Արթուր Բաղդասարյանին եւ ՀՎԿ-ին փառաբանողներից մեկն էլ լքեց ՀՎԿ-ն (տեսանյութ)

ձախից երկրորդը Արմենուհի Ղազարյանն է, աջից երկրորդը՝ Դավիթ Հարությունյանը

Դավիթ Հարությունյանը

Դավիթ Հարությունյանը ՀՎԿ երիտմիության համագումարին

«Օրինաց երկիր» խմբակցության պատգամավոր Հովհաննես Մարգարյանն ու Դավիթ Հարությունյանը

ՕԵԿ նախկին նախագահ Արթուր Բաղդասարյանի նախաձեռնած «Հայկական վերածնունդ» կուսակցության շարքերը լքեց հերթական կուսակցությունը: Լիբերալ ժողովրդավարական կուսակցության նախկին նախագահ Դավիթ Հարությունյանը հայտարարություն է տարածել, որում ասված է, թե նա ինչու է լքում այդ կուսակցությունը:

«Չեմ կարող չբարձրաձայնել, որ այն կեղծ եւ գաղջ մթնոլորտը, որը տիրում է «Հայկական Վերածննդում», խաբեության եւ ստորաքարշության այն մթնոլորտը, ժողովրդին խաբելու եւ մոլորեցնելու էժանագին պոպուլիզմը, այլեւս անհամատեղելի են դարձնում իմ եւ իմ թիմի ներկայությունը «Հայկական Վերածնունդում»։… պաշտոնապես հայտարարում եմ, որ դուրս եմ գալիս «Հայկական Վերածնունդ» կուսակցությունից, հրաժարվում եմ` ՀՎԿ կառավարման խորհրդի անդամությունից, հրաժարվումեմ ՀՎԿ Երիտասարդական միության նախագահի պաշտոնից` վստահ լինելով, որ իմ մեծ ներդրումն եմ ունեցել ՀՎԿ–ի ձևավորման և կուսակցության Երիտասարդական միության կայացման գործում»,- իր հայտարարությունում նշել է Դավիթ Հարությունյանը:

«Հայկական վերածնունդ»-ից փորձեցինք պարզաբանում ստանալ կատարվածի վերաբերյալ, սակայն ՀՎԿ երիտասարդական միությունն էլ հայտարարությամբ պատասխանեց Դավիթ Հարությունյանին:

«Այսօր տեղի է ունեցել «Հայկական վերածնունդ» կուսակցության երիտասարդական միության վարչության նիստը, որտեղ որոշում է կայացվել ոչ պարկեշտ վարքագծի պատճառով Դավիթ Հարությունյանին հեռացնել ՀՎԿ երիտմիությունից, հետևաբար նաև կուսակցությունից: ՀՎԿ երիտմիության վարչությունը կուսակցության երիտթևի պաշտոնում առաջադրել է Սիմոն Հակոբյանի թեկնածությունը:

Դավիթ  Հարությունյանը քաջ գիտակցում էր, որ առաջիկայում ոչ պատշաճ վարքագծի համար ինքը կարող էր հեռացվել երիտմիությունից և կուսակցությունից, հետևաբար փորձել է մեկ քայլ առաջ ընկնել ու ներկայացնել, թե իբր ինքը սկզբունքային մարդ է ու հեռացել է կամովին, իսկ կուսակցությունից նրան հեռացնելու պատճառների մասին Դավիթ Հարությունյանը տեղյակ էր»,- այս մասին էլ ասված է ՀՎԿ երիտասարդակն միության հայտարարության մեջ:

Նշենք, որ սա առաջին դեպքը չի, երբ Արթուր Բաղդասարյանին կամ «Հայկական վերածնունդ» կուսակցությանը փառաբանող անձինք, որոնք ինչ-որ միավորում են ներկայացնում, կտրուկ հայտարարում են, որ լքում են ՀՎԿ-ն:

Այդպես վարվեց ամիսներ առաջ «Հայկանդուխտ» կուսակցության նախագահ Արմենուհի Ղազարյանը, այսօր էլ արդեն այդպես է վարվում Լիբերալ ժողովրդավարական կուսակցության նախկին նախագահ Դավիթ Հարությունյանը:

Հիշեցնենք, որ «Հայկական վերածնունդ» կուսակցության հիմնադիրներից նախկին «Միավորված հայեր» կուսակցության անդամներն էլ ավելի վաղ էին հայտարարել, որ նորաստեղծ ՀՎԿ-ն իր շուրջ երկամյա գործունեության ընթացքում ի վիճակի չեղավ կյանքի կոչել որդեգրած հիմնադրույթները, որոնք համահունչ էին «Միավորված հայեր» կուսակցության ծրագրին: «Դրան նպաստեց «Օրինաց երկիր» կուսակցությունից (ՕԵԿ) ժառանգած գործելակերպը՝ -ի հակառակ «Միավորված հայեր» կուսակցության հետ 01.06.2015 թ. կնքած համաձայնագրի՝ ՕԵԿ-ի դե յուրե չլուծարվելն ու նորաստեղծ ՀՎԿ-ին չմիանալը, կուսակցության կառավարման համակարգի դե ֆակտո ուզուրպացումն ու ՀՎԿ-ի հիմնադիր կուսակցությունների քաղաքական մեկուսացումը: Նկատի ունենալով վերոնշյալ հանգամանքները, Միավորված հայեր կուսակցության անդամները հայտարարում էին, որ իրենք դադարեցնում են իրենց անդամությունը Հայկական վերածննդին»,- ասված էր «Միավորված հայեր»-ի հայտարարությունում:

Ստորեւ ներկայացնում ենք տեսանյութ ՀՎԿ երիտասարդական միության համագումարից, որտեղ Դավիթ Հարությունյանը ՀՎԿ-ն է համարում միակ ուժը, որի հետ կարելի է ճանապարհ գնալ: Ի դեպ, այդ համագումարից անցել է ընդամենը 1 ամիս: