Հայկական ֆուտբոլի շնորհիվ ավելանում են մեր գիտելիքները առնվազն աշխարհագրությունից

Հայաստանի ֆուտբոլի ֆեդերացիան անցյալ շաբաթ տեղեկացրեց, որ մեր ազգային հավաքականը հունիսին ընկերական խաղ է անցկացնելու Սենտ Քիթս եւ Նեւիս երկրի հավաքականի հետ, ինչի շնորհիվ հայկական ֆուտբոլով հետաքրքրվողների ճնշող մեծամասնությունը ավելացրեց իր գիտելիքները առնվազն աշխարհագրությունից: Պարզվում է՝ իրոք գոյություն ունի Սենտ Քիթս եւ Նեւիս երկիր (հետագայում՝ ՍՔՆ), որը գտնվում է Կարիբյան ծովում, բաղկացած է 2 փոքր կղզիներից՝ Քիթսից եւ Նեւիսից, որոնք իրար հետ միասին ունեն մոտ 50 հազար բնակիչ՝ մոտավորապես Երեւանի Դավթաշեն թաղամասի չափ: ՍՔՆ-ը տարածքով եւ բնակչությամբ աշխարհի ամենափոքր երկրներից մեկն է, բայց մեկ շնչին ընկնող ՀՆԱ-ի մակարդակով 5 անգամ գերազանցում է Հայաստանին, ունի 10 թիմով ֆուտբոլի առաջնություն եւ հավաքական, որը ներկա պահին ՖԻՖԱ-ի վարկանիշային աղյուսակում Հայաստանից բարձր տեղ է զբաղեցնում. Հայաստանը 82-րդն է, Սենտ Քիթս եւ Նեւիսը՝ 77-  րդը: 

Հետաքրքիր է, որ ՀՖՖ-ն իր տարածած հաղորդագրության մեջ հատուկ ընդգծել է այդ փաստը, ինչպես նաեւ մանրամասնել, թե որ աշխարհամասում է գտնվում ՍՔՆ-ը՝ սա իրոք կարեւոր տեղեկություն էր: «Սենթ Քիթս եւ Նեւիսի հավաքականը հանդես է գալիս ԿՈՆԿԱԿԱՖ (կենտրոնական, հյուսիսային Ամերիկայի, Կարիբյան ավազանի երկրների ֆուտբոլային ասոցիացիա) գոտում եւ տվյալ պահին ՖԻՖԱ-ի ազգային հավաքականների դասակարգման աղյուսակում զբաղեցնում է 77-րդ հորիզոնականը»,- մասնավորապես նշված է ՀՖՖ հաղորդագրության մեջ: Առաջին անգամ ՀՖՖ-ը տեղեկություն տարածելով մեր ազգային հավաքականի առաջիկա հանդիպման մասին, նշում է նաեւ մրցակցի աշխարհամասը եւ տեղը վարկանիշային աղյուսակում: Նախկինում երբեւէ նման դեպք չի եղել՝ մեր մրցակիցները գոնե աշխարհագրություն փոքր-ինչ իմացող ֆուտբոլասերներին ծանոթ են եղել: Բայց Սենտ Քիթս եւ Նեւիս երկիրը իրոք նորություն է, այնպես որ ֆուտբոլը հերթական անգամ ապացուցում է իր օգտակարությունը, ստիպում ծանոթանալ, ուսումնասիրել մինչ այժմ անհայտ երկրներ:

Եվ այսպես, Հայաստանի ազգային հավաքականը հունիսի 4-ին, Երեւանում, մրցելու է Սենտ Քիթս եւ Նեւիս երկրի ընտրանու հետ: Բնականաբար, անկախ ՖԻՖԱ-ի վարկանիշային աղյուսակում զբաղեցրած դիրքից, մեր թիմը ակնհայտ ֆավորիտ է այդ խաղում եւ առաջին հերթին պետք է հասկանալ, թե ինչ է տալու մեր հավաքականին այդ խաղը: Նշեմ, որ ՍՔՆ-ի հետ հանդիպումից 6 օր անց՝ հունիսի 10-ին, Հայաստանի ազգային հավաքականը Աշխարհի 2018 թվականի առաջնության ընտրական փուլի շրջանակներում արտագնա հանդիպում է անցկացնելու Չեռնոգորիայի ընտրանու հետ: Այսինքն ՍՔՆ-ի հետ հանդիպումը Չեռնոգորիայի հետ խաղի նախապատրաստության կարեւոր փուլն է: Սա ընդունված պրակտիկա է ֆուտբոլում. կարեւոր խաղից առաջ ընկերական խաղ անցկացնել: Բայց բոլոր դեպքերում նախապատրաստական այդ ընկերական խաղերը ունենում են տրամաբանություն. կամ ընկերական խաղում մրցակիցը իր խաղաոճով նման է լինում ապագա մրցակցին, կամ ընկերական խաղը ունենում է ֆինանսական կոնկրետ նպատակ եւ այլն:

Միանգամից փաստենք՝ Չեռնոգորիայի հետ խաղից առաջ ՍՔՆ-ի հետ հանդիպումը  ոչ մի կերպ չի տեղավորվում ֆուտբոլային ընդունված տրամաբանության մեջ: ՍՔՆ-ի հավաքականը նախ այլ աշխարհամասի թիմ է, համացանցում այդ թիմի մասնակցությամբ եղած ոչ մեծ քանակությամբ տեսանյութերն էլ հուշում են, որ խաղալու ենք ձեռագիր, ոճ չունեցող մի թիմի հետ, որը ՖԻՖԱ-ի վարկանիշային աղյուսակի 77-րդ հորիզոնականում է հայտնվել պատահաբար: Իր պատմության ընթացքում ՍՔՆ-ի հավաքականը մրցել է ընդամենը եվրոպական 2 թիմերի հետ՝ Էստոնիա եւ Անդորա, մնացած բոլոր խաղերում ՍՔՆ-ի մրցակիցներ են եղել Կարիբյան ծովում գտնվող տարբեր կղզիների հավաքականները (Սուրինամ, Հայիթի, Բերմուդա, Բարբադոս, Գայանա եւ այլն): Ընդ որում, վարկանիշային աղյուսակում այդ 77-րդ տեղը ռեկորդային է մշտապես 2-րդ հարյուրյակում գտնվող ՍՔՆ-ի համար:

Նախկինում շատ հաճախ մեր ազգային հավաքականը նախապատրաստական շրջանում ընկերական խաղ էր անցկացնում մեր երիտասարդական հավաքականի հետ: Սենտ Քիթս եւ Նեւիս երկրի հավաքականի հետ հունիսին կայանալիք խաղը կարող է տեղավորվել միայն նման խաղի տրամաբանության մեջ՝ ուղղակի խաղ, ուժերի փորձարկում, որի անհրաժեշտությունը գրեթե զրոյական է: Բայց փոխարենը իմացանք եւս մեկ երկրի գոյության մասին: