ՖԻԴԵ-ն հրապարակել է շախմատիստների վարկանիշային նոր աղյուսակը. Լեւոն Արոնյանը 7-րդն է

Շախմատի միջազգային ֆեդերացիան՝ ՖԻԴԵ-ն, հրապարակել է շախմատիստների թարմացված վարկանիշային աղյուսակը: 2017 թվականի առաջին խոշոր մրցաշարում՝ Հոլանդիայի Վեյկ Ան Զեե քաղաքում կայացած «Tata Steel»-ում տոնած հաղթանակի շնորհիվ ամերիկացի Ուեսլի Սոն իր վարկանիշը հասցրել է 2822-ի. սա պատմության մեջ 6-րդ ցուցանիշն է եւ զիջում է միայն Մագնուս Կառլսենի (Նորվեգիա, 2889), Գարի Կասպարովի (Ռուսաստան, 2856), Ֆաբիանու Կարուանայի (Իտալիա, 2851), Լեւոն Արոնյանի (Հայաստան, 2835), Վեսելին Տոպալովի (Բուլղարիա, 2826) լավագույն արդյունքներին:

Նույն՝ «Tata Steel» մրցաշարի արդյունքներով մեր Լեւոն Արոնյանը բարձրացրել է իր անհատական վարկանիշը 5 կետով, նախորդ ամսվա համեմատությամբ վեր է բարձրացել 2 հորիզոնականով եւ այժմ 7-րդն է աշխարհում: 2017 թվականի փետրվարի 1-ի դրությամբ ուժեղագույն շախմատիստների վարկանիշային աղյուսակի լավագույն տասնյակում են հետեւյալ շախմատիստները:

1. Մ. Կառլսեն,      Նորվեգիա,    2838
2. Ֆ. Կարուանա,  ԱՄՆ,             2827
3. Ու. Սո,             ԱՄՆ,              2822
4. Վ. Կրամնիկ,    Ռուսաստան,  2802
5. Մ. Վ-Լագրավ,  Ֆրանսիա,      2796
6. Վ. Անանդ,        Հնդկաստան, 2786
7. Լ. Արոնյան,      Հայաստան,   2785
8. Հ. Նակամուրա, ԱՄՆ,             2785
9. Ս. Կարյակին,   Ռուսաստան, 2783
10. Ա. Գիրի,           Հոլանդիա,     2769

Հայաստանցի եւս 3 շախմատիստներ փետրվարի 1-ի դրությամբ տեղ են զբաղեցնում առաջին հարյուրյակում. Սերգեյ Մովսիսյանը 62-րդն է (վարկանիշը՝ 2679), Վլադիմիր Հակոբյանը զբաղեցնում է 67-րդ տեղը (2675), Գաբրիել Սարգսյանը՝ 86-րդն է (2666): Կանանաց մրցաշարային աղյուսակն էլ վստահորեն գլխավորում է աշխարհի գործող չեմպիոն Հու Յիֆանը (Չինաստան, 2651), Հայաստանցիներ Էլինա Դանիելյանը 31-րդն է (2444), Լիլիթ Մկրտչյանը՝ 39-րդը (2431):