Եթե փորձեք ընտրական պրոցեսի դեմ մի բան անել՝ այնպիսի հետընտրական պրոցես կտեսնեք. Մարուքյան

ՀՀ կենտրոնական ընտրական հանձնաժողովի մոտ այսօր հրավիրված հավաքում «Ելք» դաշինքի առաջնորդներից Արամ Սարգսյանն ամփոփեց քարոզարշավի ընթացքը՝ հայտարարելով. «Մենք անցանք ՀՀ բոլոր քաղաքներով, այնտեղ հասցնելով «Ելք կա»-ի մեր կոչը: Շատ-շատերը մեզ հետ վանկարկեցին, շատ-շատերը պատուհաններից ողջունեցին ու մենք համոզվեցինք, որ «Ելքը» ճանաչում ունի հանրապետությունով մեկ»:

Ըստ Սարգսյանի՝ այն ամենը, ինչ իրենք տեսել են ընտրարշավի ժամանակ, բերել է համոզման, որ քաղաքական ուժերը մեկը մյուսին վերարտադրելով, նույն երգը երգելով, նույն ջեմն ու մուրաբան բաժանելով, փորձում են սողոսկել մարդկանց տները, ընտրությունից ընտրություն հիմնավորելով, որ ընդդիմադիր են, ընտրությունից հետո կոալիցա կազմելով:

«Հասել է ժամանակը, որ մենք վատը լավից տարբերենք, հասել է ժամանակը, որ մենք ընտրեք «Ելք»-ին»,- նշեց նա:

Սարգսյանի խոսքով, վերջին շրջանում լրատվամիջոցներով փորձում են լուրեր տարածել, թե ՀՀԿ-ն ու «Ծառուկյան» դաշինքը համաձայնության են եկել ու քվոտավորել իրենք քվեները. «Հետաքրքիրն այն է, որ ԲՀԿ-ն որեւէ կերպ չի անդրադառնում դրան, չի ասում՝ այդպես է, թե ոչ: Դրան չի անդրադառնում նաեւ ՀՀԿ-ն: ՀՀԿ փոխնախագահ Արմեն Աշոտյանը հայտարարում է, որ իրենք մրցակից են, ինչպես Հոլիվուդն ու Բոլիվուդը: Ախր, այ պարոն Աշոտյան ջան, Բրյուս Ուիլիսի սանրվածքն ունենալը դեռ չի նշանակում Հոլիվուդից լինել: Դուք երկուսդ էլ Բոլիվուդից եք, դուք Զիտան եւ Գիտան եք, էդ կինոն միեւնույն է ավարտվելու է նրանով, որ պարզվելու է, որ դուք հարազատ քույրեր եք, նույն հորից ու մորից»,- եզրափակեց Սարգսյանը:

«Ելք» դաշինքի առաջին համարը ներկայացնող Էդմոն Մարուքյանը ելույթի սկզբում անդրադարձավ ՀՀԿ-ին ընտրապայքարից հեռացնելու վերաբերյալ դիմումին, որ այդ պահին քննարկվում էր ԿԸՀ-ում: «Մենք այստեղ ենք, որովհետեւ քննվում է Հանրապետական կուսակցությանը դոպինգ օգտագործելուց բռնվելու հետ կապված դիմումը»,- իր ասելիքը «սպորտի լեզվով» բացատրեց Մարուքյանը եւ շարունակեց.

«Երբ մենք քննադատում ենք՝ ասում են ինչպես կարելի է, դպրոցների տնօրենների՞ն եք վատ բան ասում: Մենք դպրոցների տնօրեններին չենք վատ բան ասում, մենք ասում ենք էն մարդկանց, ովքեր տարբեր ծառայություններ են մատուցել իշխանությանը եւ դրա դիմաց տնօրենի պաշտոն են ստացել: Նրանք մեզ համար դպրոցի տնօրեն չեն, տարրական, շարքային ընտրակեղծարար են, շարքային ձայն հավաքողներ: Այն ազնիվ մարդիկ, որ աշխատում են այդ ոլորտում, չպետք է լռեն»:

Էդմոն Մարուքյանը խոսեց նաեւ ընտրակեղծարարներին «բռնելու» ոստիկանության հորդորի մասին: «Ոստիկանությունն ասում է՝ ցույց տվեք, ով, որտեղ, երբ է փող բաժանել, գնանք բռնենք: Բա եթե դա մենք անենք՝ դուք ինչի՞ համար եք մեր հարկերից գումար ստանում: էդքան օպերատիվ աշխատող ինչի՞ համար ունեք, էդքան ագենտուրան ինչի՞ համար եք պահում: Մենք փող բաժանող բռնող չենք, մենք ընտրակաշառք բաժանող բռնող չենք, կաշառքների դեմ մենք կարող ենք պայքարել քարոզարշավով, քաղաքացիական գիտակցությունը բարձրացնելով»,- հայտարարեց Մարուքյանը՝ եզրակացնելով, որ Հայաստանում պետականորեն թույլատրված է փող բաժանել, ընդ որում՝ ամեն ուժին իր չափով:

Եվ վերջում, անդրադառնալով հետընտրական հնարավոր զարգացումների վերաբերյալ իրենց ուղղված հարցերին՝ «Ելք»-ի համամասնական ցուցակի առաջնորդը հայտարարեց. «Մենք հանգիստ, խաղաղ, պոզիտիվ, ժպտալով, «ելք կա» ասելով, ելքը ցույց տալով մեր քարոզարշավն անցկացրել ենք, բայց եթե մեր վստահված անձերից մեկի գլխից մազ պակասի,  եթե այդ օրը մեկի նկատմամբ բռնություն կիրառվի, եթե իմանանք, որ մեր դաշինքի ձայներից 0.001 ձայն կորել է, դրել եք ուրիշ ուժերի քվեաթերթիկների վրա կամ ինչ-որ մեկը փորձել է մեր կամ ընտրական պրոցեսի դեմ մի բան անել, ապա այնպիսի հետընտրական պրոցեսներ կտեսնեք, այնպիսի բողոքի ակցիաներ կտնեսնեք, այնպիսի իրավական պրոցեսներ կտեսնեք, որ երեւի երբեւիցե չի եղել: Մենք խաղաղ իշխանափոխության կողմնակից ենք»:

Նա հորդորեց ՀՀ քաղաքացիներին՝ չփոշիացնել իրենց ձայները՝ այն տալով ՀՀԿ-ի հետ կոալիցիայի մեջ եղած կամ ներկայումս համագործակցող ուժերին, որոնք չեն տարբերվում ՀՀԿ-ից: Կոչ արեց քվեարկել «Ելք»-ի օգտին՝ սպասելով փոփոխությունների: