Դատախազը սեռական բնույթի հայհոյանք է տվել Արայիկ Խանդոյանին

«Սասնա ծռեր» խմբի անդամ Արայիկ Խանդոյանի (Միայնակ գայլ) հեռախոսային խոսակցությունների եւ տեսակցությունների արգելքի դեմ վերաքննիչ բողոքի քննությունը այսօր կրկին անցել է լարված մթնոլորտում:

Վերաքննիչ քրեական դատարանի դատավոր Արշակ Խաչատրյանը որոշել է դռնբաց դատական նիստը անցկացնել դռնփակ: Նախորդ նիստին, երբ դատավորին պաշտպաններն ինքնաբացարկ են հայտնել, Արայիկ Խանդոյանը միացել է պաշտպաններին եւ ցանկացել կարծիք հայտնել Հանրապետական կուսակցության մասին, ինչը, սակայն նախագահող դատավորն արգելել է: Դրանից հետո Արայիկ Խանդոյանը սկսել է բղավել, նրան են միացել Խանդոյանի հարազատներն ու ընկերները: Դատավորը զգուշացրել էր, որ դահլիճում հավաքվածները, եթե շարունակեն «խանգարել» նիստի ընթացքը, ստիպված կլինի նիստն անցկացնել դռնփակ կարգով։

Եվ ահա այս միջադեպից հետո դատավոր Արշակ Խաչատրյանը որոշել է հետագա նիստերը դռնփակ անցկացնել: Թե երբ է որոշել եւ ի՞նչ հիմնավորմամբ, այդպես էլ պարզ չդարձավ: ՀՀ քրեական դատավարության օրենսգրքի 16-րդ հոդվածի համաձայն՝ դատարանի որոշմամբ դռնփակ դատական քննություն կարող է անցկացվել պետական եւ ծառայողական գաղտնիքների հետ առնչվող հանցագործությունների գործերով, ինչպես նաեւ հասարակական կարգի պաշտպանության նկատառումներից ելնելով։ Ըստ ամենայնի, հենց հասարակական կարգի նկատառումներից «ելնելով» է, որ դատավորը նման որոշում է կայացրել: Համենայնդեպս, այդ որոշման մասին նույնիսկ պաշտպանական կողմը տեղյակ չի եղել, սակայն դատական կարգադրիչները մեր զրույցում պնդում էին, թե որոշումը հրապարակվել է նիստի ժամանակ:

Արայիկ Խանդոյանի հարազատներին, ծանոթներին դատական կարգադրիչները թույլ չտվեցին նույնիսկ շենքից ներս մտնել՝ նշելով, որ դա դատարանի որոշումն է։ Պաշտպան Արա Ղարագյոզյանը լրագրողներին տեղեկացրեց, որ նման կարգ գոյություն չունի, երբ նմանատիպ գործերով դատական նիստերն անցկացվեն դռնփակ։ Դռնփակ նիստի ժամանակ պաշտպանը երկրորդ ինքնաբացարկի միջնորդությունն է ներկայացրել դատավոր Արշակ Խաչատրյանին: Ողջ նիստի ընթացքում պարբերաբար լսվում էին Խանդոյանի բղավոցները:

Ինքնաբացարկի միջնորդությունը, սակայն կրկին մերժվել է, ինչից հետո թե՛ Արայիկ Խանդոյանը, եւ թե՛ պաշտպան Արա Ղարագյոզյանը բոյոկտել են դատական նիստը եւ հեռացել նիստերի դահլիճից: Խանդոյանի բողոքը դատարանը քննել է քննիչի եւ դատախազի ներկայությամբ, իսկ թե ինչ է որոշել՝ բավարարե՞լ, թե՞ մերժել է, այդպես էլ հայտնի չդարձավ:

Մեր հարցին, թե ի՞նչ էր բղավում Արայիկ Խանդոյանը, պաշտպան Արա Ղարագյոզյանը պատասխանեց, որ Խանդոյանը դատարանում հայտարարել է, որ դատախազը եւ հատուկ քննչական ծառայության քննչական խմբի ղեկավար Էդիկ Հակոբյանն են սպանել «Հաց բերողին»: Նշենք, որ խոսքը ՀՔԾ քննիչ Էդիկ Հակոբյանի մասին է. հենց այս քննիչն է փետրվարին Հաց բերող Արթուր Սարգսյանին կրկին կալանավորելու միջնորդություն ներկայացրել դատարան, ինչն էլ բավարարվել էր: Արթուր Սարգսյանն այս որոշումից հետո շուրջ 25 օր հացադուլ էր հայտարարել, ինչի ժամանակ էլ նրա առողջական վիճակը կտրուկ վատացել էր: ՔԿՀի-ից դուրս գալուց մի քանի օր հետո նա հիվանդանոցում մահացել է:

«Արայիկ Խանդոյանը Հաց բերողին համարում էր իր եղբայրը եւ ասաց, որ դուք եք սպանել նրան»,- հայտարարեց պաշտպան Արա Ղարագյոզյանը: Խանդոյանի այս խոսքերից հետո, պաշտպանի խոսքերով, դատախազը սեռական բնույթի հայհոյանք է տվել նրան: Արա Ղարագյոզյանը միջնորդել է դատախազ Պետրոս Պետրոսյանի նկատմամբ կիրառել դատական սանկցիա, ինչը եւս մերժվել է:

Խոսելով նիստը դռնփակ անցկացնելու մասին, պաշտպանն ասաց, որ դատարանը կատարում է քաղաքական պատվեր, եւ այսօր ադարադատություն չի կատարվում. «Թեկուզ եթե Խանդոյանը մի քիչ բորբոքվել է, դատախազն ի՞նչ իրավունքով է իմ պաշտպանյալին հայհոյանքներ տալիս»,- հավելեց նա։ Ներպետական ատյանները սպառելուց հետո պաշտպանական կողմը պատրաստվում է դիմել Մարդու իրավունքների եվրոպական դատարան:

Այսօր դատարան էր եկել նաեւ Արայիկ Խանդոյանի մայրը՝ տիկին Ռիման: Նա մինչեւ դատական նիստի ավարտը սպասեց դահլիճից դուրս: Մեր զրույցում նա ասաց, որ շուրջ 8 ամիս է՝ չի կարողացել տեսնել որդուն. «8 ամիս է իմ էրեխեն փակված է անհիմն պատճառով: Բազմաթիվ կանտուզիաներ է տարել, ներվերն էլ չի հերիքում: Կռվեցին, արյուն թափեցին, իմ տղեն պայքարեց, որ հողերը չհանձնեն թուրքերին»,- նշեց տիկին Ռիման:

Հիշեցնենք, որ Արայիկ Խանդոյանին մեղադրանք է առաջադրվել 235-րդ հոդվածի 3-րդ մասով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կազմակերպված խմբի կողմից` պատժվում է ազատազրկմամբ՝ 3-8 տարի ժամկետով) եւ 238-րդ հոդվածի 4-րդ, 1-ին եւ 2-րդ կետերով ՝ (զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը կազմակերպված խմբի կողմից եւ կյանքի կամ առողջության համար վտանգավոր բռնություն գործադրելով ), ՀՀ քրեական օրենսգրքի 218 հոդվածի 3-րդ մասի 1-ին կետով (պատանդ վերցնելը):

Նրա եւ «Սասնա ծռերից» եւս 11-ի մասով դեռեւս 2016 թվականի նոյեմբերին նախաքննության ավարտ էր հայտարարվել: Պաշտպանական կողմը մինչեւ ապրիլի կեսերը գործի նյութերին ծանոթանալու ժամանակ է խնդրել, ինչից հետո գործը կուղարկվի դատարան: