուժերով պայքարեն այդ ամենի դեմ:

- 2016 թվականին մարդու իրավունքների զանգվածային խախտումներ տեղի ունեցան, այս թվում՝ ՊՊԾ գնդի գրավմանը հաջորդած իրադարձությունների ժամանակ: Ի՞նչի մասին է խոսում այս աճը:

- Դա խոսում է այն մասին, որ Հայաստանում իշխանություններն արդեն կորակվեն որպես բռնատիրություն եւ դիկտատուրա, եւ այդ որակումներին համապատասխան մակարդակի վրա էլ կլինեն մարդու իրավունքները:

- Ձեր ընտանիքի անդամներից 3-ն այժմ գտնվում են անազատության մեջ: Խնդրում եմ գնահատեք մարդու իրավունքների իրավիճակը քրեակատարողական հիմնարկներում:

- ՔՀԿ-ում կալանավորները գտնվում են ոչ նորմալ պայմաններում եւ այստեղ մեծ բարելավումների կարիք է զգացվում, որովհետեւ դատապարտյալները դատապարտված են ազատազրկման, այլ ոչ թե հոգեբանական կամ ֆիզիկական վատ պայմաններում ապրելու, զրկված կապի միջոցներից, շփման միջոցներից: Բոլոր կալանավայրերը համապատասխանում են նախկին սովետական ստանդարտներին եւ բարելավման խիստ կարիքներ ունեն: Աշխարհն անցել է նոր ժամանակաշրջան, իսկ Հայաստանը մնացել է սովետական դիկտատուրայի մեջ: Ես այդպես կգնահատեի: